Read Ateso 1 Aisiitonokin 13 Bible Online

1 Aisiitonokin 13 - Ateso bible

1 Aisiitonokin 13

¹ Kinerut Daudi ka ikapolok luka ilukumin ka luka akwatat, kes ikeŋarenok kere.

² Kotema Daudi atukot kere naka Isirael atiar, “Arai itojokito yesi, arai da erai naka EJAKAIT Ewokodeke, kejukasi anatar iinacanawok luideuna kakwap kere naka Isirael, lukejaas kisasedotin ka Ilebin oreriakec luejaas ironyia, kotukunos mamawok:

³ Kenyakut bobo asaduku naka Edekewok mamawok: naarai mam kipou keŋitununiata ŋes kapaarasia nuka Saul.”

⁴Kobala atukot kere ebe tikiswama kwaŋin: naarai ebecokino akirot kakonyen nuka ituŋa kere.

⁵ Kotukok Daudi Isirael kere, anyoun koSikor aguurut naka Misiri kiton neelomarere Kamat, ayaun asaduku naka Edeke aitonyoun koKiriat-yearim.

⁶ Kodoka Daudi, ka Isirael kere, Baala, ŋes Kiriat-yearim, lokerai loka Yuda, aitonyoun kaŋina asaduku naka Edeke, EJAKAIT loiboikini ikerubin, naenyaritai Ekekiror.

⁷ Kodakutu asaduku naka Edeke kagali nakitetet, alemun kotogo loka Abinadab; kireŋeata Usa ka Akio agali.

⁸ Kikosi Daudi ka Isirael kere kakonyen nuka Edeke kagogoŋukec kere: kikososinei, ka adeudeun, ka isabulin, ka isiman, ka ikacwi, ka arupepen da.

⁹ Nakedolioto kesi opejal loka Kidon, korio Usa akekan aitiŋ asaduku; naarai apotu kiguikis imoŋin.

¹⁰ Kinep anyunyura naka EJAKAIT aluikin Usa, kinom ŋes, naarai ariori akekan mama ejai asaduku: kotwana kanen kakonyen nuka EJAKAIT.

¹¹Kokadak Daudi, naarai acil EJAKAIT Usa; komaik aibois ŋin Peres-usa, [1] kiton lolo.

¹²Kokurianar Daudi EJAKAIT kapaaran ka ŋin ebe, “Ekonakini ai ayaun asaduku naka EJAKAIT ore mama ajai?”

¹³Kwaŋin mam Daudi abu koyau asaduku mamake ore loka Daudi, konye abu kitapaa adakar ŋes togo loka Obed-edom Egitit.

¹⁴ Kosalak asaduku kokale loka Obed-edom togoke ilapio iuni: kisirereŋ EJAKAIT etogo loka Obed-edom ka luajaatar kere.