Read Ateso 1 Ikabakan 7 Bible Online

1 Ikabakan 7 - Ateso bible

1 Ikabakan 7

¹ Kodau Solomon ikar itomon ka luuni eduki eketogo, kodau eketogo kere.

²Naarai koduk etogo loka ikito luka Lebanon; aojauke ikubitin akwatat, alalauke ikubitin akaisakany, amukururuke ikubitin akaisauni, kotoma okokoron iwoŋon luka ipirin luka eres, ka abaoi nuka eres kopirin.

³Koraparai kakito nuka eres kokuju agolai akaisaoŋon ka nukany, nuajaas kuju kipirin: ŋolikokoro atomon ka nukany.

⁴Ajaas apedon okokoron iuni, ido kidokonokino apedon kokokoron iuni.

⁵Aojau ka alalau naka ikekia ariakanara, naka apedon da ariakanara: ido kidokonokino apedon kokokoron iuni.

⁶Kiswamau agola neelomarere kipirin; aojauke ikubitin akaisakany, alalauke ikubitin akaisauni; neelomarere da koiŋareneke; ipirin ka adoketa koiŋareneke.

⁷ Kiswamau agola naka eicoloŋ neetubio, agola natubes: koraparitete keres anyoun kokwap kiton arwatatin da.

⁸ Etogoke loaperenenei, alaro ace kiŋaren kagola neelomarere, aponi kiswamai koputosi kaŋin, Kiswamau da etogo loka akoku naka Parao, (naamanyit Solomon) koputosi kagola kaŋin.

⁹Ŋul kere keraas nuka amor nuka akais nuipu, amor nuekee, kwape ajaar aitemis, kotuboi kisumenon, toma kokiŋa da, anyoun kapetetait, kiton oswi, kwaŋin kiŋa da kiton alaro nakapolon.

¹⁰Kerai apetetait naka amor nuka akais nuipu, amor nuepolok, amor nuka ikubitin itomon, ka amor nuka ikubitin ikanykauni.

¹¹Kejaas amor nuka akais nuipu kuju da, amor nuekee, kwape ajaar aitemis, ka akito nuka eres.

¹² Alaro da naerimorit kejaas ikokoron iuni luka amor nuekee, ka ekokoro loka abaoi nuka eres; koputos kalaro nakotoma naka etogo loka EJAKAIT, ka agola neelomarere togo.

¹³ Kijuka ekabaka Solomon aomare Kiram koTuro.

¹⁴ Kerai ŋesi okoku loka aberu napuserut naka ateker naka Naputali, kerai papake etuŋanan loka Turo, ekeswaman aisinit; eleleba ŋes acoa ka aijen ka apirianut, aswam aswamisinei kere nuka aisinit. Kobu ŋesi mama ejai ekabaka Solomon, kiswama akeswam kere.

¹⁵ Naarai abu kotatau ipirin iarei luka aisinit, ŋolipir aojauke ikubitin itomon ka lukanykauni: kolukunite aitemis naka ikubitin itomon ka luarei ŋolidiopet.

¹⁶Kiswamau akwes aarei nuka aisinit naecalara, asipokin kuju opirin: amukurur naka akou adiopet ikubitin ikany, aojao da naka akou ace ikubitin ikany.

¹⁷Ajaas iboyan luka aswam nailokonyitai, ka irikoi luka aswam naeojitai luka akwes nukejaas kuju opirin, eboi loka akou adiopet, ka eboi loka akou nace.

¹⁸Kiswamau kwaŋin akamamagan: kokokoron iarei airimor eboi ediopet arapiar akou nakejai kuju opir; kiswamak akou ace da kwaŋin.

¹⁹Araas akwes nuajaas kuju opirin luajaas agola neelomarere nuka aswam bala nakapecel, ikubitin iwoŋon.

²⁰ Ajaas akwes da kuju opirin, kidunyasi kakoik naedunyas kiboyan: emwaasi akamamagan akwat aarei, kokokoron airimor ŋinikou.

²¹ Kosipok ipirin agola neelomarere oyekalu: kosipok epir lokoteten, komaik ekekiror Yakin: kosipok epir lokokediany, komaik ekekiror Boas.

²²Kejai aswam nakapecel kuju opirin; kodau kwaŋin aswam naka ipirin.

²³ Kiswamau aŋolol naecalara ikubitin itomon anyoun koreret kiton oreret, kolukuna, aojaoke ikubitin ikany; kolukunite aitemis naka ikubitin akaisauni.

²⁴ Kojaas ituol luerimorito ŋes kwap kereret alukun, ikubitin itomon, kirimorite aŋolol: kojaas ituol okokoron iarei kocala kere nepepe kotataete.

²⁵ Kidokokino omoŋin itomon ka luarei, kosesenete iuni ari naka agolitomei, kosesenete iuni ari nakoto, kosesenete iuni ari naka eŋalakimak, kosesenete iuni ari nakokide: kidokokino aŋolol kujukec, kojaas iwosikec toma.

²⁶ Aburesuke alalau naka akan: erereteke kiswamai bala ereret loka atido, bala aturot naka apecel: abu kigau akaalakanya alukumin aarei.

