Read Ateso 1 Ikabakan 18 Bible Online

1 Ikabakan 18 - Ateso bible

1 Ikabakan 18

¹ Kosodi kanen ketuboros apaarasia nuipu, kobu akirot naka EJAKAIT mama ejai Eliya, kokaru lokiwuniet, ebala ebe, “Kolot kitodikin mama ejai Akab; etetepikini eoŋ akiru akwap.”

²Kosodi Eliya alosit aitodiar mama ejai Akab. Kodeden noi ebeli ko Samaria.

³ Konyarau Akab Obadia loapolokinit ekal. (Keyoŋit Obadia EJAKAIT noi:

⁴ Naarai, nakemudiaria Yesebel inabin luka EJAKAIT, kituku Obadia inabin akwatat, kibwa kes akaisakany akaisakany kotoma abua, kitanyamenenei kes inyamat ka akipi.)

⁵Kotema Akab Obadia atiar, “Kimaniman akwap, neejaas atanin kere nuka akipi, ka neejaas aguuruto kere: elemuni kipedori adumun anya aitajar ibalasin ka inyubun, kinyeis atwakiar itiaŋ kere.”

⁶Kotiakata akwap aimaniman: kolot Akab orotoke bon, kolot Obadia da orotoke bon ece.

⁷Kejai Obadia orot, koany, kiriamas kEliya: kojenu ŋes, kibiror ebuburia, kotema atiar, “ŋes ijo, Eliya ekajakait?”

⁸Koboŋok ŋes ebe, “ŋes eoŋ: kolot, kolimok ekonijakait ebe, ‘Koany, ejai Eliya ne.’ ”

⁹Kotema atiar, “Anu bo adiakarit eoŋ, tape jo ijaikini ekonikejaanakinan akan naka Akab, aiar eoŋ?

¹⁰Kwape ejaria EJAKAIT Ekonideke, emamei ateker karaida ajakanut, namam ejakaitika ijukarit amoote jo: naketemariata atiar, ‘Emamei ŋesi kane,’ kisiyapoi lukajakanut kaŋin ka lukateker kaŋin ebe mam kianyunito jo.

¹¹Kwana da ibala ijo ebe, ‘Kolot, kolimok ekonijakait ebe, “Koany, ejai Eliya ne.” ’

¹² Ejaun do atipet naanyounio kamakon, kidakari emoyo loka EJAKAIT jo nemam eoŋ da ajeni; kosodi do naalimokinia Akab, komam ŋes epedori adumun jo, kaari eoŋ: konye eoŋ ekonikejaanakinan ayoŋit EJAKAIT ameun keiditeuka.

¹³Mam aponi kolimokinai ekajakait nuabu eoŋ keswama nakearia Yesebel inabin luka EJAKAIT, kwape abu kebwaia ituŋa akwatat luka inabin luka EJAKAIT akaisakany, akaisakany kotoma abua, ketanyamenenei kes inyamat ka akipi?

¹⁴Kwana da ibala ijo ebe, ‘Kolot, kolimok ekonijakait ebe, Koany, ejai Eliya ne’: kaari ŋesi eoŋ.”

¹⁵Kotema Eliya atiar, “Kwape ejaria EJAKAIT loka ajoresio, loabwoi eoŋ kakonyeneke, abeit etodikin lolo eoŋ mamakeŋ.”

¹⁶Kosodi Obadia alosit airiamakin ka Akab, kolimok ŋes: kolot Akab airiamakin kEliya.

¹⁷ Kosodi kanen, keanyu Akab Eliya, kotema Akab ŋes atiar, “ŋes ijo, ijo eketicanan loka Isirael?”

¹⁸ Koboŋok ŋesi ebe, “Mam eoŋ eticanit Isirael; dimarai ijo, ka ekek loka papakon, naarai ijalata aicorakineta nuka EJAKAIT, ido itupa Ibaalim.

¹⁹ Aso do kijuka, kotukok Isirael kere mama ajai, moru Karamel, ka inabin luka Baal akwat aoŋon ka akaisakany, ka inabin luka Asera akwat aoŋon, luenyamete komesa loka Yesebel.”

²⁰ Kosodi Akab kijuka mama ejaas idwe kere luka Isirael, kotukok inabin moru Karamel.

²¹ Kikunyak Eliya ituŋa kere, kotema atiar, “Itodolete ai yesi icodoete kaomisio aarei? Arai kerai EJAKAIT Edeke, kotupasi ŋes: konye arai Baal, kotupasi ŋes.” Mam ituŋa apotu koboŋokisi ŋes akirot.

²² Kosodi Eliya atemar ituŋa atiar, “Eoŋ, eoŋ bon asal, enabi loka EJAKAIT: konye inabin luka Baal eraas ituŋa akwat aoŋon ka akaisakany.

²³Aso koinakis kesi oni imoŋin iarei; koseutu kesi ediopemoŋ kanukec, kotubutuboto, kipetipetata akito, ido mam ibwaikinete akim kwap; etemokini eoŋ locemoŋ, epesipesi akito, ido mam ebwaikini akim kwap.

