Read Ateso 2 Ikabakan 13 Bible Online

2 Ikabakan 13 - Ateso bible

2 Ikabakan 13

¹Kokaru loka akaisaarei ka luuni loka Yoas okoku loka Akasia, ekabaka loka Yuda, kogeu Yekoakas okoku loka Yeku airum Isirael koSamaria, kirumak ikar itomon ka lukanykaarei.

²Kiswama nueroko kakonyen nuka EJAKAIT, kotupa aronisio nuka Yeroboam okoku loka Nebat, nuetidiakaria Isirael; mam abu konyou kaŋun.

³ Kinep anyunyura naka EJAKAIT aluikin Isirael, kijaik kes akan naka Kasael ekabaka loka Suria, ka akan da naka Ben-kadad okoku loka Kasael apaarasia kere,

⁴ Kiŋaiŋa Yekoakas EJAKAIT, kopupok EJAKAIT ŋes; naarai abu koany aroikinio naka Isirael, kwape aroikinitor ekabaka loka Suria.

⁵ (Koinak EJAKAIT Isirael eketajaran, konyout kakanin nuka Isurian: kiboikinos idwe luka Isirael oreriakec, kwape lem sek.

⁶ Konye mam apotu konyoutu karonisio nuka etogo loka Yeroboam, nuetidiakaria Isirael, konye kolosenenete kaŋun: kosalakis Asera da ko Samaria.)

⁷ Naarai mam abu kideik Yekoakas ituŋa dimarai ikebwanenok akaisakany, ka agalin atomon, ka luelosete kakeje ilukumin itomon; naarai abu ekabaka loka Suria komudia kes, kitarau kes apua naipudao.

⁸Aswamisio ace nuka Yekoakas, ka nuabu kiswama kere, ka akegogoŋ, mam kereka iwadikatai oitabo loka aisiitonokin nuka ikabakan luka Isirael?

⁹Kojotoor Yekoakas kalukapapaake; kidaikinai Samaria: kirum Yoas okokuke aiboisike.

¹⁰Kokaru loka akaisauni ka lukanykaarei loka Yoas ekabaka loka Yuda, kogeu Yekoas okoku loka Yekoakas airum Isirael koSamaria, kirumak ikar itomon kalukanykape.

¹¹Kiswama nueroko kakonyen nuka EJAKAIT; mam abu konyou karonisio kere nuka Yeroboam okoku loka Nebat, nuetidiakaria Isirael: konye kolosenenei kaŋun.

¹² Aswamisio ace nuka Yoas, ka nuabu kiswama kere, ka akegogoŋ naetijio Amasia ekabaka loka Yuda, mam kereka iwadikatai oitabo loka aisiitonokin nuka ikabakan luka Isirael?

¹³Kojotoor Yoas kalukapapaake; kiboikin Yeroboam oicoloŋoke: aponi kidaikinai Yoas Samaria nepepe kikabakan luka Isirael.

¹⁴ Kodekakin Elisa adek nakatwanare: kobu Yoas ekabaka loka Isirael neejai, komonyak ŋes, kotema atiar, “Ipapa, ipapa, agalin nuka Isirael ka ikebwanenokoke!”

¹⁵Kotema Elisa ŋes atiar, “Kolem akabwa ka imalia.” Kosodi kolem akabwa ka imalia.

¹⁶ Kotema ŋesi ekabaka loka Isirael atiar, “Kibwaik akan akabwa”: kibwaik akanike. Kidokok Elisa akaninike akanin nuka ekabaka.

¹⁷ Kotema atiar, “Koŋaa adirisa nakokide”: koŋaa, Kosodi Elisa atemar ŋes atiar, “Koguma”: kosodi ŋesi agumar. Kotema atiar, “Emal loka EJAKAIT loka aipikor, ŋes emal loka aipikor Suria: naarai idanyi ijo Isurian koApek, aitodol neimudiaria kes.”

¹⁸ Kotema atiar, “Kolem imalia”: kolem kes. Kotema ŋesi ekabaka loka Isirael atiar, “Kinom akwap”: kosodi kinom irwan auni, kinyek.

¹⁹Konyunyurik etuŋanan loka Edeke ŋes, kotema atiar, “Tikinom irwan akany arai irwan akanykape; aso tikidany Suria aitodol neimudiaria ŋes: aso do kwana jo idanyi Suria irwan auni bon.”

²⁰ Kotwana Elisa, kidaai. Asuronokinete irioŋeta luka Moab akwap ageunet naka ekaru.

²¹ Kosodi kanen, idaio etuŋanan, koany, kiteluosi erioŋet; kocakakis etuŋanan ates naka Elisa: napetirori etuŋanan akojo nuka Elisa, kikwaru, kobwo.

²² Koroik Kasael ekabaka loka Suria Isirael apaarasia kere nuka Yekoakas.

²³ Konye kosianiar EJAKAIT mama ejaas kesi, kitim kes, kopodo kes, kanuka aitutuketeke naetutukit kaAburaam, ka Isaak ka Yakob, mam akoto amudiar kes, komam ber akoto aireŋear kes kakonyeneke.

²⁴Kotwana Kasael ekabaka loka Suria; kirum Ben-kadad okokuke aiboisike.

²⁵ Kolem bobo Yekoas okoku loka Yekoakas kakan naka Ben-kadad okoku loka Kasael ireria luayaŋaarit kakan naka Yekoakas papake ejio, Kodany Yoas ŋes irwan auni, kinyaku ireria luka Isirael.