Read Ateso 1 Ikabakan 5 Bible Online

1 Ikabakan 5 - Ateso bible

1 Ikabakan 5

¹ Kijuka Kiram ekabaka loka Turo ikekejaanakinak mama ejai Solomon; naarai kopup ebe aponi kinyonyoakinai ŋes akinyet araun ekabaka aibois naka papake: naarai aminenena Kiram Daudi.

² Kijuka Solomon mama ejai Kiram, kobala ebe,

³ “ijeni ijo kwape mam kepedoria papaka Daudi adukokin ekiror loka EJAKAIT Ekedeke etogo, kanuka ijiisio luerigaunito ŋes kaŋoliwai, aitodol neebwaikinia EJAKAIT kes kwap kakejeneke.

⁴ Konye kwana kesiyeŋ EJAKAIT Ekadeke eoŋ kaŋoliwai; emamei lokasurup, karaida aronis.

⁵ Ido koany, eneru eoŋ adukokin ekiror loka EJAKAIT Ekadeke etogo, kwape abalar EJAKAIT Daudi papaka ebe, ‘Okokukon, loesiboikini oicoloŋokon aiboisikon, ŋes edukokini ekakiror etogo.’

⁶ Aso do kicorak ijo kes ajepakin eoŋ ikito luka eres koLebanon; ejaununos ikakejaanakinak kikonikejaanakinak; kainakini eoŋ jo eropit loka ikonikejaanakinak kwape ejaatar nuinera ijo kere: naarai ijeni ebe emamei kotomakosi loepiriana aijep ikito kwape Isidonin.”

⁷Kosodi kanen, kepupu Kiram akiro nuka Solomon, kiyalamikin noi, kobala ebe, “Kituritete EJAKAIT lolo, loabu koinak Daudi okoku lokacoa airum ituŋa lu luipu.”

⁸Kijuka Kiram mama ejai Solomon ebe, “Apup ŋun nukijukakinit eoŋ: eswamaenenei nuikoto ijo kere nuka akito nuka eres, ka akito nuka eberos.

⁹ Eyaunete ikakejaanakinak kes koLebanon kiton aŋolol: etolosi kes eenen kikaleleos kaŋolol kiton aibois nakiseikini eoŋ, ecorakini kolacakinai ŋina, ijo da ijaun kes: ido itodoli ijo nuakoto kere arai kidumanak lukokaleka inyamat.”

¹⁰Kosodi Kiram koinak Solomon akito nuka eres ka akito nuka eberos kwape ejaar ekeipud kere.

¹¹ Abu Solomon da koinak Kiram aitemisio alukumin akaisaarei nuka akima araun inyamat luka lukokaleke, ka aitemisio akaisaarei nuka akinyet naecuunitai: koinanakini Solomon Kiram kwaŋin ŋolikaru.

¹² Abu EJAKAIT koinak Solomon acoa, kwape esumunio; kinapakinos Kiram ka Solomon; kitutukoto kesi kere iarei.

¹³Kitelem Solomon Isirael kere esolo; esolo ŋol emwaasi ituŋa ilukumin akaisauni.

¹⁴ Kijuka kes Lebanon, ŋolilap ilukumin itomon emeanakinos: kedaununete Lebanon elap ediopet, kosodi ore ilapio iarei: kopolokinite Adoniram esolo.

¹⁵Kejaas Solomon luebwokito abwokon ilukumin akaisakanykaarei, ka ilukumin akaisakanykauni luajepete koroŋan:

¹⁶Kogelara ijaka luka Solomon luapolokinito aswam, ilukumin iuni ka akwat auni, luayaito ituŋa lueswamaete aswam.

¹⁷Kicorak ekabaka, kobokata amor nuepolok, nuka akais nuipu, apetanakin apetetait naka etogo kamor nuikeitoi.

¹⁸Apotu ikadukok luka Solomon ka ikadukok luka Kiram ka Igebalin kitetenata kes, kitemonokis akito ka amor adukio etogo.