Read Ateso 1 Ikabakan 15 Bible Online

1 Ikabakan 15 - Ateso bible

1 Ikabakan 15

¹Kokaru do lokitomonet kakanykauni loka ekabaka Yeroboam okoku loka Nebat kogeu Abiyam airum Yuda.

² Kirumak ikar iuni koYerusalem: ekiror loka totoke ŋes Maaka akoku naka Abisalom.

³ Kolosenenei karonisio kere nuka papake, nueswamai ageikini ŋes: mam eketau adolit kaneejai EJAKAIT Ekedeke, kwape ketau loka papaake Daudi.

⁴ Konye kanuka Daudi abu EJAKAIT Ekedeke koinak ŋes atala koYerusalem, adakakin okokuke atupakin ŋes, aiticat Yerusalem:

⁵ Naarai abu Daudi kiswama nuedolito kakonye nuka EJAKAIT, mam abu kopaa kakirot kere naecorakini ŋes, apaarasia kere nuka aijarake, dimarai akirot naka Uria Ekitit.

⁶Kejaenena ejie kidiŋ Rekoboam ka Yeroboam apaarasia kere nuka aijarake.

⁷ Aswamisio ace kere nuka Abiyam, kere da nuabu kiswama, mam kereka iwadikatai oitabo loka aisiitonokin nuka ikabakan luka Yuda? Kejaenena ejie kidiŋ Abiyam ka Yeroboam.

⁸ Kojotoor Abiyam kalukapapaake; aponi kidaikinai ore loka Daudi: kirum Asa okokuke aiboisike.

⁹Kokaru lokakaisaarei loka Yeroboam ekabaka loka Isirael kogeu Asa airum Yuda.

¹⁰Kirumak ikar akaisaoŋon ka lodiopet koYerusalem: ekiror loka totoke ŋes Maaka akoku naka Abisalom.

¹¹ Kiswama Asa nuedolit kakonye nuka EJAKAIT, kwape eswamaa Daudi papaake.

¹² Kireŋea iketepak ikiliok kakwap, kolema aputosia kere nueswamato lukapapaake.

¹³ Kireŋea da Maaka totoke karaut akabaka, naarai abu kiswamau aput naketal araun Asera; kojepa Asa aputoke, kicwe kaguurut Kiduron.

¹⁴ Konye mam aponi kolemarai aiboisio nuiceleleete: konye kedolit etau loka Asa kaneejai EJAKAIT apaarasiake kere.

¹⁵Kitoloma iboro togo loka EJAKAIT luabu papake kotiakarite, ka iboro luabu ŋesi elopet kotiakarite, epuesa, ka esabu, ka iboro.

¹⁶Kejaenena ejie kidiŋ Asa ka Baasa ekabaka loka Isirael apaarasiakec kere.

¹⁷ Kolot Baasa ekabaka loka Isirael asurokin Yuda, koduk Rama, tetere mam ecamakini idiotuŋanan alomar arai alomun mama ejai Asa ekabaka loka Yuda.

¹⁸ Kosodi Asa ayaŋaar epuesa kere ka esabu luedeuna koboro luka akais nuipu luka etogo loka ekabaka, kijaik kes akanin nuka ikejaanakinakake; kijuka ekabaka Asa kes mama ejai Ben-kadad, okoku loka Tab-rimon, okoku loka Kesion, ekabaka loka Suria, loeboienenei koDamasiko, ebe,

¹⁹“Ejai aitutuket kidiŋika kajo, kidiŋ papaka ka papakon: koany, ejukakinit jo ainakinet naka epuesa ka esabu; kolot, kobil aitutuketekon kaBaasa ekabaka loka Isirael, tetere enyouni ŋesi kaneajai eoŋ.”

²⁰ Kiira Ben-kadad ekabaka Asa, kijuka ikapolok luka ajoresioke asurokin ireria luka Isirael, kodany luka Iyon, ka Dan, ka Abel-bet-maaka, ka Kinerot kere, ka akwap kere naka Naputali.

²¹Kosodi kanen, kepupu Baasa ŋun, kinyeik aiduk Rama, kiboikin do Tirisa.

²² Kosodi ekabaka Asa kokut luka Yuda kere; komamei yenedeparitai: kibwokata amor nuka Rama, ka akitoke, nuabu Baasa kodukitor: kodukio ekabaka Asa Geba loka Benyamin, ka Misipa.

²³ Aswamisio ace kere nuka Asa, ka akegogoŋ kere, ka kere nuabu kiswama, ka ireria luabu koduk, mam kereka iwadikatai oitabo loka aisiitonokin nuka ikabakan luka Yuda? Konye kapaarasia nuka amojoŋuke kodekakin akejeke.

²⁴ Kojotoor Asa kalukapapaake, aponi kidaikinai kalukapapaake ore loka Daudi papaake: kirum Yekosapat okokuke aiboisike.

²⁵Kogeu Nadab okoku loka Yeroboam airum Isirael kokaru lokiareit loka Asa ekabaka loka Yuda, kirumak Isirael ikar iarei.

²⁶ Kiswama nueroko kakonyen nuka Edeke, kolosenenei korot loka papake, kakeronis naetidiakaria Isirael da.

²⁷ Kineru Baasa okoku loka Akiya, lokokek loka Isakar, asurokin ŋes; kodany Baasa ŋes koGib-beton, lokerai loka Ipilisitian; naarai kirigaunitos Nadab ka Isirael kere Gib-beton.

²⁸ Kokaru lokiwuniet loka Asa ekabaka loka Yuda koar Baasa ŋes, kosodi airum aiboisike.

²⁹ Kosodi kanen, keraun ekabaka, atipet kodany lukokek kere loka Yeroboam; mam abu kideik Yeroboam idio yenikajaran, aitodol neamudiaria ŋes; kwape ajaar akirot naka EJAKAIT, naabu kiner kama kekejaanakinanike Akiya Esilonit:

³⁰Kanuka aronisio nuka Yeroboam nuabu kodiak, ido nuetidiakaria Isirael da: kanuka anyunyura naabu ŋesi kitunyunyurikinia EJAKAIT, Edeke loka Isirael.

³¹Aswamisio ace nuka Nadab, ka kere nuabu kiswama, mam kereka iwadikatai oitabo loka aisiitonokin nuka ikabakan luka Isirael?

³²Kejaenena ejie kidiŋ Asa ka Baasa ekabaka loka Isirael apaarasiakec kere.

³³Kokaru lokiwuniet loka Asa ekabaka loka Yuda kogeu Baasa okoku loka Akiya airum Isirael kere koTirisa, kirumak ikar akaisaarei ka luoŋon.

³⁴ Kiswama nueroko kakonyen nuka EJAKAIT, kolosenenei korot loka Yeroboam, kakeronis naetidiakaria Isirael.