Read Ateso 1 Ikabakan 20 Bible Online

1 Ikabakan 20 - Ateso bible

1 Ikabakan 20

¹ Kotukonok Ben-kadad ekabaka loka Suria akejore kere: kejaas ikabakan akaisauni ka luarei kaŋes, ka ibalasin, ka agalin: kolot kirigau Samaria, kitiji.

²Kijuka ikiyakia mama ejai Akab ekabaka loka Isirael, ore, kotema ŋes atiar, “Inera Ben-kadad kwanata, ebe.

³Epuesakon ka esabukon eraas lukaŋ: akoniŋor da ka ikonidwe, lukajokak, eraas lukaŋ.”

⁴ Koboŋok ekabaka loka Isirael atiar, “Kwape ejaar akonikirot, ekajakait, wu ekabaka; arai eoŋ lokon, ka lukijaar eoŋ kere.”

⁵Koboŋut ikiyakia bobo, kotemasi atiar, “Inera Ben-kadad kwanata ebe, Abeit abu kejukak jo ebe, Kijaikini ijo eoŋ ekonipuesa ka esabukon, ka akoniŋor, ka ikonidwe;

⁶Konye ejukuni eoŋ ikakejaanakinak mama ijai ijo moi, kwape kapak kana, irereete kesi kotogokon, kotogoi da luka ikonikejaanakinak; kosodi ibore kere yenejokuna kakonyenekon, ikamunete kakecekanin eyaŋaarete.”

⁷ Kosodi ekabaka loka Isirael anyaraun imakio kere luka akwap, kotema atiar, “Keŋaiŋait, kojenutu, koanyutu da kwape kilokitor ekesa ŋol oni: naarai abu ŋesi kejukak eoŋ ebe kerumia akaŋor, ka ikadwe, ka ekapuesa, ka ekasabu; mam abu kaŋerok.”

⁸Kotemasi imakio kere ka ituŋa kere ŋes atiar, “Sirikiira, karaida acamun.”

⁹Kanuka ŋun kotema ŋesi ikiyakia luka Ben-kadad ebe, “Kolimokis ekajakait ekabaka ebe, Eswamai eoŋ ŋun kere nusodit nuijukunitor ijo ekonikejaanakinan: konye akirot na mam apedori.” Koloto ikiyakia, kinyakakis ŋes akirot.

¹⁰ Kijuka Ben-kadad mama ejai ŋesi, kotema atiar, “Keswamakis idekesio eoŋ kwaŋin ka adepar da, arai kilosikin apua naka Samaria aileleb akanin nuka ituŋa kere lukatupitos eoŋ.”

¹¹ Koboŋok ekabaka loka Isirael atiar, “Kolimok ŋes ebe, Kinyek loekapanakini lujiisike aiturokin bon kwape ŋol loelacari kes.”

¹² Kosodi kanen, kepupu Ben-kadad akiro ŋun, naamatatar, ŋes ka ikabakan, koswamin, kotema ikekejaanakinak atiar, “Kiderakinos.” Kiderakinos aitiji ere.

¹³ Ido koany, kikunyak enabi Akab ekabaka loka Isirael kotema atiar, “Inera EJAKAIT kwanata ebe, Iany ijo ekodet lo lokapolon kere? Koany, ejaikini ŋes akanikon lolo; ijenuni ebe Eoŋ EJAKAIT.”

¹⁴Kotema Akab ebe, “Lukaŋai bo?” Kotema atiar, “Inera EJAKAIT kwanata ebe, Ikatumunak luka ikapolok luka ibukui.” Kosodi ŋesi atemar ebe, “Iŋai bo egeuni ejie?” Koboŋok ebe, “Ijo,”

¹⁵Kosodi kimar ikatumunak luka ikapolok luka ibukui, emwaasi akwat aarei ka akaisauni ka luarei: akaulo abu kimar ituŋa kere, kes idwe kere luka Isirael, emwaasi ilukumin ikanykaarei.

¹⁶ Kolomasi kidiŋ paaran. Konye komata Ben-kadad koswamin, komera, ŋes ka ikabakan, kes ikabakan akaisauni ka luarei lukinarakinito ŋes.

¹⁷Kogeutu ikatumunak luka ikapolok luka ibukui alomar; kijuka Ben-kadad, kolimokinai ŋes ebe, “Alomut ituŋa ko Samaria.”

¹⁸ Kotema atiar, “Arai elomunitos kainapakina, kikamutu kes ejarete; arai elomunitos ejie, kikamutu kes ejarete.”

¹⁹Kolomasi kesi kiŋa naka ere, ikatumunak luka ikapolok luka ibukui, ka ajore naatupit kes.

²⁰ Koar ŋinituŋanan eketuŋanan; kokerata Isurian, korukitor Isirael kes: koku Ben-kadad ekabaka loka Suria kebalasit ka ikebwanenok.

²¹Koloma ekabaka loka Isirael, kodany ibalasin ka agalin, koar Isurian kearit loepol.

²² Kikunyak enabi ekabaka loka Isirael, kotema ŋes atiar, “Kolot, kicat, kojen, koany da nuiswamai: naarai kedolu ekaru ebuni ekabaka loka Suria asurokin jo.”

²³ Kotemasi ikejaanakinak luka ekabaka loka Suria ŋes atiar, “Erai Edekekec Edeke loka iukon; kanuka ŋun agogoŋ kesi aitelekar oni: konye kajioto kakes kapuuton, abeit cut kigogoŋoor oni da aitelekar kes.

