Read Ateso 1 Ikabakan 16 Bible Online

1 Ikabakan 16 - Ateso bible

1 Ikabakan 16

¹ Kobu akirot naka EJAKAIT neejai Yeku okoku loka Kanani aluikin Baasa, ebe,

² “Naarai abu ketopoloo jo kotoma apua, kadakak jo araun ekapolon kotuŋaka Isirael; konye ilosenen korot loka Yeroboam, itidiak ikatuŋa Isirael, aitunyunyurikin eoŋ karonisiokec;

³ Koany, apiari cut Baasa ka ekekek: etusubi ekonikek bala ekek loka Yeroboam okoku loka Nebat.

⁴ Yenika Baasa yenetwanikini ore enyamete iŋokwo; ŋin da yenike yenetwanikini ais enyamete akweny nuka apak.”

⁵ Aswamisio ace nuka Baasa, ka nuabu kiswama, ka akegogoŋ, mam kereka iwadikatai oitabo loka aisiitonokin nuka ikabakan luka Isirael?

⁶ Kojotoor Baasa kalukapapaake, aponi kidaikinai Tirisa; kirum Ela okokuke aiboisike.

⁷ Bobo da kobu akirot naka EJAKAIT kama kenabi Yeku okoku loka Kanani aluikin Baasa, ka ekekek, kanuka aronis kere naabu kiswama kakonyen nuka EJAKAIT, aitunyunyurikin ŋes kaswam naka akaninike, araut kwape kekek loka Yeroboam, ido kanuka aidany ŋes.

⁸Kokaru loka akaisaarei ka lukanykape loka Asa ekabaka loka Yuda, kogeu Ela okoku loka Baasa airum Isirael koTirisa, kirumak ikar iarei.

⁹ Kineru Simuri ekekejaanakinan, ekapolon loka atutubet naka agalinike asurokin ŋes: kejai ŋesi Tirisa, emata komera kotogo loka Arusa, loapolokinit ekale koTirisa.

¹⁰Koloma Simuri kinom ŋes, koar, kokaru loka akaisaarei ka lukanykaarei loka Asa ekabaka loka Yuda, kirum aiboisike.

¹¹ Kosodi kanen, kegeu ŋesi airum, atipet kiboikin oicoloŋoke loka ajakanut, kodany ekek loka Baasa kere: mam abu kideik ŋes idiokoku yenikiliokit, karaida yenikokekike, karaida yenikopaperoke.

¹² Kwaŋin komudia Simuri ekek loka Baasa kere, kwape ajaar akirot naka EJAKAIT, naabu kiner kama ka Yeku enabi aluikin Baasa.

¹³ Kanuka aronisio kere nuka Baasa, ka aronisio nuka Ela okokuke, nuapotu kodiakasi, nuetidiakariata Isirael, aitunyunyurikin EJAKAIT, Edeke loka Isirael kakamameakakec.

¹⁴Aswamisio ace nuka Ela, ka kere nuabu kiswama, mam kereka iwadikatai oitabo loka aisiitonokin nuka ikabakan luka Isirael?

¹⁵ Kokaru loka akaisaarei ka lukanykaarei loka Asa ekabaka loka Yuda, kirumak Simuri adaun apaarasia akanykaarei koTirisa. Kidukuroto ituŋa asurokin Gib-beton, loarai loka Ipilisitian.

¹⁶Kopuputu ituŋa luedukuritos ebakai ebe, eneru Simuri, aar ekabaka da: kanuka ŋun kitarau Isirael kere Omuri, ekapolon loka ajore, ekabaka loka Isirael kapaaran kaŋin koidukurun.

¹⁷Konyou Omuri koGibeton, ka Isirael kere kaŋes, kirigaut Tirisa.

¹⁸ Kosodi kanen, keanyu Simuri ebe aŋatar ere, koloma toma abwas naka etogo loka ekabaka, kicweik etogo loka ekabaka kakim, kotwanik nen.

¹⁹ Kanuka akeronisio nuadiaki ŋesi kotoma aswam nueroko kakonyen nuka EJAKAIT, alosenen korot loka Yeroboam, kakeronis naadiaki ŋesi, aitidiakaria Isirael.

²⁰Aswamisio ace nuka Simuri, ka akebilakin ebotet, mam kereka iwadikatai oitabo loka aisiitonokin nuka ikabakan luka Isirael?

²¹ Kosodete ituŋa luka Isirael atiak kotoma atutubeta aarei: kotupa atutubet naka ituŋa Tibuni okoku loka Ginat, aitaraun ŋes ekabaka; kotupa atutubet Omuri.

²²Konye apotu ituŋa luatuparete Omuri kipikosi ituŋa luatuparete Tibuni okoku loka Ginat: kotwana Tibuni, kirum do Omuri.

²³Kokaru loka akaisauni ka lodiopet loka Asa ekabaka loka Yuda, kogeu Omuri airum Isirael, kirumak ikar itomon ka luarei: kirumak koTirisa ikar ikanykape.

²⁴ Kogwel eukot Samaria kama ka Semer katalatan aarei nuka epuesa; koduk oukot, komaik ere loaduki ŋesi Samaria, kwape araar ekiror loka Semer elopet eukot.

²⁵ Kiswama Omuri nueroko kakonyen nuka EJAKAIT, kiswama aronis adepar kere lukegeikinete ŋes.

²⁶ Naarai kolosenenei korot loka Yeroboam okoku loka Nebat, kakeronisio nuetidiakaria Isirael, aitunyunyurikin EJAKAIT, Edeke loka Isirael, kakamameakakec.

²⁷Aswamisio ace nuka Omuri nuabu kiswama, ka akegogoŋ naabu kitodu, mam kereka iwadikatai oitabo loka aisiitonokin nuka ikabakan luka Isirael?

²⁸Kojotoor do Omuri kalukapapaake, aponi kidaikinai Samaria: kirum Akab okokuke aiboisike.

²⁹Kokaru loka akaisauni ka lukanykauni loka Asa ekabaka loka Yuda kogeu Akab okoku loka Omuri airum Isirael: kirumak Akab okoku loka Omuri Isirael koSamaria adaun ikar akaisaarei ka luarei.

³⁰Kiswama Akab okoku loka Omuri nueroko kakonyen nuka EJAKAIT adepar kere lukegeikinete ŋes.

³¹ Kosodi kanen, kosubite akirot bala nakebenenikinit ŋes tape elosenenei karonisio nuka Yeroboam okoku loka Nebat, komany Yesebel akoku naka Etibaal ekabaka loka Isidonin, kolot kijaanak Baal, komaenenei ŋes.

³² Kosipok etem loka Baal togo loka Baal, lokedukit ŋesi Samaria.

³³ Kiswama Akab Asera; kiyatak Akab aitunyunyurikin EJAKAIT, Edeke loka Isirael adepar ikabakan kere luka Isirael lukegeikinete ŋes.

³⁴ Kapaarasiake koduk Kiel Ebet-elit Yeriko: kopesik apetetait kotwania ekiyaike Abiram, kosipok ikekia kotwania eŋooritike Segub; kwape ajaar akirot naka EJAKAIT, naabu kiner kama ka Yosua okoku loka Nun.