Read Ateso 2 Ikabakan 10 Bible Online

2 Ikabakan 10 - Ateso bible

2 Ikabakan 10

¹ Kejaas Akab odweke akaisakanykaarei koSamaria. Kiwadika Yeku ibaluan, kijuka Samaria, mama ejaas ikayaitok luka Yesereel, kes imakio, mama ejaas ŋul da luasaete odwe luka Akab kobala ebe,

² “Aso napeedoluni ebalua lo mama ijaas, naarai ejaas odwe luka ekapolonikus kayes, ejaas da agalin ka ibalasin kayes, ka ere loebwaitai da, ka lujiis;

³Komoata loejok ka loibus kodwe luka ekapolonikus, kodakakis oicoloŋ loka papake, kojiut ekek loka ekapolonikus.”

⁴ Konye kokuriakaros noi, kotemasi atiar, “Koany, mam apotu ikabakan ŋul luarei kobwaata kakonyeneke: kikonakini isio kibwoi ai?”

⁵ Apotu ekapolokiton loka ekal, ka ekapolokiton loka ere, ka imakio da, ka ŋul luasaete idwe, kiyakikis Yeku ebe, “Kirai isio ikejaanakinakakon, kiswamai kere nukicorakini ijo sio; mam kitaraun ituŋanan kere ekabaka: kiswama ijo nuejok kakonyenekon.”

⁶ Kosodi ŋesi airucakin aiwadik ebalua kiner atiar, “Arai ijaas kanukaŋ, arai kiirasi eporotoka, koyaut akwes nuka ituŋa odwe luka ekapolonikus, kopotu neajai Yesereel moi tinenikwana.” Kejaas odwe luka ekabaka, kes ituŋa akaisakanykaarei, kikapolok luka ere, luasaete kes.

⁷ Kosodi kanen kedol ebalua neejaas, koyaata odwe luka ekabaka, koarata kes, ituŋa akaisakanykaarei, kibwaikis akwesikec obukito, kijukasi kes neejai ŋesi Yesereel.

⁸Kobu ekiyakia, kolimok ŋes ebe, “Ayaun akwes nuka odwe luka ekabaka.” Kotema atiar, “Kotuk atukon aarei neelomarere korute aitodol moi.”

⁹ Kosodi kanen tupuruc, koloma, kobwo, kotema ituŋa kere atiar, “Iraas yesi luidolito: koany, abu keneru asurokin ekapolonika, ka aiar da: konye iŋai aar lu kere?

¹⁰ Kojenut do ebe mam edoi kwap adio kakiro nuka EJAKAIT nuenerit EJAKAIT nuka ekek loka Akab: naarai eswama EJAKAIT ŋin naenerit kama ka Eliya ekejaanakinanike.”

¹¹ Kwaŋin kodany Yeku luedeunos kere lukokek loka Akab koYesereel, ka iketuŋa kere lukapolok, ka ipaperoke luminan, ka isasedotinike, aitodol namam inyeinia ŋes idio yenapaikin.

¹²Konyou kolot, kobu Samaria, Kosodi ejai orot togo loka ikecokok luka aiŋer ajul.

¹³ Kiriamakinos Yeku kiinacan luka Akasia ekabaka loka Yuda, kotema atiar, “Lukaŋai bo yesi?” Koboŋokis ŋes ebe, “Kirai isio iinacan luka Akasia: kilosi ayogan idwe luka ekabaka ka idwe luka akabaka.”

¹⁴Kotema atiar, “Kikamutu ejarete.” Kikamutu kes ejarete, koarakinai aipany naka etogo loka aiŋer ajul, kes ituŋa akaisaoŋon ka luarei; mam abu kideun ediopet kakesi.

¹⁵ Kenyou ŋesi kanen, kiriamunos ka Yekonadab okoku loka Rekab ebunit airiamun kaŋes; kiyoga Yeku ŋes, kotema atiar, “Ejokuna ekonitau, kwape ejaar etauka kotaukon?” Koboŋok Yesonadab ebe, “Ejok.” Kotema atiar, “Arai kwaŋin, ae akonikan.” Koinak akekan; kitodoka ŋes agali mama ejai.

