Read Ateso 1 Ikabakan 3 Bible Online

1 Ikabakan 3 - Ateso bible

1 Ikabakan 3

¹ Kiticatai ajakanut kakan naka Solomon. Korau Solomon ekamuran loka Parao ekabaka loko Misiri, koyaŋa akoku naka Parao, koyau ŋes ore loka Daudi, aitodol nekedaunia aiduk eketogo, ka etogo loka EJAKAIT, ka arwatat naka Yerusalem airimor.

² Konye apotu ituŋa koinakis asuban kaiboisio nuiceleleete, naarai mam ber adukokinitai ekiror loka EJAKAIT etogo kiton apaarasia ŋun.

³ Komina Solomon EJAKAIT, kolosenenei kokisila luka Daudi papake: konye abu koinak asuban, kisupuruuni da lukisupurununio kaiboisio nuiceleleete.

⁴ Kolot ekabaka Gibeon ainakin asuban kaŋina; naarai kerai ŋin aibois naicelelei nakapolon: abu Solomon koinak ainakineta nuicweio alukumit kotem kaŋol.

⁵ Kitaanyikin EJAKAIT Solomon koGibeon kotoma airujasit kuare: kotema Edeke atiar, “Kilipai nakainakini jo.”

⁶ Kotema Solomon atiar, “Ibu ijo kitodik ekejaanakinanikon Daudi papaka asianut naepol, kwape aloseneneo kakonyenekon kabeit, kadolit, ka etau loetenara kamakon; kiŋadakinit ijo ŋes asianut na naepol, koinak ŋes okoku aiboikin oicoloŋoke loka ajakanut, kwape ejaar lolo.

⁷ Kwana da, wu EJAKAIT Ekadeke, idakak ijo ekejaanakinanikon araun ekabaka aibois naka Daudi papaka: arai eoŋ ikoku yenididi; mam ajeni alomar karaida alomun.

⁸ Ejai da ekejaanakinanikon kidiŋ otuŋakon luibu koseu, ituŋa luipu lumam epedorio aimar karaida aibil kes kanuka aipues.

⁹ Aso koinak ekejaanakinanikon etau lokapirianut atubokin ikonituŋa, tetere atiaki eoŋ ajokis ka aronis; naarai iŋai epedori atubokin ikonituŋa lu luipu?”

¹⁰Kitojok EJAKAIT akirot ŋin naelipit Solomon.

¹¹ Kotema Edeke ŋes atiar, “Naarai ilipit ijo akirot ŋin, komam ilipit aibut ikar luipu; karaida ailip abar, karaida ailip aijar naka lukasurupokon; konye ilipit apirianut aitiak itubesia;

¹² Koany, eswama kwape ejaar akonikirot; koany, kainak jo etau lokacoa ka apirianut; emamei lem sek loeriakas kajo, mam da enyouni ece atupakin jo loeriakakinos kajo.

¹³ Kainak da numam jo ilipit, abar, ka ayoŋio, mam ejaunos kokabakan lueriakuunete kajo apaarasiakon kere.

¹⁴ Ido arai ilosenenei korotinika, koricenenei ikakisila ka aicorakinetaka, kwape aloseneneo Daudi papakon, ŋes konyet eyatakinia apaarasiakon.”

¹⁵ Kokweny Solomon, ido koany, kerai airujasit: kobu Yerusalem, kobwo koiŋaren kasaduku naka aitutuket naka EJAKAIT, koinak ainakineta nuicweio, koinak ainakineta nuka ainapakin, kipoik ikejaanakinakake kere epucit.

¹⁶ Kosodi do kopotu aŋor aarei, nukeraas nudotia, mama ejai ekabaka, kobwaata kakonyeneke.

¹⁷Kobala aberu adiopet ebe, “Wu ekajakait, kiperi eoŋ ka aberu na ediopetogo; abu eoŋ kedou ikoku kojai ŋesi da togo.

¹⁸Kosodi kanen, ketuboros apaarasia auni nakadau aidoun, kidoun aberu na da; kija isio nepepe; komamei icetuŋanan kasio kotogo, dimarai isio aarei bonik kotogo.

¹⁹Kotwana ikoku yenika aberu kana kuare; naarai abu ŋesi kicikak.

²⁰Konyou ŋesi kidiŋebai, koyaŋa ikakoku kosiepika nakejotoo akejaanakinanikon, kiperik atorobuke, kiperik ikokuke yenatwanit atorobuka.

²¹Naanyounia eoŋ tupuruc aitanak ikakoku, koany, etwanit: konye kadau airere ŋes tupuruc, koany, mam arai ikakoku, yenauriei eoŋ.”

²²Kotema aberu ace atiar, “Mam; konye yenikajaran ŋes ikakoku, ka yenikatwan erai ikonikoku.” Kotema ya da ebe, “Mam; konye yenikatwan erai ikonikoku, ka yenikajaran ŋes ikakoku.” Kineras kwaŋin kakonyen nuka ekabaka.

²³Kosodi ekabaka atemar atiar, “Ebala adiopet ebe, ‘Yen ŋes ikakoku yenejari, ikonikoku da yenetwanit’: ka nace da ebala ebe, ‘Mam; konye ikonikoku yenetwanit, ka ikakoku yenejari.’ ”

²⁴Kotema ekabaka atiar, “Koomikinai ekileŋ.” Koinut ekabaka ekileŋ.

²⁵Kotema ekabaka atiar, “Kotiak ikoku yenejari irwan aarei, koinak adiopet atutubet ka nace da atutubet.”

²⁶ Kosodi aberu nakerai ikoku yenejari yenike einer kekabaka, naarai arieba noi eketau ikekoku, kotema atiar, “Wu ekajakait, koinak ŋes ikoku yenejari, konye sirikiar ŋes.” Konye kobala nace ebe, “Mam eraun yenika, karaida yenikon; kotiak ŋes.”

²⁷Kosodi ekabaka aboŋokin ebe, “Koinak ŋin ikoku yenejari, konye sirikiar ŋes: ŋin ŋes totoke.”

²⁸ Kopup Isirael kere nuka etube loatubi ekabaka; koyoŋito ekabaka; naarai apotu koanyut ebe ejai acoa naka Edeke kaŋes airab.