²⁴ Kiswama akirot na; kolema ikabakan, ŋinituŋanan kaiboisike, kibwaikikayaitok aiboisiokec:

²⁵Kimar ijo ajore, kwape kajore naibu kotwania, ebalasit aibois kebalasit, agali aibois kagali; kijio kakes kapuuton, abeit kigogoŋoor oni aitelekar kes.” Kiira ŋesi ekeceporoto, kiswama kwaŋin.

²⁶ Kosodi kanen kedoki ekaru, kimar Ben-kadad Isurian, kolot Apek, ejie kaIsirael.

²⁷ Aponi kimarai idwe luka Isirael, koinakinai kes inyamat, koloto ejie kakes: kidukuroto idwe luka Isirael koiŋarenekec kwape isipanin iarei luedisiak luka ikalei; konye kilosikinos Isurian akwap.

²⁸ Kikunyak etuŋanan loka Edeke kotema ekabaka loka Isirael atiar, “Inera EJAKAIT kwanata ebe, Naarai abalasi Isurian ebe, Erai EJAKAIT Edeke loka iukon, konye mere Edeke loka aditon: kanuka ŋun ŋes ejaikinia ekodet lo kere loepol akanikon, ijenunete yesi ebe Eoŋ EJAKAIT.”

²⁹Kidukuroto kiteosi apaarasia akanykaarei. Kosodi kapaaran nakikanyetekaarei kiriama ejie: kapaaran adiopet koarata idwe luka Isirael Isurian ituŋa ilukumin akwatat lukelosete kakeje.

³⁰Konye kokera luedeunos Apek, toma ore; kibirokin arwatat ituŋa ilukumin akaisaarei ka lukanykaarei luedeuna. Koker Ben-kadad, koloma ore, agola nakotoma.

³¹ Kotemasi ikekejaanakinak ŋes atiar, “Koany do, kipupu ebe ikabakan luka ekek loka Isirael eraas ikabakan luketimok: kiŋaiŋait, kanapa ipukoi kaŋabesiwok, aunoi da kakwesiwok, kalomasi mama ejai ekabaka loka Isirael: elemuni kitajar ŋesi akoniijar.”

³²Koenata do ipukoi aŋabesikec, aunoi da akwesikec, kopotu mama ejai ekabaka loka Isirael, kobalas ebe, “Ebala ekejaanakinanikon Ben-kadad ebe, Keŋaiŋait, kisiikinai kajar.” Kotema atiar, “Eriŋa ŋes ejari? Erai onaceka.”

³³Kosodete ituŋa aiŋic noi, kisunyas ajenun arai ikote nen akeomisio; kotemasi atiar, “Onacekon Ben-kadad.” Kosodi ŋesi atemar atiar, “Koloto koyautu ŋes.” Kosodi Ben-kadad alomun neejai ŋesi; kitodokik ŋes agali.

³⁴ Kotema Ben-kadad ŋes atiar, “Kenyakakini jo ireria luabu papaka kodemarite papakon; itemokini irotin koDamasiko kwape kolo kitemokinio papaka koSamaria.” Kobala Akab ebe, “Eoŋ da kaosikini jo kaitutuket kana.” Kitutuko kaŋes aitutuket, koosik.

³⁵ Kotema ediopetuŋanan kodwe luka inabin aupake kakirot naka EJAKAIT atiar, “Kimusuŋai eoŋ, keŋaiŋait.” Koŋer etuŋanan aimusuŋ ŋes.

³⁶ Kosodi ŋol atemar ŋes atiar, “Naarai mam jo irimarit iporoto loka EJAKAIT, koany, atipet napinyounio ijo kamakaŋ, kiari eŋatuny jo.” Ido atipet napanyounio kamakeŋ, kodum eŋatuny ŋes, koar.

³⁷Kosodi ŋol adumun ecetuŋanan, kotema atiar, “Kimusuŋai eoŋ, keŋaiŋait.” Kimusuŋ etuŋanan ŋes, kicum, kimusuŋ.

³⁸Konyou do enabi, kidareu ekabaka korot, kitegelikin bon kiswap akonyeke kaenet naka akou.

³⁹ Nakitorio ekabaka, kiworou ŋol ekabaka; kotema atiar, “Abu ekonikejaanakinan koloma kidiŋ ojie; ido koany, abu etuŋanan kopau, koyau ecetuŋanan mamaka kotema atiar, ‘Kidar etuŋanan lo: arai keolio, ŋes konyet ejaunia akoniijar aibois kaijarake, arai bo itaci ijo atalata naka epuesa.’

⁴⁰ Naelolitor ekonikejaanakinan lailo ka laije da, kosii etuŋanan.” Kotema ekabaka loka Isirael ŋes atiar, “Kitubokinio jo kwaŋin; ijo elopet icam.”

⁴¹Kisunya ŋesi, kolaca aenet naka akou kakonyeke; kojen ekabaka loka Isirael ebe erai ŋesi ediopet konabin.

⁴² Kotema ŋes atiar, “Inera EJAKAIT kwanata ebe, ‘Naarai ibu koosik kakanikon etuŋanan loabu eoŋ kagita amudiar, kanuka ŋun egeli aijarakon aijarake, ikonituŋa da itia ituŋake.’ ”

⁴³ Kolot ekabaka loka Isirael oreke ekadakinit, konyunyura, kobu Samaria.