Read Ateso 2 Ikabakan 4 Bible Online

2 Ikabakan 4 - Ateso bible

2 Ikabakan 4

¹ Kiworo aceberu kaŋor nuka odwe luka inabin mama ejai Elisa, kotema atiar, “Atwana ekonikejaanakinan okilenika: ijeni ijo da ebe abu ekejaananikon koyoŋite EJAKAIT: abu lokapesen ayaŋaar ikadwe iarei araun ibulesinike.”

² Kotema Elisa ŋes atiar, “Anyoika keswamakini jo? Kolimokinai; inyo bo ejai kajo togo?” Kotema atiar, “Emamei akonikejaanakinan ibore kotogo, dimarai amot naka akinyet.”

³ Kosodi ŋesi atemar atiar, “Kolot, kilipu ikoniidunyeta kere lukirimorito amoti, amoti nuemameete iboro kotoma; sirikilipu nuikidioko.

⁴Ilomari, igolor ijo ka ikonidwe, kobukonok akinyet amoti ŋun kere; kiŋadanari nuilelebunos awai.”

⁵Konyou ŋin kama ejai ŋesi, kogolor ŋes ka odweke iarei; koinununut ŋes amoti, kobukonokini.

⁶ Kosodi kanen, kilelebunos amoti, kotema ŋin okokuke atiar, “Koinunai aeemot.” Kotema ŋes atiar, “Emamei bobo amot.” Kosaŋak akinyet.

⁷ Kosodi ŋin abunore alimokin etuŋanan loka Edeke. Koboŋok ŋesi atiar, “Kolot, kogwela akinyet, kotac apesenekon, ido luideunos kojariata ijo ka ikonidwe.”

⁸ Kosodi apaaran adiopet, kitor Elisa Sunem, nekejai aberu nakapolon; kimaima ŋes ainyam atap. Kosodi kanen, naetorenenoo, kopaanari nen ainyam atap.

⁹ Kotema ŋin okilenike atiar, “Koany, amisiik eoŋ lo erai etuŋanan lokalaunan loka Edeke, loitorenenei ne tiritir.

¹⁰ Keŋaiŋait, kadukokis ŋes igola karwatat; kebwaikis nen kanuke eitada, ka emesa, ka eicoloŋ, ka epir loka atala: tetere naebunenenoo ŋesi mamawok, kopauni nen.”

¹¹Kosodi apaaran adiopet, kobu ŋesi nen, kopau agola koper nen.

¹²Kotema ŋesi Gekasi ekejaanakinanike atiar, “Konyarau Asunamit ŋin.” Kosodi kenyaraun, kobwo kakonyeneke.

¹³Kotema ŋes atiar, “Kolimok ŋin ebe, Koany, kibuak ijo sio kaibuakin naetia netine; inyo bo do kiswamakinio jo? Ikoto aitodiario mama ejai ekabaka arai bo mama ejai ekapolon loka ajore?” Koboŋok ŋin ebe, “Eboie eoŋ kotuŋaka.”

¹⁴Kotema atiar, “Aso inyo bo do kiswamakinio ŋes?” Koboŋok Gekasi ebe, “Abeit emamei ŋes ikoku yenitelepat, emojoŋit da okilenike.”

¹⁵Kotema atiar, “Konyarau ŋes.” Konyarau, kobwo ŋin kokek.

¹⁶ Kotema ŋesi atiar, “Kapak kana, kedol ekaru, ituni ikoku yenitelepat.” Kotema ŋin ŋes atiar, “Mam, ekajakait, ijo etuŋanan loka Edeke, sirikiŋal akonikejaanakinan.”

¹⁷Kopotuu aberu, kouri ikoku yenitelepat kapak kaŋin kedol ekaru, kwape alimokinia Elisa ŋes.

¹⁸Kosodi kepoloor ikoku, adiopepaaran, kolot mama ejai papake mama ejaas ikadwenyak.

¹⁹Kotema ŋesi papake atiar, “Akouka, akouka.” Kotema ekejaanakinanike atiar, “Kodaka ŋes mama ejai totoke.”

²⁰Keyaŋaa, kitodol mama ejai totoke, kiboikin akuŋinike aitodol kidiŋ paaran, kotwana.

²¹Kodoka ŋin, kiperik oitada loka etuŋanan loka Edeke, kogolok ekek, koloma kiŋa.

²²Kiworo okilenike kotema atiar, “Keŋaiŋait, kijukakinai ediopet kokejaanakinak, ka adiopet kasigirian, kakeria mama ejai etuŋanan loka Edeke, kaboŋu.”

²³Kotema atiar, “Kanukinyo ikotor alosit neejai ŋesi lolo? Mam erai ailamun naka elap karaida nakasabato.” Kotema ŋin atiar, “Nukajokak.”