²⁷Kiswamau aicegeria atomon nuka aisinit; aojau naka aiceger adiopet ikubitin iwoŋon, alalauke ikubitin iwoŋon, amukururuke ikubitin iuni.

²⁸Ikote aicegeria neta: kojaas abaoi; kojaas abaoi kidiŋ kanuiriikino:

²⁹ Kojaas iŋatunyo, ka Imoŋin, ka ikerubin abaoi nuajaas kidiŋ kanuiriikino; kojai aigaŋetait kuju kanuiriikino: kwap kiŋatunyo ka imoŋin kojaas lueojitai luejekosi.

³⁰Kojai ŋiniiceger akokoron aoŋon nuka aisinit, ka nuisibelonokinete nuka aisinit: kojaas aigaŋeta nuka akalaya kagoriake aoŋon: kocalara aigaŋeta, kojaas lueojitai kosiep loka ŋiniigaŋet.

³¹Aitukuke toma aboko kerai ekubit adiopet kuju: kolukuna aitukuke kwape aswam naka aikit, ekubit ediopet ka atutubet: kojaas agirai aitukuke, abaoikec keraas nueriakas nuitenara komam elukuna.

³²Kojaas akokoron aoŋon kwap kabaoi: kojaas nuisibelonokinete akokoron aiceger: amukurur naka akokoro ekubit ka atutubet naka ekubit.

³³Aswam naka akokoron korai bala aswam naka akokoro naka agali: nuisibelonokinetakec, ka ipirinokec, ka airimetakec, akidiŋotokec da, kere kecalara.

³⁴Kojaas aigaŋeta aoŋon agoria aoŋon nuka ŋiniiceger: keraas aigaŋeta nuka aiceger alopet.

³⁵Ajai aieunet kuju kaiceger amukururuke atutubet naka ekubit: akaninike ka abaoike kuju kaiceger koraas nuka adiopeswam.

³⁶Kigir ŋesi ikerubin, ka iŋatunyo, ka idukudukun, neepadalalas akaninike ka abaoike, kwape ajaar apakikec, ka lueojitai airimor.

³⁷Kiswamau aicegeria atomon nuikote nen: kojaas kes kere otatae ediopet, ka aitemis adiopet, ka aput adiopet.

³⁸ Kiswamau akalaya atomon nuka aisinit: kigauni akalaya adiopet atakwai akaisaoŋon: ninikalaya ikubitin iwoŋon: akalaya adiopet kotoma aiceger adiopet kiton aicegeria atomon.

³⁹Kosipok aicegeria, akany owai lokoteten loka etogo, ka akany owai lokokediany loka etogo: kosipok aŋolol owai lokokide loka etogo asesen eŋalakimak.

⁴⁰Kiswamau Kiram akalaya, ka iŋitia, ka atanyia. Kwaŋin kodau Kiram aswam kere naeswamakini ekabaka Solomon kotogo loka EJAKAIT:

⁴¹Ipirin iarei, ka atiboi aarei nuka akwes nuajaas kuju opirin; ka iboyan iarei arapia atiboi nuka akwes nuajaas kuju opirin;

⁴²Ka akamamagan akwat aoŋon nuka iboyan iarei; ikokoron iarei luka akamamagan kaŋoliboi, arapia atiboi aarei nuka akwes nuajaas kuju opirin:

⁴³Ka aicegeria atomon, ka akalaya atomon nuka aicegeria;

⁴⁴Aŋolol adiopet, ka imoŋin itomon ka luarei kwap kaŋolol.

⁴⁵ Ka amoti, ka iŋitia, ka atanyia: iboro ŋul kere, lueswamakini Kiram ekabaka Solomon kotogo loka EJAKAIT, araas nuka aisinit naepwatat.

⁴⁶ Kocala ekabaka kes kApuuton naka Yorodan, kolupe loejai kidiŋ Sukot ka Saretan.

⁴⁷ Kinyek Solomon ainiŋ iboro kere, naarai epu kes adepar: mam apedorit adumun alaŋiru naka aisinit.

⁴⁸ Kiswamau Solomon iboro kere luajaas togo loka EJAKAIT: etem loka esabu, ka emesa loajaas imugatin luka aitodikin, loka esabu;

⁴⁹Ka ipirin lukatalai luka esabu loelai, ikany owai lokoteten, ka ikany owai lokokediany, koiŋaren neinerenenere akirot; atur da, ka atalai, ka arideta, nuka esabu;

⁵⁰Ka akolin, ka aitudeŋeta, ka atanyia, ka akaalei, ka atubake nuigaete ekurwon, nuka esabu loelai; ka ipatai luka ikirigin luka etogo lokotoma, aibois nakalaunan noi, ka ikirigin luka etogo, ŋes eyekalu, kere luka esabu.

⁵¹Kodaun kwaŋin aswam kere naeswamai ekabaka Solomon kotogo loka EJAKAIT, Koyau Solomon iboro luabu Daudi papake kotiaku, epuesa, ka esabu, ka iboro, kibwaik kes aiŋadisia nuka etogo loka EJAKAIT.