¹⁶ Kotema atiar, “Kauparos, koany ekakokote kanuka EJAKAIT.” Kisiboik agalike.

¹⁷ Kedolo ŋesi Samaria, kodany kere luedeuna luka Akab koSamatia, aitodol neamudiaria, kwape ajaar akirot naka EJAKAIT, nakelimokinit Eliya.

¹⁸ Kotukonok Yeku ituŋa kere, kotema kes atiar, “Abu Akab kijaanak Baal edit; konye Yeku ijaanakini do ŋes noi.

¹⁹ Aso do konyarautu inabin kere luka Baal neajai, ikamaakake kere, ka isasedotinike; sirikemamuun ediopet da: naarai ejai ainakin Baal asubanit naepol noi; ŋin yenemamuuni, mam ejari.” Konye kiswamai Yeku ŋun amodunia, tetere emudiari ikamaak Baal.

²⁰Kotema Yeku atiar, “Kitalautu atukonokin nakalaunan mama ejai Baal.” Koramai otuŋa kere.

²¹ Kiyakia Yeku anatar Isirael kere: kikokounos ikamaak. Baal kere, mam abu kopaik ediotuŋanan lomam ebunit. Kopotu togo loka Baal; kilelebun etogo loka Baal pas.

²²Kotema ŋesi ŋol loapolokinit agola naenapere atiar, “Koyau inapen luka luemaete Baal kere.” Kitolomik kes inapen.

²³Kolot Yeku, ka Yekonadab okoku loka Rekab, togo loka Baal; kotema ŋesi ikamaak Baal atiar, “Komoutu, koanyut ebe emamei kane ediopet ka lukejaanakinak luka EJAKAIT, dimarai ikamaak Baal bon.”

²⁴ Kolomasi toma ainakin asuban ka ainakineta nuicweio. Kibwaikinit Yeku ituŋa akaisakanykauni kiŋa, kotema atiar, “Toma otuŋa luayauni eoŋ akaninikus arai keku ediopet, aijarake etaci aijar naka ŋol.”

²⁵Kosodi kanen, kedau ainakin ainakinet naicweio, kotema Yeku ikedarak ka ikapolok atiar, “Kolomasi, koara kes; sirikeku ediopet da.” Kodanyata kes kakwanis naka ekileŋ; kocakasi ikedarak ka ikapolok kes kiŋa, koloto ore loka etogo loka Baal.

²⁶ Kitolomut ipirin luajaas togo loka Baal, kicweata.

²⁷ Kobilibilata epir loka Baal, kobilibilata etogo loka Baal, kitaraut aipany kiton lolo.

²⁸Kwaŋin komudia Yeku Baal koIsirael.

²⁹ Konye mam Yeku abu konyou karonisio nuka Yeroboam okoku loka Nebat nuetidiakaria Isirael, kes itak luka esabu luajaas Bet-el, ka Dan.

³⁰ Kotema EJAKAIT Yeku atiar, “Naarai iswama ejok itodolit nuejok kakonyeneka, iswamak etogo loka Akab kwape ajaatar nukotauka kere, iboikinos do odwekon luka atur nakiwoŋonet oicoloŋ loka Isirael.”

³¹ Konye mam Yeku abu kopodokin alosenen okisila luka EJAKAIT Edeke loka Isirael keketau kere: mam abu konyou karonisio nuka Yeroboam nuetidiakaria Isirael.

³² Kapaarasia kaŋun kogeu EJAKAIT aiŋoŋo Isirael: kodany Kasael kes koikoruno kere luka Isirael;

³³ Anyoun koYorodan ari nakokide, akwap kere naka Gilead, Igadin, ka Ireubenin ka Imanasen, anyoun koAroer, loidunyas kajesa naka Arunon, ŋes Gilead ka Basan.

³⁴Aswamisio ace nuka Yeku, ka nuabu kiswama kere, ka agogoŋuke kere, mam kereka iwadikatai oitabo loka aisiitonokin nuka ikabakan luka Isirael?

³⁵Kojotoor Yeku kalukapapaake: aponi kidaikinai Samaria. Kirum Yekoakas okokuke aiboisike.

³⁶Apak naabu Yeku kirumak Isirael koSamaria keraas ikar akaisaarei ka lukanykauni.