Read Ateso 2 Ikabakan 6 Bible Online

2 Ikabakan 6 - Ateso bible

2 Ikabakan 6

¹ Kotemasi odwe luka inabin Elisa atiar, “Koany, edidiŋ aibois nekiboio isio kakonyenekon.

²Kiŋaiŋait, kaloto Yorodan, kojepu ŋolituŋanan atekat, kadukioto ŋina aibois nekiboio.” Koboŋok ŋesi ebe, “Koloto yesi.”

³Kotema ediopet atiar, “Keŋaiŋait, kiyu, kouparos kikonikejaanakinak.” Koboŋok ebe, “Kiupari.”

⁴Kosodi aupar kakes. Kedoloto Yorodan, kojepa akito.

⁵Konye napejepi ediopet atekat, kidotun aep kodo akipi: komony kotema atiar, “Wu okwe, ekajakait! Naarai erai ailipuna.”

⁶ Kotema etuŋanan loka Edeke atiar, “Ai bo adoo?” Kitodik ŋes aibois. Kojepu akitoi, kocakak nen, kisilepu asuat.

⁷Kotema atiar, “Kolem,” Korio akekan, kolem.

⁸Kosodi kojioto ekabaka loka Suria ka Isirael; kinerut kikekejaanakinak atiar, “Abore kamutan ŋes ejaikin ekaswam.”

⁹ Kiyakik etuŋanan loka Edeke ekabaka loka Isirael kinera atiar, “Kocoite kinyek aitor abore kamutan naarai itorete Isurian ŋina.”

¹⁰Kijuka ekabaka loka Isirael toma aibois ŋin naalimokini etuŋanan loka Edeke ikwenyari; koku kaŋina, mere irwan atipet karaida aarei.

¹¹Kosodi kiyaloŋoŋ noi ekabaka loka Suria kotauke kanuka akirot kaŋin; konyarau ikekejaanakinak kotema kes atiar, “Mam kitejenunete eoŋ ediopet kaoni loejai kanuka ekabaka loka Isirael?”

¹²Kotema ediopet kokejaanakinakake atiar, “Mam ekajakait, wu ekabaka; konye Elisa enabi loejai koIsirael ŋes elimonokini ekabaka loka Isirael akiro nuinera ijo kagolakon.”

¹³ Kotema atiar, “Koloto koanyutu neejai, kejuka koomai.” Kolimokinai ebe, “Koany, ejai Dotan.”

¹⁴Kosodi kijuka ibalasin ka agalin, ka ajore naepol: kopotu kuare kirigaut ere.

¹⁵ Kosodi ekejaanakinan loka etuŋanan loka Edeke nakenyou tupuruc, koloma, koany, ajore ka ibalasin ka agalin irigaunito ere. Kotema ekekejaanakinan ŋes atiar, “Itukwi, ekajakait! Kekwaikis ai?”

¹⁶ Koboŋok ebe: “Sirikikurianar: naarai ipu ŋul lueja kaoni adepar luejaas kakes.”

¹⁷ Kilip Elisa kobala ebe, “Wu EJAKAIT, keŋaiŋait, kitwekeny akekonye tetere eanyuni.” Kosodi kitwekeny EJAKAIT akonye nuka etelepat; koany; ido koany, ileleba eroŋat ibalasin ka agalin nuka akim irimorito Elisa.

¹⁸ Kikokororos kesi neejai ŋesi, kilip Elisa EJAKAIT, kotema atiar, “Keŋaiŋait kitumudak akonye nuka ituŋa kalu.” Kitumudak akonyekec kwape ajaar akirot naka Elisa.

¹⁹Kotema Elisa kes atiar, “Mere lo ŋes erot, ido mere lo ŋes ere: kotupunai, ketodoli eoŋ yes mama ejai etuŋanan loimoete.” Koyaŋa kes Samaria.

²⁰Kosodi kanen, kedoloto Samaria, kotema Elisa atiar, “EJAKAIT, kitwekeny akonye nuka ituŋa kalu, koanyut.” Kitwekeny EJAKAIT akonyekec, koanyutu; ido koany, kejaas toma Samaria.

²¹ Keanyu kes, kotema ekabaka loka Isirael Elisa atiar, “Ipapa, adanyi kes? Adanyi kes?”

²² Koboŋok ebe, “Mam idanyi kes: ikoto kereka aidany ŋul luiŋatu kekonikileŋ ka akabwakon? Kibwaik atap ka akipi akonyenekec, konyama komata, koboŋosi mama ejai ejakaitikec.”

²³ Kipoik kes inyamat luipu: kedautu ainyam ka aimat, kotwara kes, koloto mama ejai ejakaitikec, Mam bobo apotu irioŋeta luka Suria kopotu akwap naka Isirael.

²⁴Kosodi kanen, kokau kaŋun, kotukonok Ben-kadad ekabaka loka Suria ajoreke kere, kodoka, kirigau Samaria.

²⁵ Kojai ebeli loededeŋ toma Samaria: ido koany, kirigaut, aitodol neagwelariata akou naka asigiria atutubeta akaisakanykauni nuka epuesa, ka atutubet nakiwoŋonet naka aoret naka ajele atutubeta akany nuka epuesa,

²⁶Nakitoritor ekabaka loka Isirael arwatat, komonyak aberu ŋes, kotema atiar, “Kiŋarakinai, ejakaitika, wu ekabaka.”

²⁷Kotema atiar, “Arai mam EJAKAIT kiŋarakini jo, alemuni eoŋ kai lukeŋarakinia jo? Opejal arai bo acuet ebino?”

²⁸ Kotema ekabaka ŋes atiar, “Anyoika bo?” Koboŋok ebe, “Abu aberu na katema eoŋ atiar, ‘Kopala ikokukon, kanyama ŋes lolo, kinyami yenika da moi.’

²⁹ Kipou kepooto ikokuka, kanyama: kasodi eoŋ atemar ŋes kapaaran nakiareit ebe, ‘Kopala ikokukon, kanyama.’ Konye ebwa ŋesi ikokuke.”

³⁰ Kosodi kanen, kepupu ekabaka akiro nuka aberu, kocil inapeneke; ido etorit ŋesi arwatat; kosesenete ituŋa, ido koany, kenapit epuko kakuanake.

³¹ Kosodi ŋesi atemar atiar, “Keswamak Edeke eoŋ kwaŋin, ka adepar da, arai esalakini akou naka Elisa okoku loka Sapat mama ejai ŋesi lolo.”

³² Konye kiboie Elisa kotogoke, kiboiete imakio da kaŋes; kiyakia ekabaka etuŋanan anyoun kamakeŋ: konye eroko edolo ekiyakia mama ejai, kotema ŋesi imakio atiar, “Ianyutu yesi okoku lo loka ekaaran kwape eyakuunia ajepar akouka? Aso do, naebunio ekiyakia, kogolokisi ekek, kotikokis: mam kituikitui naka akeje nuka ejakaitike ejai kauke?”

³³ Eroko inera kakes, koany, kodol ekiyakia mama ejai: kotema atiar, “Koany, aronis na erai naka EJAKAIT; kanukinyo bo edaritor EJAKAIT?”