Read Ateso 1 Ikabakan 10 Bible Online

1 Ikabakan 10 - Ateso bible

1 Ikabakan 10

¹ Kosodi kepupu Akabaka naka Seba eemut loka Solomon kanuka ekiror loka EJAKAIT, kobu aitem ŋes kaiŋiseta kanuetioko.

²Kobu Yerusalem kojaas kituŋa luipu noi, ka akaalai nuebwokito luewuru maa, ka esabu Loepol noi, ka amor nuka akais nuipu: kosodi kedolu ŋesi neejai Solomon, kolimok ŋes akiro kere nukejaas otauke.

³ Kitejenu Solomon akiro kere nukiŋisit ŋesi: amamei akirot naaponi kimunonikinai ekabaka namam kitejenunit ŋes.

⁴Kosodi kedau Akabaka naka Seba aanyun acoa kere naka Solomon, ka etogo da lokeduki.

⁵ Inyamat da lukomesake, ka eiboie loka ikebulesin, ka aijaanakin naka ikekejaanakinak, ka ikecenapen, ka ikekaliak da, ka eititiriake lokedokanaria togo loka EJAKAIT; kimwokolikin eketau.

⁶Kotema ŋesi ekabaka atiar, “Akirot naabu kapupunite kakwapuka kerai nakabeit naka aswamisiokon, ka akonicoa da.

⁷Kwabo mam abu keyu akiro ŋun, aitodol naabunio koanyut akakonye: ido koany, mam kalimokinitai atutubet: akonicoa ka akonikerianut itelekarito eemut loabu keira.

⁸ Elakara ikonituŋa, elakara da ikonikejaanakinak lu, luebwoenenete kakonyenekon apaarasia kere, kopupete akonicoa.

⁹ Kituritete EJAKAIT Ekonideke loeyalamikin kanukon adakakin; oicoloŋ loka Isirael: naarai abu EJAKAIT komina Isirael ikar kere. Ŋes kituluoria jo ekabaka, aiswamaenen nukabeit ka nuedolito.”

¹⁰Koinak ŋesi ekabaka esabu atalatan akwatat ka akaisaarei, ka luewuru maa luipu noi noi, ka amor da nuka akais nuipu: mam eyauna bobo luewuru maa luipu lueriakas kaŋul luainakini Akabaka naka Seba ekabaka Solomon.

¹¹ Ido erioŋet loka ameerin nuka Kiram, lokeyauni esabu kOpir, koyau kOpir ikito lukajokak luipu noi noi ka amor nuka akais nuipu.

¹² Kitarau ekabaka ikito lukajokak ipirin luka etogo loka EJAKAIT ka luka etogo loka ekabaka da, adeudeun da ka isabulin luka ikayook: mam eyauna bobo ikito lukajokak lueputos kaŋul, kwabo mam etakanuna, kiton lolo.

¹³Kosodi Ekabaka Solomon ainakin Akabaka naka Seba iboro kere lukipuda ŋesi, ŋinibore kere yenikilipi, adepar ŋul lukeinakini ekabaka Solomon kotoma asianut naka ekabaka. Kwaŋin kibelokin do, koboŋo ŋesi akwapuke, ka ikekejaanakinak.

¹⁴Alaŋiru naka esabu loainunitai Solomon kokaru ediopet kerai atalatan akwat akanykape ka akaisakanykape ka nukanykape nuka esabu.

¹⁵ Adepar loainunete ikemutunok, ka agwelanar naka ikagwelanarak, ka loka ikabakan luka ituŋa luinyalakina, ka loka ikayaitok luka akwap.

¹⁶Kiswamau ekabaka Solomon ibukwi lukapolok akwat aarei luka esabu loerukuk: ŋolibuku lokapolon abu koya isekelin akwat akanykape luka esabu.

¹⁷ Kiswamau ŋesi ibukwi akwat auni luka esabu loerukuk; ŋolibuku abu koya ilatirin iuni luka esabu: kibwaik ekabaka kes togo loka ikito luka Lebanon.

¹⁸ Bobo da kiswamau ekabaka eicoloŋ lokapolon loka ikel luka etom, kiladaa ŋes kesabu kaloejok noi.

¹⁹Kejaas adoketa akanykape oicoloŋ, kolukuna kuju keicoloŋ kokauke: kejaas akanin epuai kepuai kaibois neiboiere, ka iŋatunyo iarei luabwoete kawaitin nuka akanin.

²⁰Kobwaata iŋatunyo itomon kaluarei epuai kepuai kadoketa akanykape: amamei lokeputos kaŋol kajakanut kere.

²¹Iboro kere lumaset luka ekabaka Solomon keraas luka esabu, ka iboro kere lukotogo loka ikito luka Lebanon keraas luka esabu kaloelai: amameete lukeraas luka epuesa; mam apodoi araut ibore kapaarasia nuka Solomon.

²² Naarai kejai ekabaka erioŋet loka Tarusis aŋolol nepepe kerioŋet loka Kiram: abu erioŋet loka Tarusis kobunenenei atipet ŋulukar iuni, ayaun esabu, ka epuesa, ka ikela luka etom, ka icomion, ka akweny nukejaas ikorio lukijesesinei kaluipu.

²³Kwaŋin kiteleka ekabaka Solomon ikabakan kere luka akwap kabar ka acoa.

²⁴Komoata lukakwap kere aanyun Solomon, akiirar acoake, nakibwaikinit Edeke otauke.

²⁵ Koinununete ŋinituŋanan ainakineteke, iboro luka epuesa, ka iboro luka esabu, ka inapen, ka lujiis, ka luewuru maa, ka ibalasin, ka inyubun, esolo loka ŋolikaru.

²⁶ Kotukonok Solomon agalin ka ikebwanenok: kejaas ŋes agalin alukumit ka akwat aoŋon, ka ikebwanenok ilukumin itomon ka luarei, lukibwaikinit oreria luka agalin, ka Yerusalem da nekejai ekabaka.

²⁷ Kitarau ekabaka epuesa asubit bala amor koYerusalem, kitarau iresia asubit bala ikito luka esukumor luejaas apuutona, kanuka aipues.

²⁸ Ayaunio ibalasin lukejaas kaSolomon koMisiri kodumut ikagwelanarak luka ekabaka kes kosipanin, nolisipan kotiaike.

²⁹ Ayaun agali koMisiri kogwelarite kisekelin akwat akanykape luka epuesa, ebalasit da akwatat ka akaisakany: koinununut kes kwaŋin ikabakan kere luka Ikitin, ka ikabakan kere luka Suria kakanikec.