Read Ateso 2 Ikabakan 23 Bible Online

2 Ikabakan 23 - Ateso bible

2 Ikabakan 23

¹ Kijuka ekabaka, kotukonokinos imakio kere luka Yuda ka luka Yerusalem neejai.

² Kodoka ekabaka togo loka EJAKAIT, ka ituŋa kere luka Yuda ka lukiboiete koYerusalem nepepe kaŋes, ka isasedotin, ka inabin, ka ituŋa kere, ludidik ka lukapolok: kosiomak akiikec akiro kere nuka eitabo loka aitutuket loadumun kotogo loka EJAKAIT.

³ Kobwo ekabaka kaneejai epir, kitutuk aitutuket kakonyen nuka EJAKAIT, atupit EJAKAIT, airic aicorakinetake, ka aitejenunetake ka ikekisila, keketau kere, ka akeijar kere, aitogogoŋ akiro nuka aitutuket kana nuewadikatai oitabo lo: kitogogoŋoto ituŋa kere aitutuket.

⁴ Kicorak ekabaka Kilikia esasedoti lopeti, ka isasedotin luetupito, ka ikagolok aitolomun koyekalu loka EJAKAIT iboro kere lueswamao kanuka Baal, ka Asera, ka ajore kere naka akuj: kicwe kes kokiŋa ka Yerusalem komanikoria luka Kidiron, koyaŋa ekurwonikec Bet-el.

⁵ Kolema isasedotin luamaenenete aputosia, luatiakunete ikabakan luka Yuda aisupuruunun lukisupurununo kaiboisio nuiceleleete nukoreria luka Yuda, ka aiboisio nuerimorito Yerusalem; ŋul da luesupuruunokinete Baal, ka akoloŋ, ka elap, ka aacer, ka ajore kere naka akuj, lukisupurununo.

⁶ Kitolom Asera kotogo loka EJAKAIT, kiŋa ka Yerusalem, koyau aguurut Kidiron, kicwe ŋes kaguurut Kidiron, kicakacak kidupudupo, kiwelanak atesina nuka ituŋa kere.

⁷ Kotiyatiya itogoi luka iketepak ikiliok, luajaas togo loka EJAKAIT, nekesonyenenata aŋor aigalisio nuka Asera.

⁸ Kitolom isasedotin kere koreria luka Yuda, komunaa aiboisio nuiceleleete neesupuriononoto isasedotin lukisupurununo, anyoun koGeba kiton Beer-seba; kobilibil aiboisio nuiceleleete nukorutei nuajaas neelomarere orute loka Yosua ekayaiton loka ere, nuajaas akan nakokediany orute loka ere,

⁹ Konye mam apotu isasedotin luka aiboisio nuiceleleete kodokasi otem loka EJAKAIT Yerusalem, konye konyamenenete imugatin lumam itubuunitoi koinacanakec,

¹⁰ Komunaa da Topet, loajai aditot naka idwe luka Kinom, kinyek ituŋanan aicwe okokuke karaida akokuke araun asubanit mama ejai Molek.

¹¹ Kolema ibalasin luainakinito ikabakan luka Yuda akoloŋ, neelomarere togo loka EJAKAIT, eiduny kagola naka Natan-melek ebwacit, naapie kanen; kicwe agalin nuka akoloŋ kakim,

¹² Kobilibil ekabaka itemwan luajaas kuju kagola nakokuju naka Akas, luadukito ikabakan luka Yuda, ka itemwan luadukokinit Manase alaroi aarei nuka etogo loka EJAKAIT, komunyumuny kes kanen, kocakak aguurut Kidiron.

¹³ Komunaa ekabaka aiboisio nuiceleleete nuiteete Yerusalem, nuajaas akan nakoteten naka emoru loka amunaar, loadukokinit Solomon ekabaka loka Isirael Asitoret etal loka Isidonin, ka Kemos etal loka Moab, ka Milikom etal loka idwe luka Amon.

¹⁴ Kobilibil ipirin, kojepejep Asera, kileleb aiboisiokec akojo nuka ituŋa.

¹⁵ Bobo da etem loajai Bet-el, ka aibois naicelelei naabu Yeroboam okoku loka Nebat, loetidiaki Isirael koduk, kobilibil etem ŋol ka aibois naicelelei; kicwe aibois naicelelei kicakacak kidupudupo, kicwe da Asera.

¹⁶ Kosodi koŋolia Yosia kau, koany atesina nuajaas nen moru; kijuka, kolemunai akojo katesina, kicwe kes kotem, komunaa ŋes, kwape ajaar akirot naka EJAKAIT naalimori etuŋanan loka Edeke, loalimori akiro ŋun,

¹⁷Kosodi ŋesi atemar atiar, “Anyoin aiitunet ŋin naany?” Kolimokis ŋes ituŋa lukore kaŋol ebe, “Ŋes ates naka etuŋanan loka Edeke, loabuni koYuda, kolimok akiro nu nuiswamak ijo etem loka Bet-el.”

