Read Ateso 2 Ikabakan 2 Bible Online

2 Ikabakan 2 - Ateso bible

2 Ikabakan 2

¹ Kosodi kanen, nakekotor EJAKAIT aitodokaar Eliya ketapipirio toma akuj, konyout Eliya ka Elisa koGiligal.

² Kotema Eliya Elisa atiar, “Keŋaiŋait kopaik ne: naarai kejukit EJAKAIT eoŋ Besel.” Kobala Elisa ebe, “Kwape ejaria EJAKAIT, ido kwape ejaria ekonitau da, mam kajali jo.” Koloto koton Besel.

³ Kolomunete do idwe luka inabin lukejaas Besel neejai Elisa, kotemasi ŋes atiar, “ijeni ebe eyaŋaari EJAKAIT ekonijakait kama ijai ijo lolo?” Kobala ŋesi ebe, “Eebo, ajeni, kililiŋata yesi,”

⁴Kosodi kotema Eliya ŋes atiar, “Keŋaiŋait, Elisa, kopaik ne; naarai kejukit EJAKAIT eoŋ Yeriko,” Kobala ŋesi ebe, “Kwape ejaria EJAKAIT, ido kwape ejaria ekonitau da, mam kajali jo.” Kosodete kodolo Yeriko.

⁵Kikunyakis idwe luka inabin lukejaas Yeriko neejai Elisa, kotemasi ŋes atiar, “ijeni ebe eyaŋaari EJAKAIT ekonijakait kama ijai ijo lolo?” Koboŋok ŋesi ebe, “Eebo, ajeni; kililiŋata yesi.”

⁶Kosodi kotema Eliya ŋes atiar, “Keŋaiŋait, kopaik ne; naarai kejukit EJAKAIT eoŋ Yorodan.” Kobala ŋesi ebe, “Kwape ejaria EJAKAIT, ido kwape ejaria ekonitau da, mam kajali jo.” Kosodokis kesi luarei.

⁷Koloto ikiliok akaisakany lukotoma odwe luka inabin, kobwaata atereikina kes kama elwana; kobwaata kesi luarei koYorodan.

⁸ Kosodi kolem Eliya ekelou, konunuk, kopaari ainomia akipi, kotiakas epuai ka epuai, kitoro da kesi luarei neeonit.

⁹ Kosodi kanen, kedokasi, kotema Eliya Elisa atiar, “Kilipai nukeswamakini jo eroko eoŋ kelemara kamakon.” Kobala Elisa ebe, “Kelipit akorakineta aarei nuka aijarakon kojaikinos keoŋ.”

¹⁰ Kobala ŋes ebe, “Ilipit ijo akirot naetiono: konye, arai kiiany kaalemar eoŋ, ikwaikinos nen; konye arai mam, mam ikwaikinos nen.”

¹¹ Kosodi kanen, eriŋa elosete, iyalaete, koany, kotakan agali naka akim ka ibalasin luka akim, kotiakata kes luarei; kodoka Eliya toma akuj ketapipirio.

¹² Keanyu Elisa, kiworo atiar, “Ipapa, Ipapa, agalin nuka Isirael ka ikebwanenok da.” Mam eanyuna ŋes bobo. Kosodi kitiŋ ikenapen kocil atutubeta aarei.

¹³Kolem da elou loka Eliya loabu kodou, koboŋo, kobwo kariri naka Yorodan.

¹⁴ Kolem elou loka Eliya loabu kodou, kinomia akipi, kotema atiar, “Ai bo ejai EJAKAIT, Edeke loka Eliya?” Ido kedau ŋesi da ainomia akipi, kotiakas epuai ka epuai: kotubor Elisa.

¹⁵Keanyut ŋes idwe luka inabin lukejaas Yeriko kotemasi atiar, “Adoiki emoyo loka Eliya neejai Elisa.” Kopotu aisiriamaar ŋes, kisudedoto kakonyeneke.

¹⁶ Kotemasi ŋes atiar, “Koany, ejaas ituŋa akaisakany lukagogoŋok, nepepe kikonibulesin; kiŋaiŋait, koloto kesi amoot ejakaitikon: motoko edakarit emoyo loka EJAKAIT ŋes kocaka ŋes oroŋat, arai bo aditot.” Kotema atiar, “Mam iyakiarete kes.”

¹⁷Kimaimaata ŋes aitodol neeleicikinio, kotema atiar, “Kiyakiasi do,” Kanuka ŋun kiyakiarai ituŋa akaisakany; komoata adaun apaarasia auni, konye mam apotu kodumut.

¹⁸Koboŋut mama ejai, eroko idarit koYeriko; kotema kes atiar, “Mam abu kalimok yes ebe, ‘Sirikiloto?’ ”

¹⁹ Kotemasi ituŋa lukore Elisa atiar, “Koany, kiŋaiŋait, ejok aibois naka ere kalo, kwape eanyunia ejakaitika: konye eroko akip, akwap da mam ebwaŋi inyamat.”

²⁰Kotema atiar, “Koinunai atany nakitetet, kibwaikis abalaŋ toma.” Koinut ŋes.

²¹ Koloma kolot neejai akoŋu naka atan, kocakak abalaŋ, kotema atiar, “Inera EJAKAIT kwanata ebe, Etaŋaleu eoŋ akipi nu; mam bobo elomuni atwanare karaida aimotoikin.”

²²Kwaŋin konaleut akip kiton lolo, kwape ajaar akirot naka Elisa naenera.

²³ Konyou kanen kodoka Bet-el: elosi korot edokari, kolomut idwe ludidik kore, koratata ŋes, kotemasi ŋes atiar, “Kodoka ijo, lokepata; kodoka ijo, lokepata.”

²⁴ Koŋolia kau koany kes, kiken kes kokiror loka EJAKAIT. Kolomut adubui aarei kamonieik, kopoopoata idwe akaisaoŋon ka luarei kakesi.

²⁵Konyou kanen kolot moru Karamel, konyou kanen koboŋo Samaria.