Read Ateso 1 Ikabakan 11 Bible Online

1 Ikabakan 11 - Ateso bible

1 Ikabakan 11

¹ Komina ekabaka Solomon aŋor nuipu numo, nepepe kakoku naka Parao, aŋor nuka Imoabin, nuka Imonain, Idomein, Isidonin, ka Ikitin;

² Nuka atekerin nuabala EJAKAIT idwe luka Isirael ebe, “Mam ilosete mamakec, karaida kes abunore mama ijaas: naarai abeit ibelokinete kesi ikusitauon atupenen ikecedekesio.” Kiminaikin Solomon ŋun kamin.

³Kejaas ŋes aŋor akwat akanykaarei, nukapolok, ka abusian akwat auni: kibelokis akeŋor etaukeŋ.

⁴ Naarai nakemojoŋia Solomon, kibelokis akeŋor etauke atupit idekesio ice: mam kedolit eketau mama ejai EJAKAIT Ekedeke, kwape ajaar etau loka Daudi papake.

⁵ Naarai kotupa Solomon Asitoret adeke naka Isidonin, ka Milikom etal loka Imonain.

⁶ Kiswama Solomon nueroko kakonyen nuka EJAKAIT, mam abu kotuparite cut EJAKAIT kwape atuparitor Daudi papake.

⁷ Kosodi Solomon adukokin Kemos etal loka Moab, aibois naicelelei, komoru loitei Yerusalem, Molok da etal loka idwe luka Amon.

⁸Kiswamak kwaŋin aŋoroke kere numo, nuesupurununete lukisupurununo koinakis da asuban mama ejaas idekesiokec.

⁹ Konyunyurik EJAKAIT Solomon, naarai ebelokit eketau anyoun kama ejai EJAKAIT, Edeke loka Isirael, loabu kitaanyikin ŋes irwan aarei.

¹⁰ Ido kicorak ŋes nuka akirot kana ebe kinyek atupar idekesio ice; konye mam ŋes kerica nuecorakini EJAKAIT.

¹¹ Kanuka ŋun kotema EJAKAIT Solomon atiar, “Naarai iswama ŋun, komam iricit aitutuketaka ka ikisilaka, lukecorakini jo, abeit acilari eoŋ ajakanut kamakon, ainakini ekejaanakinanikon.

¹²Konye mam eswamai ŋun kapaarasiakon, kanuka Daudi papakon: dimarai acilari kama kokokukon.

¹³ Konye mam acilari ajakanut kere; dimarai ainakini okokukon ateker adiopet, kanuka Daudi ekejaanakinanika, ido kanuka Yerusalem lokaseuni.”

¹⁴ Kitonyou EJAKAIT lokasurup aluikin Solomon, Kadad, Edomit: kerai ŋesi loka aur naka ekabaka koEdom.

¹⁵ Naarai nakejaar Daudi Edom, kolot Yoab da ekapolon loka ajore aida lukatwak, ido abu koar ŋolikiliokit koEdom;

¹⁶(Naarai kosalak Yoab ka Isirael kere ŋina ilapio ikanykape, aitodol neamudiaria ŋolikiliokit koEdom;)

¹⁷Konye koker Kadad, ŋes ka Idomein ice luka ikejaanakinak luka papake, alosit Misiri; koroko Kadad erai ikoku yenididi.

¹⁸Konyout koMidian, kodolot Paran: koyaŋaasi ituŋa nepepe kakes koParan, kodolot Misiri, mama ejai Parao ekabaka loko Misiri; loabu koinak ŋes etogo, kokorak inyamat, koinak ŋes alup.

¹⁹Kominunai Kadad noi kakonyen nuka Parao, tape ekorakini ŋes inaci naka aberuke elopet aimany, inaci naka Tapenes akabaka.

²⁰Kourik inaci naka Tapenes ŋes Genubat okokuke, lokejakari Tapenes kotogo loka Parao: kojai Genubat togo loka Parao nepepe kodwe luka Parao.

²¹ Kepupu Kadad koMisiri ebe kejotoor Daudi kalukapapaake, atwana da Yoab ekapolon loka ajore, kobala Kadad Parao atiar, “Kisiikinai kalot, kaboŋo bukosi.”

²²Kosodi Parao atemar ŋes atiar, “Konye kiwoliki ijo inyo kamakaŋ, tape ikoto alosit bukus?” Koboŋok ebe, “Mam ibore: konye kisiikinai kalot.”

