Read Ateso 2 Ikabakan 18 Bible Online

2 Ikabakan 18 - Ateso bible

2 Ikabakan 18

¹ Kosodi kanen kokaru lokiwuniet loka Kosea okoku loka Ela ekabaka loka Isirael, kogeu Kesekia okoku loka Akas ekabaka loka Yuda airum.

² Kerai loka ikar akaisaarei ka lukany egeuni airum; kirumak ikar akaisaarei ka lukanykaoŋon koYerusalem; ekiror loka totoke kerai Abi akoku naka Sekaria,

³Kiswama nuejok kakonyen nuka EJAKAIT, kwape ajaatar kere nueswamai papaake Daudi.

⁴ Kolema aiboisio nuiceleleete, kobil ipirin, kojepejep Asera: komunyumuny emun loka aisinit loasubi Musa: naarai aitodol apaarasia ŋun koriŋa idwe luka Isirael isupuruunekinete ŋes lueuru maa: komaik ŋes Nekusutan.[1]

⁵ Komuno EJAKAIT, Edeke loka Isirael; akauloke emamei lueputori ŋes kokabakan kere luka Yuda, karaida luageikinete ŋes.

⁶ Naarai abu kimorikikin ka EJAKAIT, mam abu konyou katupit ŋes, konye koricite aicorakinetake, nuecorakin EJAKAIT Musa,

⁷ Kojai EJAKAIT kaŋes: nealomanari kere kokerianar: kipaliik ŋesi ekabaka loka Asuria, mam abu kijaanak.

⁸ Kodany Ipilisitian kiton Gasa ka iikorunoke; ageun kotogo kaloeoj loka ikedarak kiton ore lokebwaitai.

⁹ Kosodi kanen kokaru lokiwoŋonet loka ekabaka Kesekia, ŋes ekaru lokikanyetekaarei loka Kosea okoku loka Ela ekabaka loka Isirael, kobu Salumaneser ekabaka loka Asuria asurokin Samaria, kirigau.

¹⁰ Kosodi ketuboros ikar iuni kiruma: ŋes ekaru lokikanyetekape loka Kesekia, ŋes ekaru lokikanyetekaoŋon loka Kosea ekabaka loka Isirael, kirumai Samaria,

¹¹ Kijoreo ekabaka loka Asuria Isirael ayaŋaar Asuria, kibwaik kes Kala, ka Kabor, ariri kecor loka Gosan, oreria da luka Imedin:

¹² Naarai mam apotu korimakis eporoto loka EJAKAIT Ekecedeke, konye kodiakasi aitutuketeke, kere da nuecorakini Musa ekejaanakinan loka EJAKAIT, koŋero akiirar, karaida aswam.

¹³ Kokaru lokitomonet kaoŋon loka ekabaka Kesekia, kobu Senakarib ekabaka loka Asuria asurokin ireria kere luka Yuda lukebwaitai, kirum.

¹⁴Kijukak Kesekia ekabaka loka Yuda ekabaka loka Asuria Lakis ebe, “Adiak eoŋ; kinyeinai koboŋo: lukitubokini ijo eoŋ acamuni.” Kotuboki ekabaka loka Asuria Kesekia ekabaka loka Yuda atalatan akwat auni nuka epuesa ka atalatan akaisauni nuka esabu.

¹⁵ Kosodi Kesekia ainakin ŋes epuesa kere loadumuna kotogo loka EJAKAIT, koboro da luka akais nuipu lukotogo loka ekabaka.

¹⁶Kapak kaŋin kikisunun Kesekia esabu kokirigin luka eyekalu loka EJAKAIT, kopirin da lueladaarit Kesekia ekabaka loka Yuda, koinak ekabaka loka Asuria.

¹⁷ Kijuka ekabaka loka Asuria Taratan ka Rab-saris ka Rabasake anyoun koLakis mama ejai ekabaka Kesekia kajore naepol Yerusalem, Kodokasi kopotu Yerusalem, Kedoloto, kopotu kobwaata kariri kaleles naka atapar nakokuju, korot loka emanikor loka ekelotan igoen,

¹⁸Kedaut anyaraun ekabaka, kolom neejaas Eliakim okoku loka Kilikia, loapolokinit ekal, ka Sebuna ekewadikan, ka Yoa okoku loka Asap ekesiitonokinan.

¹⁹ Kotema Rabasake kes atiar, “Kolimokis do Kesekia ebe, ‘Inera ekabaka lokapolon, ekabaka loka Asuria, kwanata ebe, Amuno naanyoin naimuno?’

