Read Ateso 2 Ikabakan 11 Bible Online

2 Ikabakan 11 - Ateso bible

2 Ikabakan 11

¹ Keanyu Atalia toto naka Akasia ebe atwana okokuke, konyou komudia aur kere naka ekabaka,

²Konye Yekoseba, akoku naka ekabaka Yoram, kinacike ka Akasia, koyaŋa Yoas okoku loka Akasia, kokokwa ŋes kodwe luka ekabaka luaario, ŋes ka akasaanike, kibwaik kes agola naeŋadio ikitadan; kimunonikis ŋes Atalia tetere mam eario.

³ Kojai kaŋes ibwaitai kotogo loka EJAKAIT ikar ikanykape; kirum Atalia akwap.

⁴ Kokaru lokikanyetekaarei kijuka Yekoiada koomo ikapolok luka akwatat, luka Ikarin ka luka ikedarak, koyau kes mama ejai togo loka EJAKAIT: kitutuk kakes, kisiyapo kes kotogo loka EJAKAIT, kitodik kes okoku loka ekabaka.

⁵ Kicorak kes ebe, “Na ŋes akirot naiswamaete: atutubetekus nakiwuniet luelomunete kanakasabato eraunos luericete aidar etogo loka ekabaka;

⁶Atutubet nakiwuniet ejaunos okek Sur; ka atutubet nakiwuniet ejaunos okek kau ka ikedarak: kwaŋin ŋes iriciata aidar etogo, iraunos luitikokinete;

⁷Atukonokus nuarei, luelomarete kanakasabato, ericete aidar etogo loka EJAKAIT airimor ekabaka.

⁸Ilukunete ekabaka, kitiŋite ŋolituŋanan lujiisike kakanike; ŋin da yenelomari okokoron, koarai; kojaenanas kekabaka naelomununia, naelomanaria da.”

⁹ Kiswamata ikapolok luka akwat kwape ajaatar kere nuecorakini Yekoiada esasedoti: koyaŋa ŋolituŋanan iketuŋa, ŋul luelomunete kanakasabato, ka luelomarete da kanakasabato, kopotu mama ejai Yekoiada esasedoti.

¹⁰ Kijaik esasedoti ikapolok luka akwat akwaras ka ibukui lukeraas sek luka ekabaka Daudi, luajaas togo loka EJAKAIT.

¹¹Kobwaata ikedarak, kitiŋite ŋolituŋanan lujiisike kakanike, ameun kowai lokoteten loka etogo kiton owai lokokediany loka etogo, eiduny ketem ka etogo, elukunito ekabaka.

¹² Kosodi ŋesi aitolomun okoku loka ekabaka, kidokok aboko akouke, koinak aitejenunet; kitaraut ŋes ekabaka, kinyonyoikinai akinyet; kibapakis akanin kotemasi atiar, “Kidari Edeke ekabaka.”

¹³ Kepupu Atalia ecelet loka ikedarak ka loka ituŋa, kobu mama ejaas ituŋa togo loka EJAKAIT:

¹⁴ Kosesen, ido koany, ebwoi ekabaka neejai epir, kwape ejaar epone, ka ikapolok ka arupepen kidunyas kekabaka; kibwoŋasi ituŋa kere luka akwap, kokuta arupepen. Kosodi Atalia aicil ikenapen, kiworo ebe, “Ebotet, ebotet lokibilakinito.”

¹⁵Kosodi Yekoiada esasedoti aicorakin ikapolok luka akwat luapolokinito ajore, kotema kes atiar, “Kitolomasi ya kidiŋ okokoron; ŋol da loetupari ŋes koarata kekileŋ”: naarai abala esasedoti ebe, “Kinyek aarakinio togo loka EJAKAIT,”

¹⁶ Kocilakis ŋes erot; kolot orot neelomanariata ibalasin togo loka ekabaka: koarakinai ŋes ŋina.

¹⁷ Kitutuk Yekoiada mama ejai EJAKAIT ka ekabaka ka Ituŋa, koraut ituŋa luka EJAKAIT; kidiŋ kekabaka ka ituŋa da.

¹⁸ Koloto ituŋa kere luka akwap togo loka Baal, kotiyatiyata; kobilibilata cut iketemwan ka akeputosia, koarakinai Matan esasedoti loka Baal kiŋaren kitemwan. Kodakak esasedoti ikapolokitok luka etogo loka EJAKAIT.

¹⁹Koyaŋa ikapolok luka akwat, ka Ikarin, ka ikedarak, ka ituŋa kere luka akwap; kitolomut ekabaka kotogo loka EJAKAIT, kopotu korot lokorute loka ikedarak mama ejai etogo loka ekabaka, Kiboikin ŋesi oicoloŋ loka ikabakan.

²⁰ Kibwoŋasi ituŋa kere luka akwap, kinapakin ere: koarakinai Atalia kekileŋ neejai etogo loka ekabaka.

²¹Korai Yekoas loka ikar ikanykaarei egeuni airum.