Read Ateso 2 Ikabakan 15 Bible Online

2 Ikabakan 15 - Ateso bible

2 Ikabakan 15

¹ Kokar loka akaisaarei ka lukanykaarei loka Yeroboam ekabaka, loka Isirael, kogeu Asaria okoku loka Amasia ekabaka loka Yuda airum,

²Kerai loka ikar itomon ka lukanykape egeuni airum; kirumak ikar akaisakany ka luarei koYerusalem, ekiror loka totoke kerai Yekolia naka Yerusalem.

³Kiswama nuejok kakonyen nuka EJAKAIT, kwape ajaatar kere nueswamai papake Amasia.

⁴ Konye mam aponi kolemarai aiboisio nuiceleleete: koriŋa ituŋa einanakinete asuban, ka aisupuruun lueuru maa kaiboisio nuiceleleete.

⁵ Kitedek EJAKAIT ekabaka, koraun lokatapon aitodol apaaran naatwania, kiboie kotogo loetiakuna, Kopolokinit Yotam okoku loka ekabaka ekal, aitub kotuŋa luka akwap.

⁶Aswamisio ace nuka Asaria, ka nuabu kiswama kere, mam kereka iwadikatai oitabo loka aisiitonokin nuka ikabakan luka Yuda?

⁷ Kojotoor Asaria kalukapapaake; aponi kidaikinai kalukapapaake ore loka Daudi: kirum Yotam okokuke aiboisike.

⁸Kokaru loka akaisauni ka lukanykauni loka Asaria ekabaka loka Yuda kirumak Sekaria okoku loka Yeroboam Isirael koSamaria ilapio ikanykape.

⁹Kiswama nueroko kakonyen nuka EJAKAIT, kwape eswamaata lukapapaake; mam abu konyou karonisio nuka Yeroboam okoku loka Nebat, nuetidiakaria Isirael.

¹⁰ Kinerut Salum okoku loka Yabes asurokin ŋes, kicumak akonyen nuka ituŋa, koar; kirum aiboisike.

¹¹Aswamisio ace nuka Sekaria, koany, iwadikatai oitabo loka aisiitonokin nuka ikabakan luka Isirael.

¹² Ŋin ŋes akirot naka EJAKAIT naalimokini Yeku ebe, “Iboikinos odwekon luka aturi nakiwoŋonet oicoloŋ loka Isirael.” Ido kitodolikinoi kwaŋin.

¹³ Kogeu Salum okoku loka Yabes airum kokaru loka akaisauni ka lukanykaoŋon loka Usia ekabaka loka Yuda; kirumak apak naka elap ediopet koSamaria.

¹⁴ Konyou Menakem okoku loka Gadi koTirusa, kobu Samaria, kicumak Salum okoku loka Yabes koSamaria, koar ŋes, kirum aiboisike.

¹⁵Aswamisio ace nuka Salum, ka ainerunike naabu kiner, koany, iwadikatai oitabo loka aisiitonokin nuka ikabakan luka Isirael.

¹⁶ Kosodi Menakem aidany Tirusa, ka luajaas toma kere, ka iikorunoke, anyoun koTirusa: naarai mam apotu koŋaikis ŋes, kanuka ŋun ŋes adanyia kes; koŋerereana aŋor kere nukotoma nuapotiete.

¹⁷Kokaru loka akaisauni ka lukanykaoŋon loka Asaria ekabaka loka Yuda kogeu Menakem okoku loka Gadi airum Isirael, kirumak ikar itomon koSamaria.

¹⁸Kiswama nueroko kakonyen nuka EJAKAIT; mam abu konyou karonisio nuka Yeroboam okoku loka Nebat nuetidiakaria Isirael apaarasiake kere.

¹⁹ Kobu Pul ekabaka loka Asuria asurokin akwap; koinaki Menakem Pul atalata alukumit nuka epuesa, kojai akekan kaŋes aitogogoŋio ajakanut akanike.

