Read Ateso 2 Samuel 8 Bible Online

2 Samuel 8 - Ateso bible

2 Samuel 8

¹ Kosodi kanen akaulo kaŋun, kodany Daudi Ipilisitian, kipiko kes: koyaŋa Daudi aitinet kore lokapolon kakan naka Ipilisitian.

² Kodany Moab, kitirian kaitemis, kiteperik kes kwap; kitirian ikokoron iarei aario, ido kitajar ekokoro ediopet, Koraut Imoabin ikejaanakinak luka Daudi, koyaut ainakineta.

³ Kitoji da Daudi Kadadeser okoku loka Rekob, ekabaka loka Soba, nakelosio ainyakun ayaiteke kOcor.

⁴Kolema Daudi kamake ikebwanenok elukumit ka akwat akanykaarei, ka lualosete kakeje ilukumin akaisaarei: kitwaŋal Daudi ibalasin kere luka agalin, konye kiŋadak kakes akwatat.

⁵Kepotu Isurian luka Damasiko aisigalikin Kadadeser ekabaka loka Soba, kodany Daudi Isurian ilukumin akaisaarei ka luarei.

⁶Kosodi Daudi aibwaikin atukon nuka iserikalen Suria loka Damasiko: koraut Isurian ikejaanakinak luka Daudi, koyaut ainakineta. Koinak EJAKAIT Daudi aipikor kama kelosenenei kere.

⁷Koŋat Daudi ibukui luka esabu luajaas kikejaanakinak luka Kadadeser, koyau kes Yerusalem.

⁸Koŋat Daudi aisinit naepol noi koBeta ka Berotai, ireria luka Kadadeser.

⁹Kepupu Toi ekabaka loka Kamat ebe adany Daudi ajore kere naka Kadadeser.

¹⁰Kosodi Toi aijukar Yoram okokuke mama ejai ekabaka Daudi ayogan ŋes, ailipakin ŋes arereŋ, naarai etijiit Kadadeser, adany da; naarai abu Kadadeser kitijiite Toi. Koina Yoram iboro luka epuesa ka iboro luka esabu, ka iboro luka aisinit.

¹¹ Ŋul da abu Daudi kotiakak EJAKAIT, nepepe kepuesa ka esabu luatiakenenei luka atekerin kere nuepikori.

¹²Luka Suria, ka luka Moab, ka luka idwe luka Amon, ka luka Ipilisitian, ka luka Amalek, ka luŋatuna luka Kadadeser, okoku loka Rekob, ekabaka loka Soba.

¹³ Kodum Daudi ekiror nakebonunia kaidany Isurian kAditot naka Abalaŋ, kes ituŋa ilukumin itomon ka lukanykauni.

¹⁴ Kibwaik atukon nuka iserikalen Edom; kibwaik atukon nuka iserikalen anatar Edom kere, koraut Idomein ikejaanakinak luka Daudi. Koinak EJAKAIT Daudi aipikor kama kelosenenei kere.

¹⁵Kirum Daudi Isirael kere; kitodolenenei Daudi itubesia ka nuetenito kotuŋake kere.

¹⁶ Kopolokinite Yoab okoku loka Seruia ajore; kerai Yekosapat okoku loka Akilud ekesiitonokinan:

¹⁷ Sadok okoku loka Akitub, ka Akimelek okoku loka Abiatar kes keraas isasedotin; kerai Seraia ekalani;

¹⁸ Kopolokinite Benaia okoku loka Yekoiada Ikeretin ka Ipeletin; keraas odwe luka Daudi isasedotin.