Read Ateso 1 Ikabakan 17 Bible Online

1 Ikabakan 17 - Ateso bible

1 Ikabakan 17

¹ Kosodi Eliya Etisibit, lokerai loka lukiboiororos koGilead, kotema Akab atiar, “Kwape ejaria EJAKAIT Edeke loka Isirael, loabwoi eoŋ kakonyeneke, mam ejaununete akopyo, karaida akiru kotoma okaru kalu, dimikito kwape ejaar akakirot.”

²Kobu akirot naka EJAKAIT mamake ebe,

³“Konyou kane, kibelokin kolot kide, koŋop kaguurut Keris naiteos ka Yorodan.

⁴ Kosodi kanen imasenenei akipi nuka aguurut; ido ecorak ikuruka aitanyamenen jo kaŋina.”

⁵Kolot kiswama kwape ajaar akirot naka EJAKAIT: naarai abu kolot kiboikin ariri kaguurut Keris, naiteos ka Yorodan.

⁶Kosodete ikuruka koinununete ŋes inyamat ka akiriŋ tupuruc, ka inyamat ka akiriŋ eboŋ; komasenenei da akipi nuka aguurut.

⁷Kosodi kanen ketubor apak koonik aguurut, kanu amamear akiru kakwap.

⁸Kobu akirot naka EJAKAIT mamake ebe,

⁹ “Konyou kolot Sarapet, loka Sidon, kiboie kaŋina; koany, ecorak apuserut naka ŋina aitanyamenen jo.”

¹⁰ Kosodi konyou, kolot Sarapet: ido nakedolio orute loka ere, koany, kojai apuserut erarai akito; konyarau ŋes, kobala ebe, “Keŋaiŋait koomikinai adisikipi kibore, kamat.”

¹¹Konye napelosi aomare, konyarau ŋes, kobala ebe, “Keŋaiŋait, koinunai idionyamat kakanikon.”

¹² Kobala ŋesi ebe, “Kwape ejaria EJAKAIT Ekonideke, emameete eoŋ inyamat, dimarai ikiria adiopekan ejaas amot, ka idiokinyet katany; ido koany, edepuni akito aarei, kaloma kepou eoŋ ka ikakoku, kanyama, kedenyiata atwakare.”

¹³ Kotema Eliya atiar, “Sirikiyoŋ; kolot kiswama kwape ibalar; konye kogeu ber aipoikin eoŋ idionyamat koinu, kokau kipou ijo alopet ka ikonikoku.

¹⁴ Naarai ebala kwanata EJAKAIT, Edeke loka Isirael ebe, ‘Mam iŋoŋar amot naka akiria, karaida akinyet nakatany mam edaun, aitodol apaaran naisitepia EJAKAIT akiru akwap.’ ”

¹⁵ Kosodi kolot kiswama kwape ebalar Eliya: ŋes alopet, ka ŋes, ka lukotogoke, konyamata apaarasia nuipu.

¹⁶ Mam abu kiŋoŋar amot naka akiria, karaida akinyet nakatany mam abu kodaun, kwape kejaar akirot naka EJAKAIT, nakinera kama ka Eliya.

¹⁷Kosodi kanen kokau kaŋun kodekakin okoku loka aberu, alopet etogo; kinyikok noi adekake, komam bobo iyeŋa.

¹⁸ Kotema ŋesi Eliya atiar, “Kimariai eoŋ inyo kajo, ijo etuŋanan loka Edeke? Ibu mama ajai aisiitun akaronis, ka aiar okokuka!”

¹⁹Kotema ŋes atiar, “Ae okokukon.” Kodak katorobuke, kodokaria agola nakokuju naeboionono, kiperik aperisike elopet.

²⁰ Komonyak EJAKAIT, kobala ebe, “Wu EJAKAIT, Ekadeke, iyaŋau aronis mama ejai apuserut nakesiperi, kanuka aiar okokuke?”

²¹ Korionor irwan auni kama ejai ikoku, komonyak EJAKAIT, kobala ebe, “Wu EJAKAIT, Ekadeke, keŋaiŋait, Koboŋok bobo aijar naka ikoku kayen tomakeŋ.”

²² Kiira EJAKAIT eporoto loka Eliya; Koboŋok bobo aijar naka ikoku tomakeŋ, kikwar.

²³Kodaku Eliya ikoku, kijesunor kagola koyau togo, koinak totoke: kotema Eliya atiar. “Koany, ejari do okokukon.”

²⁴ Kotema aberu Eliya atiar, “Ajenu do kwana kwape iraar ijo etuŋanan loka Edeke, ido akirot naka EJAKAIT kaitukukon erai abeit.”