Read Ateso 1 Ikabakan 12 Bible Online

1 Ikabakan 12 - Ateso bible

1 Ikabakan 12

¹ Kolot Rekoboam Sekem: naarai kinotara Isirael kere Sekem aitaraun ŋes ekabaka.

² Kosodi kanen, kepupu Yeroboam okoku loka Nebat ŋun, (naarai keriŋa ejai Misiri, neakeriarit anyoun kakonyen nuka ekabaka Solomon, kiboienenei Yeroboam koMisiri. Aponi kijukarai anyaraun ŋes.)

³Kobu Yeroboam ka ekodet kere loka Isirael, kinerata kaRekoboam ebe,

⁴ “Abu papakon kitalaŋir ajookotokosi: aso do kitebeben aswam naetiono naka papakon, ka ajookotoke naelaŋir naebwaikinit mamakosi, isio da kijaanakini jo.”

⁵Kotema kes atiar, “Koloto kodaut apaarasia auni, kosodete aboŋun mamakaŋ.” Koloto ituŋa.

⁶ Kinerut ekabaka Rekoboam kimakio, lukebwoenenete kakonyen nuka Solomon papake eroko ejari, ebe, “Ibalas bo yesi ai eoŋ aboŋokin ituŋa ŋul?”

⁷ Kobalas ŋes atiar, “Arai ikoto araun ekejaanakinan mama ejaas ituŋa lu lolo, kokoto aijaanakin kes, Koboŋok kes, kolimok akiro nuejok, aso eraunos kesi ikonikejaanakinak ikar kere.”

⁸Konye kola ainerun naka imakio naapesikinito ŋes, kinerut kikatumunak luapolounete kaŋes, luabwoete kakonyeneke.

⁹Kotema kes atiar, “Ibalas bo yesi ai, kaboŋokis ituŋa ŋul, luapotu kabalas eoŋ ebe, ‘Kitebeben ajookot nakibwaikini papakon mamakosi’?”

¹⁰ Kotemasi ikatumunak luapolounete kaŋes ebe, “Kolimok ituŋa lu lukibalas jo ebe, ‘Abu papakon kitalaŋir ajookotokosi konye jo kitebeben ŋes kamakosi’; ilimokini kes kwanata ebe, ‘Ebur ekabokorit lodidi aitelekar aŋabet naka papaka.

¹¹Aso do abu papaka kisibwok yes ajookot naelaŋir, eyatakini do eoŋ ajookotokus: abu papaka koswala yes kidase, konye eoŋ kaswalari yes kikiritona.’ ”

¹²Aso kobu Yeroboam ka ituŋa kere mama ejai Rekoboam apaaran nakiwuniet, kwape ecorakinia ekabaka ebe, “Koboŋut bobo apaaran nakiwuniet.”

¹³Koboŋok ekabaka ituŋa kaisiejakin, kola ainerun naka imakio naapesikinito ŋes:

¹⁴Kinera kakes kwape ajaar ainerun naka ikatumunak ebe, “Abu papaka kitalaŋir ajookotokus, konye eoŋ eyatakini ajookotokus: abu papaka koswala yes kidase, konye eoŋ kaswalari yes kikiritona.”

¹⁵ Aso mam abu ekabaka kopup ituŋa; naarai kerai akirot naabu EJAKAIT koyau, tetere iticasi akekirot naabu EJAKAIT kiner kama ka Akiya Esilonit mama ejai Yeroboam okoku loka Nebat.

¹⁶ Keanyu Isirael kere ebe mam abu ekabaka kopup kes, koboŋokis ituŋa ekabaka ebe, “Anyoin akorakinetekosi kama ka Daudi? Ido emamei sio airumet kotoma okoku loka Yese: Ape ma owemanakus, wu Isirael: Daudi, koanyanar do ekonikek.” Koloto do luka Isirael owemanakec.

¹⁷ Konye kirum Rekoboam idwe luka Isirael luiboiete koreria luka Yuda.

¹⁸ Kosodi ekabaka Rekoboam aijukar Adoram, loapolokinit esolo; abu Isirael kere kibiribir ŋes kamor, kotwana. Kiwonya ekabaka Rekoboam adokar agalike akerit Yerusalem.

¹⁹ Kwaŋin kipaliik do Isirael ekek loka Daudi, kiton lolo.

²⁰ Kosodi kanen, kepupu Isirael kere ebe Aboŋu Yeroboam, kijukasi anyaraun ŋes abunore atukot, kitaraut ŋes ekabaka koIsirael kere: amamei yenatupit ekek loka Daudi, dimarai ateker naka Yuda bon.

²¹ Kedol Rekoboam Yerusalem, kotukonok ŋesi lukokek loka Yuda kere, ka ateker naka Benyamin, ituŋa lueseunitai ilukumin akwatat ka akaisakanykauni, lukeraas ikajiok, aitiji ekek loka Isirael, ainyakun ajakanut bobo neejai Rekoboam okoku loka Solomon.

²² Konye kobu akirot naka Edeke mama ejai Semaia etuŋanan loka Edeke ebe,

²³“Kolimok Rekoboam okoku loka Solomon, ekabaka loka Yuda, ka ekek kere loka Yuda ka Benyamin, ka ituŋa ice da ebe,

²⁴ ‘Inera EJAKAIT kwanata ebe, Mam ilosete, ido mam ijiikinos kiinacanakus idwe luka Isirael: koboŋo ŋolituŋanan togoke; naarai erai akirot na nakaŋ.’ ” Kosodete kopuput akirot naka EJAKAIT, koboŋosi, koloto kwape ajaar akirot naka EJAKAIT.

²⁵ Kosodi Yeroboam aiduk Sekem akwap nakiukon naka Epuraim, kiboienenei kaŋina; konyou ŋesi kanen, koduk Penuel.

²⁶ Kotema Yeroboam kotauke atiar, “Kwana eboŋori ajakanut okek loka Daudi:

²⁷ Arai kelosenenoto ituŋa lu ainanakin asuban togo loka EJAKAIT Yerusalem, ibelokinos bobo itauon luka ituŋa kalu mama ejai ejakaitikec, Rekoboam ekabaka loka Yuda; kaarete eoŋ, eboŋorete do mama ejai Rekoboam ekabaka loka Yuda.”

²⁸ Kosodi kineru ekabaka, kiswamau itak iarei luka esabu; kotema kes atiar, “Erai akirot naepol yes alosenen Yerusalem; koany idekesiokon, ijo Isirael, lukitolomunete jo kakwap nako Misiri.”

²⁹ Kosipok idiopet Betel, ka ice da kosipok Dan.

³⁰ Koraun akirot ŋin adiakaret: naarai kolosenenoto ituŋa ice aima idiopet Betel, ice da mape Dan.

³¹ Kodukok itogoi aiboisio nuiceleleete, koseu icetuŋa kotuŋa kere kitarau isasedotin, lumam keraas idwe luka Lebi.

³² Kicorak Yeroboam epucit kolap lokikanyetekauni, kapaaran nakitomonet kakany naka elap, kwape kepucit loejai Yuda, kolot ŋesi otem; kiswama kwaŋin da koBetel, koinak asuban mama ejaas itak luabu kiswamau: kibwaik isasedotin luka aiboisio nuiceleleete nuabu kiswamau koBetel.

³³ Kolot otem loabu kiswamau koBetel kapaaran nakitomonet kakany kolap lokikanyetekauni, ŋes elap loabu ŋesi koseu kotauke: kicorak epucit kanuka idwe luka Isirael, kolot otem aisupuruun lukisupurununo.