Read Ateso 2 Ikabakan 7 Bible Online

2 Ikabakan 7 - Ateso bible

2 Ikabakan 7

¹ Kotema Elisa atiar, “Kopupokisi akirot naka EJAKAIT: inera EJAKAIT kwanata ebe, Moi kwape tinenikwana egwelario aitemis naka akiria nuidicic esekel, * ka aitemisio aarei nuka esairi esekel, korute loka Samaria.”

² Kosodi ekapolon loagoŋanakin ekabaka akanike aboŋokin etuŋanan loka Edeke ebe, “Koany, arai kiswama EJAKAIT apedon toma akuj, tikepedoo akirot ŋin ajaut?” Kotema atiar, “Koany, ianyuni kakonikonye konye mam inyami.”

³ Kojaas ituŋa iwoŋon lukatapon neelomarere korute: kotemanaros atiar, “Kanukinyo kiboio oni kane aitodol nekitwakia?

⁴ Arai kiitema atiar, Kalomasi ore, ejai ebeli ore, kitwakikini nen: arai kiiboikini nepene kitwaki. Aso do kaloto, kaluŋakinos ajore naka Isurian: arai kiitajarata oni, kijari; arai kijarata, kitwaki do.”

⁵Konyout nape imuki alosit oidukurun luka Isurian: kedoloto ariri naka iidukurun luka Isurian, koany, kemamei ediotuŋanan.

⁶ Naarai abu EJAKAIT kisiira ajore naka Isurian aruo naka agalin, ka aruo naka ibalasin, aruo naka ajore naepol: kotemanaros atiar, “Koany, ebooleikis ekabaka loka Isirael ikabakan luka Ikitin ka ikabakan luka Imisirian aitiji oni,”

⁷ Kanuka ŋun konyout kokerata nape imuki, kinyeikis iwemanakec, ka ibalasinikec, ka asigirianakec, kwape ajaatar Iidukurun, kokerata kanuka akeceijar.

⁸Kedoloto lukatapon ŋul ariri naka iidukurun, kolomasi owema ediopet, konyama komata, kolemut epuesa ka esabu ka inapen, koloto kibwaata; koboŋut, kolomasi owema ece, kolemut kanen da, koloto kibwaata.

⁹ Kosodete atemanar atiar, “Mam kiswamai nuejok: lolo ŋes apaaran naka akiro nuejok, oni da kililiŋi: arai kiidara kiwala akwap, kidolokini oni aiticanio: aso do kopotu, kaloto kalimokis lukokal loka ekabaka.”

¹⁰Kopotu kiworoto ekagolon loka ere: kolimonokis kes ebe, “Kidolo isio oidukurun luka Isurian, ido koany, amamei etuŋanan, karaida eporoto loka ituŋanan, konye ibalasin eenen, ka asigirian eenen, ka iweman da kwape kwaŋin.”

¹¹Konyarau ikagolok; kolimokis lukokal loka ekabaka lukotoma.

¹²Konyou ekabaka kuare, kotema ikekejaanakinak atiar, “Kekwenyari yes nukiswamakis Isurian oni. Ejenete kesi ebe kiriebi oni eteŋei; kanuka ŋun ŋes alomariata koidukurun aiŋop ais, kobalas ebe, ‘Kelomut kore, kaŋatasi ejarete, kilomari do ore.’ ”

¹³Koboŋok ediopet kokejaanakinakake kotema atiar, “Keŋaiŋait, koyaŋaasi icetuŋa ibalasin ikany luedeunos, luesalito ore, (koany, esubito kesi bala ekodet kere loka Isirael loedeun kaŋes; koany, esubito bala ekodet kere loka Isirael loamudiar:) kejukasi, kaanyutu.”

¹⁴Kosodete koyaŋaasi agalin aarei kibalasin; kijuka ekabaka atupar ajore naka Isurian, kobala ebe, “Koloto, koanyut.”

¹⁵Kibwapakis kes aitodol Yorodan: ido koany, eleleba erot inapen ka iboro, luacakanarete Isurian iwonyete, Koboŋut ikiyakia, kolimokis ekabaka.

¹⁶ Kolomut ituŋa, koŋata iidukurun luka Isurian. Kogwelanarai do aitemis naka akiria nuidicic esekel, ka aitemisio aarei nuka esairi esekel, kwape ajaar akirot naka EJAKAIT,

¹⁷ Kodakak ekabaka ekapolon loagoŋa kin* (esekel ŋes apesa) ekabaka akanike apolokin erute: kicakacakata ituŋa ŋes korute, kotwana kwape abalar etuŋanan loka Edeke, loenera kelot ekabaka mama ejai.

¹⁸ Kosodi kanen, kwape abalar etuŋanan loka Edeke ekabaka ebe, “Aitemisio aarei nuka esairi esekel, ka aitemis naka akiria nuidicic esekel, ejaun kwaŋin korute loka Samaria moi kwape tinenikwana.”

¹⁹Abu ekapolon ŋol Koboŋok etuŋanan loka Edeke kotema atiar, “Koany, arai kiswama EJAKAIT apedon toma akuj, tikepedoo akirot ŋin ajaut?” Kobala ebe, “Koany, ianyuni kakonikonye, konye mam inyami.”

²⁰ Kodolok ŋes kwaŋin; naarai kicakacakata ituŋa ŋes korute, kotwana.