²⁴ Kiwoneoto yesi ekiror loka ekusideke, eoŋ da ewonei ekiror loka EJAKAIT: Edeke da loeboŋokini kakim, korau ŋesi Edeke.” Koboŋokis ituŋa kere ebe, “Iner ejok.”

²⁵Kotema Eliya inabin luka Baal ebe, “Koseutu yesi emoŋ ediopet kanukus, kogeutu yesi aitemokin; naarai ipu yesi; kiwoneoto ekiror loka edekekus, konye mam ibwaikinete akim kwap.”

²⁶ Koyaasi do emoŋ loainakinitai kes, kitemokis ŋes, kiwoneoto ekiror loka Baal ageun tupuruc kiton paaran, ebe, “Wu Baal, kiirarai sio.” Konye amamei eporoto, karaida yenaboŋokini. Kosomanaros airimor etem loeswamatai.

²⁷Kosodi kanen kidiŋ paaran, kokienar Eliya kes, kotema atiar, “Kiworoto noi; naarai ŋes edeke; arai eomoomoi ŋesi, apaa ŋesi, arai ejai orot, arai diat ejotoi, ibusakinit aitwekenyunio.”

²⁸ Kiworoto noi, koduŋuduŋos bonik, kikileŋa ka akwaras kwape ajaar ekecepone, aitodol naaleleuniata aokot kamakec.

²⁹ Kosodi ketubor kidiŋ paaran, apotu komurwoto aitodol apak naka ainakin ainakinet naka aboŋ; konye amamei eporoto karaida yenaboŋokini, karaida yenebwaikinit etau.

³⁰Kotema Eliya ituŋa kere atiar, “Kikunyutu mamaka.” Kikunyakisi ituŋa kere mamakeŋ. Kiteteu etem loka EJAKAIT loacakakinitai kwap.

³¹ Kolem Eliya amor atomon ka nuarei kwape ajaar etiai loka atekerin nuka odwe luka Yakob, loabu akirot naka EJAKAIT kobu mamake ebe, “Isirael ŋes eraun ekonikiror.”

³² Koduk etem kamor kaŋun kokiror loka EJAKAIT: kitoito aipany airimor etem, etiai loepedor aisilosikin aitemisio aarei nuka ikinyom.

³³ Kinapanak akito, kotubutub emoŋ, kipetipet akito. Kotema atiar, “Kilelebata ipipai iwoŋon luka akipi, kobukokisi ainakinet naicweio, akito da.”

³⁴Kotema atiar, “Kiareikisi”; kiareikis. Kotema atiar, “Kiuniikisi”; ido kiuniikis.

³⁵Koleleata akip airimor etem; kileleb aipany da akipi.

³⁶ Kosodi kanen kapak naka ainakin ainakinet naka aboŋ, kikuny enabi Eliya, kotema atiar, “Wu EJAKAIT, Edeke loka Aburaam, ka Isaak, ka Isirael, kojenunai lolo ebe irai ijo Edeke loka Isirael, ka eoŋ da ekonikejaanakinan, eswama eoŋ akiro nu kere kakirotokon.

³⁷ Kopupunoi eoŋ, WU EJAKAIT, kopupunoi, kojenut ituŋa lu ebe ijo EJAKAIT irai Edeke, isibeloki da ikecetauon aboŋun bobo.”

³⁸ Kosodi akim naka EJAKAIT adoere, kidopo ainakinet naicweio, ka akito, ka amor, ka apua, kimiela akipi kere nuajaas toma aipany.

³⁹Keanyutu ituŋa kere, kibiroros ebuburia; kotemasi atiar, “EJAKAIT, ŋes Edeke; EJAKAIT, ŋes Edeke.”

⁴⁰ Kotema Eliya kes atiar, “Kikamutu inabin luka Baal; kinyek ediopet kakesi aiku.” Kikamutu kes: koyaŋa Eliya kes aguurut Kison, koarak kes ŋina.

⁴¹Kotema Eliya Akab atiar, “Konyou, konyam, komat; naarai ejai airurum naka akiru naepol.”

⁴² Konyou Akab ainyam ka aimat. Kodoka Eliya kuju Karamel; kisuded, kibwaik akouke kidiŋ akuŋinike.

⁴³ Kotema ŋesi ekekejaanakinan atiar, “Kolot, kiteluo aŋolol.” Kolot, kiteluo, kotema atiar, “Emamei ibore.” Kotema atiar, “Kolot bobo irwan akanykaarei.”

⁴⁴Kosodi kanen karwan nakikanyetekaarei, kotema atiar, “Koany, elomunit edou kaŋolol, edit bala akan naka ituŋanan.” Kotema atiar, “Kolot, kolimok Akab ebe, ‘Kitemok agalikon, kijesar, kinyek akiru aitikokin jo.’ ”

⁴⁵Kosodi kanen nediokasilon, kirionu akuj idouon ka ekwam, kotep akiru naepol noi. Kiboikin Akab agalike, kolot Yesereel.

⁴⁶ Kojai akan naka EJAKAIT mama ejai Eliya; koen aŋabeteke, koker koiŋaren naka Akab kiton orute loka Yesereel.