²³ Kitonyou Edeke lokasurup ece aluikin ŋes, Reson okoku loka Eliada, loabu koker kama ejai ejakaitike Kadadeser ekabaka loka Soba:

²⁴ Kotukonok ŋesi ituŋa mamake, korau ekapolon loka erioŋet, nakearia Daudi luka Soba: koloto Damasiko, kiboienenete kaŋina, kirumata Damasiko.

²⁵ Kerai ŋesi lokasurup loka Isirael apaarasia kere nuka Solomon, kogelara ameŋeranut naka Kadad: kola ŋesi Isirael, kirum Suria.

²⁶ Yeroboam da okoku loka Nebat, Epuraimit loka Sereda, ekejaanakinan loka Solomon, ekiror loka totoke Serua, apuserut, ŋes da kitonyou akekan aluikin ekabaka.

²⁷ Na ŋes akirot naainakinit ŋes aitonyoun akekan asurokin ekabaka: koduk Solomon Milo, konwok neketiyaara kore loka Daudi papake.

²⁸ Kerai ekesa je Yeroboam ekirigi loketitiŋ: koany Solomon ebe ekukurana ekatumunan, koinak ŋes ayait aitaaritoi kere naka ekek loka Yosep.

²⁹ Kosodi kanen kapak kaŋin, nakelomaria Yeroboam koYerusalem, kodum Akiya enabi Esilonit ŋes korot; abu Aldya konap anapito nakitetet, kojaas kesi kere iarei bonik okitui.

³⁰ Kitiŋ Akiya anapito nakitetet naanapit, kocilicil atutubeta atomon ka nuarei.

³¹ Kotema ŋesi Yeroboam atiar, “Koyaŋa ijo atutubeta atomon: naarai inera EJAKAIT, Edeke loka Isirael kwanata ebe, ‘Koany, acilari eoŋ ajakanut kakan naka Solomon, kainakini jo atekerin atomon:

³²(Konye esalakini ŋes ateker adiopet, kanuka Daudi ekejaanakinanika, ido kanuka Yerusalem, ere lokaseuni kotoma atekerin kere nuka Isirael:)

³³ Naarai apotu kajalakis eoŋ, komaata Asitoret adeke naka Isidonin, ka Kemos edeke loka Moab, ka Milikom edeke loka idwe luka Amon; mam apotu kolosenenete korotinika, aiswamaenen nuedolito kakonyeneka, aricenen ikakisila ka ikatubesia, kwape kolo eswamaa Daudi papake.

³⁴Konye mam ayaŋaari ajakanut kere kakanike: konye etaraun ŋes ekapolon apaarasia kere nuka aijarake, kanuka Daudi ekakejaanakinan, loabu kaseu, naarai aricenenei aicorakinetaka ka ikisilaka:

³⁵Konye alemari ajakanut kakan naka okokuke, ainakini jo, atekerin atomon.

³⁶ Ainakini okokuke ateker adiopet, tetere ejaenena Daudi ekejaanakinanika atala tiritir kakonyeneka koYerusalem, ere loabu kaseu aibwaikin nen ekakiror.

³⁷Ayaŋaar eoŋ jo, irumi ijo kwape ipudar akoniijar kere, iraun ekabaka koIsirael.

³⁸ Kosodi, arai ipupuni kere nuecorakini jo, kolosenenei korotinika, kiswamaenenei da nuedolito kakonyeneka, koricenenei ikisilaka ka aicorakinetaka, kwape kolo kiswamaa Daudi ekejaanakinanika; ajaenena kajo, adukokini jo ekek loicasit, kwape adukokinia Daudi, ainakini jo Isirael.

³⁹Ido eticani aur naka Daudi kanuka ŋun, konye mere ikar kere.’ ”

⁴⁰Kanuka ŋun komoote Solomon aiar Yeroboam: konye konyou Yeroboam, koker Misiri, mama ejai Sisak ekabaka loko Misiri, kojaenena Misiri aitodol neatwania Solomon.

⁴¹ Aswamisio ace nuka Solomon, kere da nuabu kiswama, ka acoake, mam kereka iwadikatai oitabo loka aswamisio nuka Solomon?

⁴² Apak naabu Solomon kirumak Isirael kere koYerusalem keraas ikar akaisaoŋon.

⁴³ Kojotor Solomon kalukapapaake, kidaikinai ore loka Daudi papake: kirum Rekoboam okokuke aiboisike.