Read Ateso 1 Ikabakan 4 Bible Online

1 Ikabakan 4 - Ateso bible

1 Ikabakan 4

¹Kerai Solomon ekabaka loka Isirael kere.

²Lu kes ikapolok luajaas kaŋes; Asaria okoku loka Sadok, esasedoti;

³ Elikorep ka Akiya, odwe luka Sisa, ikalanin; Yekosapat okoku loka Akilud, ekesiitonokinan.

⁴ Kopolokinite Benaia okoku loka Yekoiada ajore; keraas Sadok ka Abiatar isasedotin.

⁵ Kopolokinite Asaria okoku loka Natan ijaka; kerai Sabud okoku loka Natan esasedoti, epapero loka ekabaka.

⁶ Kopolokinite Akisar lukokal: kopolokinite Adoniram okoku loka Abuda esolo.

⁷Kejaas Solomon ijaka itomon ka luarei luapolokinito Isirael kere, luadumanakinete ekabaka ka lukokaleke inyamat: ebusakinit ŋinituŋanan ayaunun inyamat ediopelap ŋolikaru.

⁸Lu kes ikiroriakec: Ben-kur, kakwap nakiukon naka Epuraim:

⁹Ben-deker, koMakas, ka Saalubim, ka Betsemes, ka Elon-bet-kanan:

¹⁰Ben-kesed, koArubot; ewaike Soko, ka akwap kere naka Keper:

¹¹Ben-abinadab, kakwap kere naicelelei naka Dor; amanyit ŋesi Tapat akoku naka Solomon:

¹²Baana okoku loka Akilud, koTaanak ka Megido, ka Bet-sean kere naedunyas ka Saretan, kwap Yesureel, anyoun koBet-sean kiton Abel-mekola adepar juwai Yokumeam:

¹³ Bengeber, koRamot-gilead; ewaike ireria luka Yair okoku loka Manase, luejaas koGilead; ewaike akwap naka Arugob, naejai Basan, ireria akaisakanykape lukapolok lukejaas arwatatin ka itiketa luka aisinit.

¹⁴Akinadab okoku loka Ido, koMakanaim.

¹⁵Akimaas, koNaputali; amanyit ŋesi Basemat akoku naka Solomon.

¹⁶Baana okoku loka Kusai, koAser ka Bealot.

¹⁷Yekosapat okoku loka Parua, koIsakar.

¹⁸Simei okoku loka Ela, koBenyamin.

¹⁹ Geber okoku loka Uri, kakwap naka Gilead, akwap naka Sikon ekabaka loka Imorain ka naka Og ekabaka loka Basan; kerai ŋesi ejakait ediopet bon kakwap.

²⁰ Epu Yuda ka Isirael, kwape asiŋe naejai ariri naka aŋolol kaipues, enyamete, emasete, elakanaros.

²¹ Kirum Solomon ajakanuto kere anyoun koCor kiton akwap naka Ipilisitian, kiton oikor da loko Misiri: koyaununete ainakineta, kijaanakis Solomon apaarasia kere nuka aijarake.

²²Inyamat luka Solomon luka adiopepaaran keraas aitemisio akaisauni nuka akiria nuidicic, ka aitemisio akaisakanykape nuka akiria;

²³Imoŋin itomon luetumito, ka imoŋin akaisaarei lukoronyia, ka amerekekin akwatat, kogelara amiamia, amorio ka imalin ka akweny nuetumito.

²⁴ Naarai abu kirum akwap kere kiton oCor Eupurat, anyoun koTipisa kiton Gasa, ikabakan da kere kiton oCor Eupurat: kejai ainapakin owaitin kere airimor ŋes.

²⁵ Kiboie Yuda ka Isirael inapakina, ŋinituŋanan kwap kemusabibuke ka etinike, anyoun koDan kiton Beer-seba, apaarasia kere nuka Solomon.

²⁶ Kejaas Solomon agolai alukumin akaisaoŋon nuka ibalasin luka agalinike, ka ikebwanenok ilukumin itomon ka luarei.

²⁷Apotu ijaka ŋul kodumanakinete ekabaka Solomon inyamat, nepepe kaŋul kere da luapote omesa loka ekabaka Solomon, ŋinituŋanan olapake: mam ibore kere yenabu kokurwok.

²⁸ Koyaununete da esairi, ka anya nuka ibalasin ka ibalasin luetiroko noi aibois nakejaas ijaka, ŋinituŋanan kwape ketubokinitere.

²⁹Abu Edeke koinak Solomon acoa ka ajenun naepol noi noi, ka apoloor naka etau, kwape kasiŋe naejai ariri naka aŋolol.

³⁰ Kiteleka acoa naka Solomon acoa naka idwe kere lukoto, ka acoa kere da nako Misiri.

³¹ Naarai aco ŋesi aitelekar ituŋa kere; aitelekar Etan Eserakit, ka Keman, ka Kalukol, ka Darada, odwe luka Makol: kisiarakin eemutuke atekerin kere nuerimorito.

³² Kiner ŋesi awaragasia alukumin auni: emwaasi ikososineike elukumit ka ikany.

³³Kiner ŋesi nuka ikito, anyoun kores loejai Lebanon kiton esop Ioebwanuni karwatat: kiner da nuka itiaŋ, ka akweny, ka iboro lueliatos, ka iboro lukecor.

³⁴ Kopotu lukatekerin kere akiirar acoa naka Solomon, lukokabakan kere kere luka akwap, luapupunito nuka acoake.