²⁴Kosodi ŋin aipet lupetan asigiriake, kotema ekejaanakinanike atiar, “Kireŋea, kiyatak alosit; sirikiyap aibwanen, dimarai kaalimok jo.”

²⁵ Kolot do, kodol mama ejai etuŋanan loka Edeke omoru Karamel. Kosodi kanen, keany etuŋanan loka Edeke ŋes elwana, kotema Gekasi ekejaanakinanike ebe, “Koany, ejai Asunamit ŋina:

²⁶Keŋaiŋait, koker airiamakin kaŋes, kiŋit ŋes atiar, Ijai ejok? Okilenikon da ejok? Ikoku da ejok?” Koboŋok ŋin atiar, “Ejokuka.”

²⁷ Kedolo ŋesi mama ejai etuŋanan loka Edeke koukot, kitiŋ akejeke. Kikunyak Gekasi aremor ŋes; konye kotema etuŋanan loka Edeke atiar, “Kinyek: naarai ekadakinit eketau; kemunonikinit EJAKAIT, mam kalimokinit eoŋ.”

²⁸Kosodi ŋin atemar atiar, “Abu eoŋ kakoto ikoku yenitelepat kama ejai ekajakait? Mam abu katema atiar, Sirikiiŋala?”

²⁹ Kosodi ŋesi atemar Gekasi atiar, “Koen aŋabetekon, kitiŋ ebelaka akanikon, kolot: arai kiriamunos kituŋanan kere, sirikiyoga ŋes; arai kiiyoga ituŋanan, sirikiboŋok: kibwaik ekabela akonyen nuka ikoku.”

³⁰ Kobala toto naka ikoku ebe, “Kwape ejaria EJAKAIT, kwape ejaria ekonitau da, mam kajali jo.” Konyou ŋesi, kotupa ŋin.

³¹ Kotubor Gekasi kiŋarenikec, kibwaik ebela akonyen nuka ikoku; konye amamei eporoto karaida apupun, Kanuka ŋun koboŋo airiamakin kaŋes, kolimok ebe, “Mam ikoku ekwenyunit.”

³²Keloma Elisa togo, koany, atwana ikoku, kiperikinitete oitadake.

³³ Koloma do kogoloros kes iarei, kilip EJAKAIT.

³⁴ Kolot, koper ebuburia kakuan naka ikoku, kibwaik akeituk aituk naka ikoku, akonyeke da akonyeke, akaninike da akaninike: koriori kama ejai ikoku; komwanu akuan naka ikoku.

³⁵ Kosodi ŋesi aboŋor, koriaria kotoma togo; kodoka koriori kama ejai ikoku: kikaresio ikoku irwan akanykaarei, kokweny ikoku.

³⁶Konyarau Gekasi, kotema atiar, “Konyarau Asunamit ŋin,” Konyarau ŋes, Keloma ŋin mamake, kotema atiar, “Kodaka ikonikoku.”

³⁷ Kosodi ŋin alomun, kisudede kakejeneke, kokukum kwap; kodak okokuke, koloma.

³⁸ Kobu Elisa bobo Giligal: kojai ebeli akwap; kiboikinos odwe luka inabin kakonyeneke: kotema ŋesi ekekejaanakinan atiar, “Kidoroki akeit, kipoik odwe luka inabin atap.”

³⁹ Koloma ediopet omanikor aide edia, kodum emusabibu loka ais, kodeŋ imonyono luka ais kotunite kogoe, kobu kogetanak kes toma akeit naka atap: naarai mam ajenete kes.

⁴⁰ Kodutakinai ituŋa ainyam. Kosodi kanen, enyamete, kiworoto ebe, “Wu okwe, etuŋanan loka Edeke, ejai atwanare toma akeit ŋin,” Mam apotu kopedosi ainyam.

⁴¹ Konye kotema ŋesi atiar, “Koyautu akiria.” Kocakak akeit; kotema atiar, “Kodutakisi ituŋa, konyama.” Kemamei bobo aronis kotoma akeit.

⁴² Kobu etuŋanan ebuni koBaal-salisa, koinu etuŋanan loka Edeke inyamat luegeete, imugatin akaisaarei luka asairi, ka aluŋuren nukitetiak nuka akima kopukoke, Kotema atiar, “Koinak ituŋa, konyama.”

⁴³ Kotema ekejaanakinanike atiar, “Okwe! ebwaikini lu akonyen nuka ituŋa akwatat?” Konye kotema atiar, “Koinak ituŋa konyama; naarai inera EJAKAIT kwanata ebe, Enyamete, kideut.”

⁴⁴ Kibwaik akonyenekec, konyamata kideutu, kwape ajaar akirot naka EJAKAIT.