Read Ateso 1 Ikabakan 6 Bible Online

1 Ikabakan 6 - Ateso bible

1 Ikabakan 6

¹Kosodi kanen kokaru loka akwat aoŋon ka akaisakanykauni, akaulo ka idwe luka Isirael anyoun kakwap nako Misiri, kokaru lokiwoŋonet loka airumit naka Solomon Isirael, kolap Sib, loerai elap lokiareit, kogeu ŋesi aiduk etogo loka EJAKAIT.

² Etogo loadukokini ekabaka Solomon EJAKAIT, kerai aojauke ikubitin [1] akaisakanykape, alalauke akaisaarei, amukururuke ikubitin akaisauni.

³Agola nalomaret koiŋaren keyekalu loka etogo, kerai aojauke ikubitin akaisaarei, kwape kejaar alalau naka etogo; alalauke koiŋaren ketogo ikubitin itomon.

⁴ Kiswamak etogo adirisan nuilokonyikinito.

⁵Kicul agolai arwatat airimor, arwatatin nuka etogo airimor, nuka eyekalu ka nuka aibois nakalaunan noi: kiswama agolai airimor:

⁶Ŋinigola nakokwap alal ikubitin ikany, ka nakokidiŋ alal ikubitin ikanykape, ka nakiwuniet alal ikubitin ikanykaarei: naarai kitidisiarite abures naka arwatat naka etogo airimor tetere mam abaoi elomarete arwatatin nuka etogo.

⁷Naadukere etogo, aponi kodukoi kamor nuetemokinitoi kaneabokere kes: amamei anyul karaida aep karaida adiosuat akiirario kotogo, nakedukere ŋes.

⁸Kejai ekek lolomaret agolai nukokidiŋ owai lokoteten loka etogo: kodokanarete kadoketa nuerimonorete kiton agolai nukokidiŋ, anyoun kanukokidiŋ da kiton nakiwuniet.

⁹Koduk ŋesi kwaŋin etogo, kodau; korapa etogo kakito nuaburok ka akito nuepadalalas nuka eres.

¹⁰Koduk ŋesi agolai airimor etogo kere, ŋinigola amukururuke ikubitin ikany: kidokokis agolai kakito nuka eres.

¹¹Kobu akirot naka EJAKAIT mama ejai Solomon ebe,

¹²“Nuka etogo lo loiduki ijo, arai ilosenenei kokisilaka kitodoli itubesiaka, koricenenei aicorakinetaka kere alosenen kakes; ŋes konyet eticasia akakirot kamakon, naabu kalimok papakon Daudi.

¹³ Eboienenei kodwe luka Isirael, komam ajalenenei ikatuŋa Isirael.”

¹⁴Koduk Solomon kwaŋin etogo, kodau.

¹⁵Koduk arwatatin nukotoma nuka etogo kabaoi nuka eres: anyoun kokwap ketogo aitodol arwatatin nukokuju, korapia kes toma kakito: korapia kwap ketogo kabaoi nuka eberos.

¹⁶ Koduk ŋes ikubitin akaisaarei to ketogo kabaoi nuka eres anyoun kokwap aitodol arwatatin: kodukok kes toma, araun neinerenenere akirot, araun aibois nakalaunan noi.

¹⁷Etogo da, ŋes eyekalu, koiŋaren neinerenenere akirot kerai aojauke ikubitin akaisaoŋon.

¹⁸Kejaas akito nuka eres toma togo, nuigiritai kaputosia nuka ituol ka atur nuelakara: kere keraas eres; mam amor ketakanete.

¹⁹ Kitemok aibois neinerenenere akirot kokidiŋ togo toma, asipokin asaduku naka aitutuket naka EJAKAIT.

²⁰Toma aibois nainerenenere akirot kejai apak aojauke ikubitin akaisaarei, alalauke ikubitin akaisaarei, amukururuke ikubitin akaisaarei; kiladaa kesabu kaloelai: korapia etem kakito nuka eres.

²¹Kiladaa Solomon etogo kotoma kesabu kaloelai: kitotor irikoi luka esabu koiŋaren kaibois neinerenenere akirot; kiladaa kesabu.

²² Kiladaa ŋesi etogo kere kesabu, aitodol neadaunor etogo kere: kiladaa etem da kere lokejai toma aibois neinerenenere akiro kesabu.

²³ Kiswamau ikerubin iarei luka akito nuka eseitun toma aibois neinerenenere akirot, ŋinidiopet ikubitin itomon amukurur.

²⁴Abebenok adiopet naka ekerubi ikubitin ikany, abebenok ace naka ekerubi ikubitin ikany: anyoun kosaŋe loka abebenok adiopet kiton osaŋe loka abebenok ace kejaas ikubitin itomon.

²⁵Ekerubi ece da ikubitin itomon: ikerubin kere keraas luka aitemis adiopet ka aput adiopet.

²⁶Amukurur naka ekerubi ediopet ikubitin itomon, kwape kwaŋin da ekerubi ece.

²⁷ Kosipok ikerubin togo lokotoma: kigararaete abebenoka nuka ikerubin tetere etirorit abebenok adiopet arwatat adiopet, etirorit da abebenok naka ekerubi ece arwatat epuai; kiriamakina abebenokakec kidiŋ togo.

²⁸Kiladaa ikerubin kesabu.

²⁹Kigir arwatatin kere nuka etogo airimor kaputosia nuigiritai nuka ikerubin ka idukudukun, ka atur nuelakara, toma kokiŋa da.

³⁰Kiladaa kwap ketogo kesabu, toma kokiŋa da.

³¹ Neelomarere aibois neinerenenere akirot kiswamau ikirigin luka akito nuka eseitun: acunetait ka ategerio keraas idiopet kokany yenika arwatat.

³²Kiswamau ikirigin iarei luka akito nuka eseitun; kigir kes kaputosia nuigiritai nuka ikerubin ka idukudukun ka atur nuelakara, kiladaa kes kesabu; kibwaik esabu okerubin odukudukun da.

³³Kiswamak da neelomanarere oyekalu ategerio nuka akito nuka eseitun, idiopet kooŋon yenika arwatat;

³⁴ Ka ikirigin iarei luka akito nuka eberos; asukonokinos atutubeta aarei nuka ekirigi ediopet, asukonokinos da atutubeta aarei nuka ekirigi ece.

³⁵Kigirak ikerubin ka idukudukun ka atur nuelakara: kiladaa kes kesabu neigiritai.

³⁶Koduk alaro nakotoma kikokoron iuni luka amor nuekee, ka ekokoro loka abaoi nuka eres.

³⁷Kosipokinai apetetait naka etogo loka EJAKAIT kokaru lokiwoŋonet, kolap Sibo

³⁸Kokaru lokitomonet ka lodiopet, kolap Bul, ŋes elap lokikanyetekauni, kodaun etogo katutubetake kere, kwape ajaar aputoke. Kwaŋin kodau ikar ikanykaarei eduki.