Read Ateso 2 Ikabakan 20 Bible Online

2 Ikabakan 20 - Ateso bible

2 Ikabakan 20

¹ Kapaarasia kaŋun kodekakin Kesekia nepetai atwanare, Kobu Isaia enabi okoku loka Amos mama ejai, kotema ŋes atiar, “Ebala EJAKAIT kwanata ebe, Kitemonok ekonitogo; naarai itwani, mam ijari.”

²Kosodi kibelok akekonyen arwatat, kilip EJAKAIT, kotema atiar,

³ “Kiitu kwape kwana, wu EJAKAIT, keŋaiŋait, kwape aloseneneo kakonyenekon kabeit ka etau loeteni, keswama nuejok kakonyenekon.” Komony noi Kesekia akiyo,

⁴Kosodi kanen, eroko Isaia elomuna alosit kidiŋ ore, kobu akirot naka EJAKAIT mama ejai ŋesi ebe,

⁵ “Koboŋo, kolimok Kesekia ekapolon loka ikatuŋa ebe, ‘Inera kwanata EJAKAIT, Edeke loka Daudi papaakon ebe, Eira ailipikon, aany akonikiyo: koany, ketaŋaleuni jo: apaaran nakiwuniet ŋes idokaria togo loka EJAKAIT.

⁶ Eyatakini da akonipaarasia ikar itomon ka lukany, ketajari jo ka ere kalo kakan naka ekabaka loka Asuria; egaŋi eoŋ ere lo kanukaŋ, ido kanuka Daudi ekakejaanakinan.’ ”

⁷Kotema Isaia atiar, “Koodutu araito nuka etini.” Koodutu kibwaikis abus, koŋaleu.

⁸Kotema Kesekia Isaia atiar, “Ani bo aanyunet naitejenuni ebe ketaŋaleuni EJAKAIT eoŋ, kasodi adokar togo loka EJAKAIT kapaaran nakiwuniet?”

⁹ Kotema Isaia atiar, “Na ŋes eraun aanyunet mamakon naebuni kama ejai EJAKAIT, ebe iswamai EJAKAIT ŋin naener: elosi kereka etolim kiŋaren ailameta atomon, arai bo eboŋori kau ailameta atomon?”

¹⁰Koboŋok Kesekia ebe, “Erai akirot naepatana aijesun ailameta atomon: mam, konye koboŋo etolim kau ailameta atomon.”

¹¹ Komonyak Isaia enabi EJAKAIT: kinyaka etolim kau ailameta atomon, nukejositor akoloŋ kailameta nuka Akas.

¹² Kapaarasia kaŋun kijukak Berodak-baladan okoku loka Baladan, ekabaka loko Babulon, Kesekia ibaluan ka ainakinet: naarai apupunit kwape adekar Kesekia.

¹³ Kopupok Kesekia kes, kitodik kes etogo kere loka iboroke luka akais nuipu, epuesa, ka esabu, ka lueuru maa, ka akinyet naka akais nuipu, ka etogo loka lujiisike, ka luadumuna koboroke luka akais nuipu: amamei ibore kotogoke karaida ayaetake kere, yenimam Kesekia etodikinit kes,

¹⁴Kosodi Isaia enabi abunore mama ejai ekabaka Kesekia, kotema ŋes atiar, “Anyoika nuabalasi ituŋa ŋul? Apote kai aponare mamakon?” Kotema Kesekia atiar, “Apote kakwap naelwana, Babulon.”

¹⁵Kotema atiar, “Inyo bo aanyut kotogokon?” Koboŋok Kesekia ebe, “Aanyut iboro kere luejass togoka: emamei ibore koboroka luka akais nuipu yenimam eoŋ etodikinit kes.”

¹⁶Kotema Isaia Kesekia atiar, “Kopupok akirot naka EJAKAIT.

¹⁷ Koany, eponito apaarasia, eyaŋaario kere luejaas togokon, ka ŋul kaluapotu lukapapaakon kiŋadata kiton lolo, Babulon: ebala EJAKAIT ebe, Emameun ibore yenepianun.

¹⁸ Eyaŋaarete da lukodwekon, lukiuriei ijo elop; eraunete ibwacin kotogo lokapolon loka ekabaka loko Babulon.”

¹⁹ Kosodi Kesekia atemar Isaia ebe, “Ejok akirot naka EJAKAIT nainera ijo.” Bobo da kotema atiar, “Mere kwaŋin, arai ejaunos ainapakin ka abeit kapaarasiaka?”

²⁰ Aswamisio ace nuka Kesekia, ka akegogoŋ kere, kwape abokia atapar, ka aleles, kitolom akipi ore, mam kereka iwadikatai oitabo loka aisiitonokin nuka ikabakan luka Yuda?

²¹Kojotoor Kesekia kalukapapaake: kirum Manase okokuke aiboisike.