¹⁸Kotema atiar, “Kinyeisi ŋes; kinyek etuŋanan kere akutun akekojo.” Kosodete kinyeinai akekojo nepepe kakojo nuka enabi loabuni koSamaria.

¹⁹ Kolema Yosia abilai kere nuka aiboisio nuiceleleete nuajaas oreria luka Samaria, nukedukete ikabakan luka Isirael aitunyunyurikin EJAKAIT, kiswamak kes kwape ajaatar aswamisio kere nueswamat koBet-el.

²⁰ Koarak otemwan isasedotin kere luka aiboisio nuiceleleete luajaas nen, kicwe akojo nuka ituŋa kotemwan kaŋul; koboŋo Yerusalem.

²¹ Kicorak ekabaka ituŋa kere ebe, “Korica Aleleŋio mama ejai EJAKAIT Ekusideke, kwape ewadikatere oitabo lo loka aitutuket.”

²²Abeit mam aricito Aleleŋio naikoni nen ageun kapaarasia nuka ikatubok luatubonokinete Isirael, karaida apaarasia kere nuka ikabakan luka Isirael, karaida nuka ikabakan luka Yuda.

²³Konye kokaru lokitomonet kakanykauni loka ekabaka Yosia korica Aleleŋio ŋin mama ejai EJAKAIT koYerusalem.

²⁴ Bobo da, kolema Yosia ŋul kere luajaas ajokin, ka imurwok, ka aputosia nuka idekesio, ka aputosia, ka italesia kere, luatakanunete kakwap naka Yuda, ka Yerusalem, tetere itogogoŋi akiro nuka ekisil nuewadikatai oitabo loadumuni Kilikia esasedoti kotogo loka EJAKAIT.

²⁵ Emamei ekabaka kaluageikinete ŋes luaputos kaŋes, loebelokina mama ejai EJAKAIT keketau kere, ka akeijar kere, ka akegogoŋ kere, kwape ejaatar ikisila kere luka Musa; akauloke da mam enyounit ediopet loeputos kaŋes.

²⁶ Konye mam abu EJAKAIT kibelokin kadedeŋ naka akenyunyura naepol, naabu kinep anyunyurikin Yuda, kanuka aitunyunyurikin kere naka Manase naetunyunyurikinitor.

²⁷ Kotema EJAKAIT atiar, “Alemari Yuda da kakonyeneka, kwape alemaria Isirael, acakari ere ka loaseunit, ŋes Yerusalem, ka etogo loabu kener ebe, Iboieaenei ekakiror kanen.”

²⁸Aswamisio ace nuka Yosia, ka nuabu kiswama kere, mam kereka iwadikatai oitabo loka aisiitonokin nuka ikabakan luka Yuda?

²⁹ Kapaarasiake koloma Parao-neko ekabaka loko Misiri asurokin ekabaka loka Asuria ocor Eupurat; kolot Yosia asurokin ŋes; koarak Megido, kedau aanyun ŋes.

³⁰ Kodakasi ikekejaanakinak aketes kagali anyoun koMegido, koyaut ŋes Yerusalem, kidaikis ailitike. Koyaata ituŋa luka akwap Yekoakas okoku loka Yosia, kinyonyoikis ŋes akinyet, kitaraut ŋes ekabaka aibois naka papake.

³¹ Kerai Yekoakas loka ikar akaisaarei ka luuni egeuni airum; kirumak ilapio iuni ko Yerusalem; ekiror loka totoke kerai Kamutal akoku naka Yeremia loka Libuna.

³²Kiswama nueroko kakonyen nuka EJAKAIT, kwape ajaatar kere nukiswamato lukapapaake.

³³ Koen Parao-neko ŋes koRibula akwap naka Kamat, kinyek airum koYerusalem; kotubok akwap esolo loka atalatan akwatat nuka epuesa, ka atalata adiopet naka esabu.

³⁴ Kitarau Parao-neko Eliakim okoku loka Yosia ekabaka aibois naka Yosia papake, kilocok ekekiror komaik Yekoiakimr konye koyaŋa Yekoakas; kobu Misiri, kotwanik ŋina.

³⁵ Koinak Yekoiakim Parao epuesa ka esabu; konye kotubok akwap iboro ainakin apesan kwape ecorakinia Parao: kitelem epuesa ka esabu kotuŋa luka akwap, kaŋinituŋanan kwape ejaar esoloke, ainakin Parao-neko.

³⁶Kerai Yekoiakim loka ikar akaisaarei ka lukany egeuni airwn; kirumak ikar itomon ka lodiopet koYerusalem: ekiror loka totoke kerai Sebida akoku naka Pedaia loka Ruma.

³⁷Kiswama nueroko kakonyen nuka EJAKAIT, kwape ejaatar kere nukiswamato lukapapaake.