Read Ateso 2 Ikabakan 22 Bible Online

2 Ikabakan 22 - Ateso bible

2 Ikabakan 22

¹ Kerai Yosia loka ikar ikanykauni egeuni airum; kirumak ikar akaisauni kalodiopet koYerusalem; ekiror loka totoke kerai Yedida akoku naka Adaia loka Bosukat.

² Kiswama nuejok kakonyen nuka EJAKAIT, kolosenenei korot kere loka Daudi papaake, komam epaari akan nakoteten karaida nakokediany.

³ Kosodi kanen kokaru lokitomonet kakanykauni loka ekabaka Yosia, kijuka ekabaka Sapan okoku loka Asalia, okoku loka Mesulam, ekewadikan, togo loka EJAKAIT, kobala ebe,

⁴ “Kodoka neejai Kilikia esasedoti lopeti, kimar apesan nueyaunitai togo loka EJAKAIT, nuejaununut ikagolok kotuŋa:

⁵ Kijaikis akan naka ikeswamak luiteete etogo loka EJAKAIT: koinakis ikeswamak luejaas togo loka EJAKAIT, aiteteunia etogo neetiyanara:

⁶Ikekeok akito, ka ikadukok, ka ikekeok amor: ido kanuka egwelet akito ka amor nuikec aiteteunia etogo.”

⁷ Konye mam apodos aimar apesan nukijaikinitai akanikec; naarai eswamaenenete kamunonut.

⁸ Kotema Kilikia esasedoti lopeti Sapan ekewadikan atiar, “Adum eoŋ eitabo loka ikisila kotogo loka EJAKAIT.” Kosodi Kilikia aijaikin Sapan eitabo, kosiom.

⁹Kobu Sapan ekewadikan neejai ekabaka, kinyakak ekabaka akiro, kobala ebe, “Akorasi ikonikejaanakinak apesan nuadumuna kotogo, ejaikis akan naka ikeswamak luiteete etogo loka EJAKAIT,”

¹⁰ Kosodi Sapan ekewadikan alimokin ekabaka ebe, “Kejaiki Kilikia esasedoti eitabo.” Kosiom Sapan kakonyen nuka ekabaka.

¹¹ Kosodi kanen, kiira ekabaka akiro nuka eitabo loka ikisila, kocil ikenapen.

¹²Kicorak ekabaka Kilikia esasedoti, ka Akikam, okoku loka Sapan, ka Akubor okoku loka Mikaia, ka Sapan ekewadikan, ka Asaia ekejaanakinan loka ekabaka, ebe,

¹³ “Koloto yesi, kiŋita EJAKAIT kanukaŋ, kanuka ituŋa da, ido kanuka Yuda kere, akiro nuka eitabo kalo loadumun: naarai epol anyunyura naka EJAKAIT nakinepak oni, naarai mam lukapapaawok apotu kopuput akiro nuka eitabo kalo, aiswamaenen kwape ejaatar kere nukiwadikakinio oni.”

¹⁴ Kosodi Kilikia esasedoti alosit, ka Akikam, ka Akubor, ka Sapan, ka Asaia, neejai Kulida anabi, aberu naka Salum okoku loka Tikuba, okoku loka Karukas, ekeŋadan inapen: (eboienenei ŋin koYerusalem katutubet nakiareit;) kinerut kaŋes,

¹⁵Kotema ŋesi kes atiar, “Inera kwanata EJAKAIT, Edeke loka Isirael ebe: ‘Kolimokis etuŋanan lokijukunit yes neajai ebe.

¹⁶ Inera kwanata EJAKAIT ebe, Koany, ayauni aronis aibois na, ka neejaas luiboiete kotoma, akiro kere nuka eitabo kaloasiomi ekabaka loka Yuda:

¹⁷ Naarai kajala, esupuruikis lukisupurununo odekesio ice, aitunyunyurikin eoŋ kaswam kere naka akaninikec; ŋes inepakinia akanyunyura aibois na, komam eduŋeori,

¹⁸ Konye ekabaka loka Yuda, lokijukuni aiŋitakin EJAKAIT, kolimokis ŋes kwanata ebe, Inera kwanata EJAKAIT Edeke loka Isirael ebe: Nuka akiro nukipupuni,

¹⁹ Kanu anonokiaror ekonitau, kitasonikin kakonyen nuka EJAKAIT, naipupunio nuenerak aibois na, ka luiboiete kotoma ebe, eluoros amejei ka aikenio, kocil ikoninapen, komony akiyo kakonyeneka; inera EJAKAIT ebe, Keira eoŋ da,

²⁰ Kanuka ŋun, koany, atukokini jo mama ejaas lukapapaakon, kitukokinio jo ailitikon inapakina, kwabo mam eanyunete akonikonye aronis kere naayauni aibois na.’ ” Kinyakakinai ekabaka akiro.