Read Ateso 2 Ikabakan 12 Bible Online

2 Ikabakan 12 - Ateso bible

2 Ikabakan 12

¹ Kokaru lokikanyetekaarei loka Yeku kogeu Yekoas airum; kirumak ikar akaisaoŋon ko Yerusalem: ekiror loka totoke Sibia naka Beer-seba,

²Kiswama Yekoas nuejokuka kakonyen nuka EJAKAIT apaarasiake kere nuetuutooria Yekoiada esasedoti ŋes.

³ Konye mam aponi kolemarai aiboisio nuiceleleete: koroko ituŋa einanakinete asuban ka aisupuruun lueuru maa kaiboisio nuiceleleete.

⁴ Kotema Yekoas isasedotin atiar, “Apesan kere nuka iboro lukalaunak nueyaunio togo loka EJAKAIT, apesan nuetwasamaenenete kapakio kaŋun, apesan nuka ituŋa kwape itiriania etiai loka ŋinituŋanan, ka apesan nuekot etau loka ituŋanan ayaun togo loka EJAKAIT,

⁵Kijaununut isasedotin, ŋinituŋanan kijauni yenejeni ŋesi: kipuciata acilan nuka etogo, needumunere acilat kere.”

⁶ Konye kokaru loka akaisaarei ka luuni loka ekabaka Yekoas koriŋa isasedotin ipuca acilan nuka etogo.

⁷Kosodi ekabaka Yekoas anyaraun Yekoiada esasedoti, ka isasedotin ice, kotema kes atiar, “Inyo bo mam ipucanariata acilan nuka etogo? Aso do mam bobo ijaununete apesan kama kaluijenete, konye koinakis ŋun nuitukokinito kanuka acilan nuka etogo.”

⁸Kocamut isasedotin ebe mam bobo ijaunete apesan kotuŋa, karaida aipucanar acilan nuka etogo.

⁹ Konye koyoŋa Yekoiada esasedoti asaduku, koped apedot toma arapetait, kibwaik eiduny ketem, kosiep lokoteten ilomari togo loka EJAKAIT: kosodete isasedotin luedarenenete ekek kibwaanakis apesan kere nuayaununio togo loka EJAKAIT.

¹⁰Kosodete keanyut ebe ejaas apesan nuipu toma asaduku, kopotu ekewadikan loka ekabaka ka esasedoti lopeti, koenata kimarata da apesan nuadumuna kotogo loka EJAKAIT.

¹¹Kijaikis apesan nuetemio akanin nuka ŋul kalueswamaete aswam, luapolokinito etogo loka EJAKAIT: koropiata ikekeok ka ikadukok lueswamaete aswam naka etogo loka EJAKAIT;

¹²Ka lukadukok kamor, ka lukekeok amor, agwelia da akito ka amor nuikec aipucanaria acilan nuka etogo loka EJAKAIT, ka nuepudasi kere aiteteunia etogo.

¹³Konye mam aponi kiswamakinere etogo loka EJAKAIT akolin nuka epuesa, ka aitudeŋeta, ka atanya, ka arupepen, iboro kere luka esabu, arai iboro kere luka epuesa, kapesan nuetolomunio togo loka EJAKAIT.

¹⁴Naarai aponi koinakinai ŋun lueswamaete aswam, lueteteunete etogo loka EJAKAIT.

¹⁵ Bobo da mam apotu kimarata etiai mama ejaas ituŋa luainakinio apesan akoranakin ikeswamak: naarai keraas lumunon.

¹⁶ Mam aponi koyaunai apesan nuka ainakineta nuka aidiak, ka apesan nuka ainakineta nuka aronis togo loka EJAKAIT: keraas ŋun nuka isasedotin.

¹⁷ Kosodi Kasael ekabaka loka Suria alosit, kitiji Gat, kirum; kireo Kasael akekonye alosit Yerusalem.

¹⁸ Kosodi Yekoas ekabaka loka Yuda kolem iboro kere luetalaunitai luapotu Yekosapat, ka Yekoram, ka Akasia, lukapapaake, ikabakan luka Yuda kotiakunito, ka iboroke luetalaunitai, ka esabu kere loadumuna koboro luka akais nuipu luka etogo loka EJAKAIT, ka luka etogo loka ekabaka, kijukak Kasael ekabaka loka Suria: konyou do ko Yerusalem.

¹⁹Aswamisio ace nuka Yoas, ka nuabu kiswama kere, mam kereka iwadikatai oitabo loka aisiitonokin nuka ikabakan luka Yuda?

²⁰Konyout ike-jaanakinakake, kinerut, koarakis Yoas togo loka Milo, orot loebei Sila.

²¹ Naarai kibuŋata ŋes Yosakar okoku loka Simeat, ka Yekosabad okoku loka Somer, ikekejaanakinak, kotwana; aponi kidaikinai kalukapapaake ore loka Daudi: kirum Amasia okokuke aiboisike.