²⁰Kitelem Menakem apesan koIsirael, kotuŋa kere lukagogoŋ lukabarak, kitelem ŋolituŋanan isekelin akaisakany luka epuesa, ainakin ekabaka loka Asuria, Koboŋo ekabaka loka Asuria, mam abu kopaik akwap ŋin.

²¹Aswamisio ace nuka Menakem, ka nuabu kiswama kere, mam kereka iwadikatai oitabo loka aisiitonokin nuka ikabakan luka Isirael?

²²Kojotoor Menakem kalukapapaake; kirum Pekakia okokuke aiboisike.

²³ Kokaru loka akaisakany loka Asaria ekabaka loka Yuda kogeu Pekakia airum Isirael koSamaria, kirumak ikar iarei.

²⁴Kiswama nueroko kakonyen nuka EJAKAIT: mam abu konyou karonisio nuka Yeroboam okoku loka Nebat, nuetidiakaria Isirael.

²⁵Kineru Peka, okoku loka Remalia, ekapolonike asurokin ŋes, kicumak Samaria, arwatat naegogoŋ naka etogo loka ekabaka, nepepe ka Arugob ka Aric; ido kejaas ituŋa akaisakany luka Igileadin kaŋes: koar ŋes, kirum aiboisike.

²⁶Aswamisio ace nuka Pekakia, ka nuabu kiswama kere, koany, iwadikatai oitabo loka aisiitonokin nuka ikabakan luka Isirael.

²⁷ Kokaru loka akaisakany ka luarei loka Asaria ekabaka loka Yuda kogeu Peka okoku loka Remalia airum Isirael koSamaria, kirumak ikar akaisaarei.

²⁸Kiswama nueroko kakonyen nuka EJAKAIT: mam abu konyou karonisio nuka Yeroboam okoku loka Nebat, nuetidiakaria Isirael.

²⁹ Kapaarasia nuka Peka ekabaka loka Isirael kobu Tigilat-pileser ekabaka loka Asuria, kirum Iyon, ka Abel-bet-maaka, ka Yanoa, ka Kedes, ka Kasor, ka Gilead, ka Galilaya, akwap kere naka Naputali; kijoreo kes Asuria.

³⁰Kineru Kosea okoku loka Ela asurokin Peka okoku loka Remalia, kicum ŋes, koar, kirum aiboisike, kokaru loka akaisaarei loka Yotam okoku loka Usia.

³¹Aswamisio ace nuka Peka, ka nuabu kiswama kere, koany iwadikatai oitabo loka aisiitonokin nuka ikabakan luka Isirael.

³² Kokaru lokiareit loka Peka okoku loka Remalia ekabaka loka Isirael kogeu Yotam okoku loka Usia ekabaka loka Yuda airum.

³³Kerai loka ikar akaisaarei ka lukany egeuni airum; kirumak ikar itomon ka lukanykape koYerusalem: ekiror loka totoke kerai Yerusa akoku naka Sadok.

³⁴Kiswama nuejok kakonyen nuka EJAKAIT: kiswama kwape ajaatar kere nueswamai papake Usia.

³⁵ Konye mam aponi kolemarai aiboisio nuiceleleete: koriŋa ituŋa einanakinete asuban, ka aisupuruun lueuru maa kaiboisio nuiceleleete. Koduk ŋesi erute loikumemei, loka etogo loka EJAKAIT.

³⁶Aswamisio ace nuka Yotam, ka nuabu kiswama kere, mam kereka iwadikatai oitabo loka aisiitonokin nuka ikabakan luka Yuda?

³⁷ Kapaarasia kaŋun kogeu EJAKAIT aijukun Resin ekabaka loka Suria ka Peka okoku loka Remalia asurokin Yuda.

³⁸Kojotoor Yotam kalukapapaake, aponi kidaikinai kalukapapaake ore loka papaake Daudi: kirum Akas okokuke aiboisike.