²⁰ Inera ijo, konye eraas akiro nuka aituk bon ebe, Ejai acoa ka agogoŋ naka ejie, Iŋai do imunokina ijo, tape kipaliikin eoŋ?

²¹ Koany ca, imunokina ijo ebela loka egada lo loiriecakina, ŋes Misiri; arai kegoŋakini ituŋanan mamake, elomari akani ke icumi: ikoni nepenen Parao ekabaka loko Misiri mama ejaas ŋul kere luemunosi ŋes.

²² Konye arai kitemas ebe, ‘Kimuno isio EJAKAIT Ekosideke’: mere ŋes ŋol loalemari Kesekia aiboisioke nuiceleleete ka itemwanake, kolimok Yuda ka Yerusalem ebe, ‘Imaenenete kotem kalo koYerusalem?’

²³Aso do, keŋaiŋait, kojaakis ekajakait ekabaka loka Asuria iboro lukititiŋa, kainakin eoŋ jo da ibalasin ilukumin iarei, arai ipedori ijo kowaikon aibwaikin luibwanenete.

²⁴Aso ipedori biai aisibelokin akonyen nuka ekapolon ediopet kotoma kaludidik kokejaanakinak luka ejakaitika, komuno Misiri kanuka agalin ka ikebwanenok.

²⁵ Abu kereka eoŋ asurokin aibois na amudiar komamei EJAKAIT? EJAKAIT, ŋes kabala ebe, ‘Kosurok akwap na, komudia.’ ”

²⁶Kosodi Eliakim okoku loka Kilikia, ka Sebuna, ka Yoa, atemar Rabasake atiar, “Kiŋaiŋait, kiner kikonikejaanakinak kaŋajep nako Suria; naarai kijeni; sirikiner kasio kaŋajep naka Iyudayan, kaki nuka ituŋa luejaas arwatat.”

²⁷Konye kotema Rabasake kes atiar, “Keyakuunit ekajakait mama ejai ejakaitikon, ka jo da, einer akiro nu? Mam kereka keyakuunit otuŋa luiboiete karwatat, ainyam acinikec, ka aimat akulakec nepepe kayes?”

²⁸Kosodi Rabasake aibwo, kiworo keporoto loepol kaŋajep naka Iyudayan, kotema atiar, “Kopupokisi yesi akirot naka ekabaka lokapolon, ekabaka loka Asuria.

²⁹ Inera ekabaka kwanata ebe, ‘Kinyek Kesekia aiŋal yes; naarai mam epedori aitajar yes kakanike:

³⁰Kinyek Kesekia ainakin yes amunokina EJAKAIT ebe, Abeit kitajari EJAKAIT oni, ere lo da mam ijaikinio akan naka ekabaka loka Asuria.’

³¹ Sirikipupokis Kesekia: naarai inera ekabaka loka Asuria kwanata ebe, ‘Kinerutu keoŋ nuka ainapakin, kopotu neajai; konyama yesi ŋinituŋanan emusabibuke, ŋinituŋanan nuka etinike, komata da yesi ŋinituŋanan akipi nukoicoike;

³² Aitodol neabunio kayaŋaa yes akwap naeputosi kanakus, akwap naka akima ka ebino, akwap naka atap ka imanikoria luka emusabibu, akwap naka akinyet naka eseitun, ka esik, tetere ijarete, komam itwakete: sirikipupokis Kesekia, nakijodooria yes ebe, Kitajari EJAKAIT oni.

³³ Ejai cani edio kodekesio luka atekerin loitajarit akekwap kakan naka ekabaka loka Asuria?

³⁴ Alu bo ejaas idekesio luka Kamat, ka luka Arupad? Alu bo ejaas idekesio luka Separabaim, luka Kena, ka luka Iba da? Apotu tope kitajarata Samaria kakanika?

³⁵ Lukaŋai kodekesio kere luka akwapin luapotu kitajarata akwapukec kakanika, tetere itajari EJAKAIT Yerusalem kakanika?’ ”

³⁶Konye kililiŋa ituŋa, mam apotu koboŋokis ŋes akirot; naarai kejai aicorakinet naka ekabaka ebe, Sirikiboŋokis.

³⁷ Kosodi Eliakim okoku loka Kilikia, loapolokinit ekal, ka Sebuna ekewadikan, ka Yoa okoku loka Asap ekesiitonokinan kopotu mama ejai Kesekia ecilicilito inapenekec, kolimokis akiro nuka Rabasake.