Read Ateso 1 Ikabakan 13 Bible Online

1 Ikabakan 13 - Ateso bible

1 Ikabakan 13

¹ Ido koany, konyou etuŋanan loka Edeke ko Yuda kakirot naka EJAKAIT kobu Betel: abwoi Yeroboam eiduny ketem aisupuruun lukisupuru.

² Kilamak etem kakirot naka EJAKAIT, kotema atiar, “Wu etem, etem, inera kwanata EJAKAIT ebe, ‘Koany, ewuruunio ikoku kokek loka Daudi, ekekiror Yosia; einakini ŋesi kamakon isasedotin luka aiboisio nuiceleleete luisupuruunete lukisupurununo kamakon araun asuban, icweikinete kesi akojo nuka ituŋa kamakon.’ ”

³ Koinak aanyunet kapaaran kaŋin, ebe, “Na ŋes aanyunet naenera EJAKAIT: koany, ecila etem, ebukor ekurwon loejai tomake.”

⁴ Kosodi kanen, kepupu ekabaka akirot naka etuŋanan loka Edeke, naelamia ŋesi etem koBetel, kikia Yeroboam akekan kotem, kotema ebe, “Kikam ŋes.” Koono akekan naekiarit adoditor ŋes, komam epedori asukokin.

⁵Kocila etem da, kobukor ekurwon kotem, kwape ajaar aanyunet naabu etuŋanan loka Edeke koinak kakirot naka EJAKAIT.

⁶ Koboŋok ekabaka kotema etuŋanan loka Edeke ebe, “Kiŋaiŋa cabo asianut naka EJAKAIT Ekonideke, kilipakinai eoŋ, koŋaleu akakan.” Kiŋaiŋa etuŋanan loka Edeke EJAKAIT, kitaŋaleunai akekan, kojaun kwape lem sek.

⁷ Kotema ekabaka etuŋanan loka Edeke atiar, “Kaloto ore, kikwaru, kainakini jo ainakinet.”

⁸ Kotema etuŋanan loka Edeke ekabaka atiar, “Arai kiinaki ijo eoŋ atutubet naka etogokon, mam eoŋ alosi kajo, idomam anyami atap karaida aimat akipi kaibois kana.

⁹ Naarai aponi kecorakinitete eoŋ kakirot naka EJAKAIT ebe, ‘Mam inyami atap, karaida aimat akipi, karaida aboŋor korot lokibunio.’ ”

¹⁰Kosodi koboŋo kecerot, mam abu koboŋo korot kaloabunio Betel.

¹¹Kiboienenei enabi lomojoŋ koBetel; kobu ediopet kodweke kolimok ŋes aswamisio kere nueswama etuŋanan loka Edeke kapaaran kaŋin koBetel: akiro nuabu ŋesi kolimok ekabaka, ŋun da kolimokis papakec.

¹²Kotema papakec kes ebe, “Etoro bo ŋesi orot ali?” Apotu odweke koanyut erot loetori etuŋanan loka Edeke, loabunit koYuda.

¹³Kotema odweke atiar, “Kopesikinai lupetan asigiria.” Kosodete kesi apesikin lupetan asigiria: kibwanen ŋesi.

¹⁴Kibwapak etuŋanan loka Edeke, kodum ŋes iboie kotolim kelua: kotema ŋes atiar, “Ijo ŋes etuŋanan loka Edeke loabuni koYuda?” Kotema atiar, “Eoŋ lo,”

¹⁵Kosodi atemar ŋes atiar, “Kaboŋosi oreka, konyam atap.”

¹⁶Kotema atiar, “Mam apedori aboŋor kajo, karaida alomar kajo: mam da anyami atap karaida aimat akipi kajo kaibois kana:

¹⁷ Naarai aponi kalimokinitete kakirot naka EJAKAIT ebe, ‘Sirikinyam atap, karaida aimat akipi kaŋina, sirikiboŋo da korot loibu kobunio.’ ”

¹⁸ Kotema ŋes atiar, “Eoŋ da enabi kwape kajo; abu emalaika kalimok eoŋ kakirot naka EJAKAIT ebe, ‘Kinyaku ŋes togokon, konyam atap, komat akipi.’ ” Konye abu kiŋalai.

¹⁹Kwaŋin koboŋo kaŋes, konyam atap kotogoke, komat akipi.

²⁰ Kosodi kanen enyamete, kobu akirot naka EJAKAIT mama ejai enabi loabu kinyaku ŋes:

²¹Kiworo mama ejai etuŋanan loka Edeke loabunit koYuda ebe, “Inera EJAKAIT kwanata ebe, ‘Naarai ipaliiki ijo akirot naka EJAKAIT, mam iricit aicorakinet naecoraki EJAKAIT Ekonideke jo.

²²Konye iboŋu, inyama atap, imat akipi kaibois nakilimokinio jo ebe, “Sirikinyam atap, sirikimat akipi”; mam akuanakon idaikinio ates naka lukapapaakon.’ ”

²³Kosodi kanen kedau ŋesi ainyam atap, ka aimat, kopesik lupetan asigiria enabi loenyakuni ŋesi.

²⁴ Napelosi, kiriamakinos keŋatuny korot, koar eŋatuny ŋes, kocakak akekuan orot, kobwo asigiria die kaŋes; kobwo da eŋatuny die kakekuan.

²⁵Ido koany, kitoroto ituŋa, koanyutu akuan korot, eŋatuny da ebwoi die kates; kopotu, koyaut akiro ore neeboieneno enabi ŋol lomojoŋ.

²⁶Kepupu ŋun enabi loabu kinyaku ŋes korot, kotema atiar, “Ŋes ŋol etuŋanan loka Edeke, loabu kipaliik akirot naka EJAKAIT: kanuka ŋun ejaiki EJAKAIT ŋes mama ejai eŋatuny, loapoopoo ŋes, aara da, kwape ajaar akirot naka EJAKAIT, naabu kiner kaŋes.”

²⁷Kolimok odweke ebe, “Kopesikinai lupetan asigiria.” Kopesikis.

²⁸ Kolot, kodum aketes korot, ka asigiria ka eŋatuny ebwoete die kates: mam abu eŋatuny konyamite ates, karaida apoopo asigiria.

²⁹Kodaku enabi ates naka etuŋanan loka Edeke, kidokok asigiria, kinyaku ore, aibworo ka ainuk ŋes.

³⁰ Kibwaik akuanake atesike elopet; kibworoto ŋes ebe, “Wu okwe onaceka!”

³¹ Kosodi kanen, kedau ainuk ŋes kotema odweke ebe, “Katwana eoŋ, konukakis eoŋ ates neenukuk etuŋanan loka Edeke; kibwaikis akakojo eiduny kakekojo.

³² Naarai abeit itodolikinio akirot naabu ŋesi kiworo kakirot naka EJAKAIT ilamakini etem koBet-el, ilamakini da itogoi kere luka aiboisio nuiceleleete nuejaas oreria luka Samaria.”

³³ Akaulo kaŋun mam abu Yeroboam koboŋu korotoke loerono, konye kiyatak aseun kotuŋa kere lukitarauni isasedotin luka aiboisio nuiceleleete: ŋol kere loekoto, kotiakuni, tetere ejaas isasedotin luka aiboisio nuiceleleete.

³⁴ Koraun akirot ŋin adiakaret kokek loka Yeroboam, agelar ŋes, ka amudiar ŋes kakwap.