Read Ateso 2 Ikabakan 25 Bible Online

2 Ikabakan 25 - Ateso bible

2 Ikabakan 25

¹ Kipaliik Sedekia ekabaka loko Babulon. Kosodi kanen kokaru lokikanyetekaoŋon loka airumuke, kolap lokitomonet, kapaaran nakitomonet naka elap kobu bobo Nebukadenesar ekabaka loko Babulon, ŋes ka akejore kere, asurokin Yerusalem, kidukuroto airigaun ŋes; kitutuoto itutio lujiis.

²Kwaŋin kirigaut ere aitodol okar lokitomonet ka lodiopet loka ekabaka Sedekia.

³Kapaaran nakikanyetekaoŋon naka elap kalokiwoŋonet, kodedeŋar eteŋei kore, komamikis cut ituŋa luka akwap inyamat.

⁴ Kosodete kotiyasi arorwa kore, kokera ikajiok kere kuare korot loka erute loejai kidiŋ arwatatin aarei, loidunyas kemanikor loka ekabaka: (konye erimorito Ikaludean, asurokin ere iwaitin kere:) kitor ekabaka orot loka Araba.

⁵Konye korukio ajore naka Ikaludean ekabaka, kodolokis ŋes kapuutona nuka Yeriko: kisiarakin ajoreke kere aijal ŋes.

⁶ Kosodete kikamas ekabaka, koyaŋaasi neejai ekabaka loko Babulon Ribula; kotubokinai akiro,

⁷ Koarakinai odwe luka Sedekia akonyeneke, kogorununoi Sedekia akonye, koenai kirikoi, koyaŋaarai Babulon.

⁸ Kosodi kolap kalokikanyet, kapaaran nakikanyetekaarei naka elap, ŋes ekaru lokitomonet kakanykaoŋon loka Nebukadenesar ekabaka loko Babulon, abu Nebusaradan ekapolon loka ikedarak, ekejaanakinan loka ekabaka loko Babulon kobu Yerusalem:

⁹ Kicwe etogo loka EJAKAIT, ka etogo loka ekabaka; itogoi kere lukotoma Yerusalem, ŋolitogo kere loepol, kicweikin kakim.

¹⁰ Abu ajore kere naka Ikaludean luajaas kalokapolon loka ikedarak, kotiyatiya arwatatin nuka Yerusalem airiamar.

¹¹ Aatoŋot naka ituŋa lukideuna kore, ka ŋul da lualuŋakina, lualuŋakina mama ejai ekabaka loko Babulon, ka aatoŋot naka ikeswamak, kijoreo Nebusaradan ekapolon loka ikedarak,

¹² Konye kitasal ekapolon loka ikedarak lukican noi kakwap araut iketemonokinok emusabibu ka ikakoriok du.

¹³ Kobilibilata Ikaludean ipirin luka aisinin lukejaas togo loka EJAKAIT, ka aicegeria, ka aŋolol naka aisinit nukejaas togo loka EJAKAIT, koyaŋaasi aisininikec Babulon.

¹⁴ Koyaŋaasi amoti, ka iŋitia, ka aitudeŋeta, ka akaalei, ka iboro kere luka aisinit lukijaanakiniata:

¹⁵ Ka atiboka nuigaete ekurwon, ka atanyia; nukeraas nuka esabu, esabu, ka nukeraas nuka epuesa, epuesa, kwaŋin ayaŋaaria ekapolon loka ikedarak.

¹⁶Ipirino iarei, ka aŋolol adiopet, ka aicegeria, lueswamakinit Solomon etogo loka EJAKAIT; aisinin nuka iboro kalu kere mam kepedorete ainiŋio.

¹⁷Aojau naka epir ediopet kerai ikubitin itomon ka lukanykauni, kejai akou naka aisinit kokujuke; aojau naka akou adiopet ikubitin iuni; kolukunito iboyan ka akamamagan akou, kere luka aisinit: ekoni epir lokiareit nepenen kaswam naka iboyan.

¹⁸ Kosodi ekapolon loka ikedarak kikama Seraia esasedoti lopeti, ka Sepania esasedoti lokiareit, ka ikagolok luuni;

¹⁹ Kikama kore ekapolokiton lokeyait ikajiok; ka ituŋa ikany kaŋul lukeanyununete akonyen nuka ekabaka, lukedumunio kore; ka ekewadikan, ekapolon loka ajore, loaramununei ituŋa luka akwap; ka ituŋa akaisakanykape luka ituŋa luka akwap lukedumunio kore.

²⁰Kikama Nebusaradan ekapolon loka ikedarak kes, koyau mama ejai ekabaka loka Babulon Ribula.

²¹ Kodany ekabaka loko Babulon kes, koarak Ribula akwap naka Kamat. Kwaŋin kijoreoroi Yuda anyoun kakwapuke.

²² Ituŋa da luasalete kakwap naka Yuda, luabu Nebukadenesar kinyek, koinak ŋul Gedalia okoku loka Akikam, okoku loka Sapan araun ekayaitonikec.

²³Kepuputu ikapolok kere luka irioŋeta, kes ka ituŋakec, ebe, kitarau ekabaka loko Babulon Gedalia ekayaiton, kopotu mama ejai Gedalia Misipa, Isimael okoku loka Netania, ka Yokanan okoku loka Karea, ka Seraia okoku loka Tanumet Enetopatit, ka Yaasania okoku loka Emaakatit, kes ka ikecetuŋa.

²⁴ Kiyapoik Gedalia kes ka ikecetuŋa, kotema kes atiar, “Sirikiyoŋa kanuka ikejaanakinak luka Ikaludean: kiboikinos akwap, kijaanakis ekabaka loko Babulon, ijaunete do ejok.”

²⁵ Konye kolap lokikanyetekaarei, kobu Isimael okoku loka Netania, okoku loka Elisama, loka aur naka ekabaka, ka ituŋa itomon nepepe kaŋes, kicuma Gedalia, kotwana, ka Iyudayan ka Ikaludean luajaas kaŋes Misipa,

²⁶ Konyout ituŋa kere, ludidik ka lukapolok ka ikapolok luka irioŋeta, kopotu Misiri; naarai kokuriakata Ikaludean.

²⁷ Kosodi kanen okaru loka akaisauni ka lukanykaarei loka aenio naka Yekoiakin ekabaka loka Yuda, olap lokitomonet kaarei, kapaaran nakakaisaarei ka nukanykaarei naka elap, kitopoloo Ebil-merodak ekabaka loko Babulon akou naka Yekoiakin ekabaka loka Yuda, alemun kaidaris kokaru loageunia airum.

²⁸ Kinera kaŋes nukasianut, kitopolo eicoloŋoke aitelekarit iicoloŋo luka ikabakan lukejaas kaŋes Babulon.

²⁹ Kilocok inapeneke luka aidaris, konyamenenei inyamat kakonyeneke apaarasia kere nuka aijarake.

³⁰Akorakineteke, abu ekabaka koinanak ŋes akorakinet ŋinipaaran, apaarasia kere nuka aijarake.