Read Ateso 1 Aisiitonokin 15 Bible Online

1 Aisiitonokin 15 - Ateso bible

1 Aisiitonokin 15

¹ Koduk Daudi itogoi ore loka Daudi; kitemok aibois kanuka asaduku naka Edeke, kibubuk ewema kanuke.

² Kosodi Daudi atemar atiar, “Mam luibusakinit adakar asaduku naka Edeke dimarai Ilebin: naarai kes abu EJAKAIT koseu adakanar asaduku naka Edeke, ka aijaanakin ŋes ikar kere.”

³ Kotukok Daudi Isirael kere Yerusalem, aitodokun asaduku naka EJAKAIT toma aibois naabu ŋesi kitemokinite.

⁴Kotukok Daudi odwe luka Aaron, ka Ilebin:

⁵ Lukodwe luka Kokat; Uriel lokapolon, ka ikeinacan akwatat ka akaisaarei:

⁶Lukodwe luka Merari; Asaia lokapolon, ka ikeinacan akwat aarei ka akaisaarei;

⁷Lukodwe luka Geresom: Yoel lokapolon, ka ikeinacan akwatat ka akaisauni:

⁸ Lukodwe luka Elisapan; Semaia lokapolon, ka ikeinacan akwat aarei:

⁹ Lukodwe luka Keburon; Eliel lokapolon, ka ikeinacan akaisakanykauni:

¹⁰Lukodwe luka Usiel; Aminadab lokapoion, ka ikeinacan akwatat ka itomon ka luarei.

¹¹Konyarau Daudi Sadok ka Abiatar isasedotin, ka Ilebin, kes Uriel, ka Asaia, ka Yoel, ka Semaia, ka Eliel, ka Aminadab.

¹² Kotema kes atiar, “Iraas yesi ikapolok luka ikekia luka lukapapaa luka Ilebin: kitalaunos bonik, yes ka iinacanakus, tetere ipedorete aitodokun asaduku naka EJAKAIT, Edeke loka Isirael, toma aibois naabu eoŋ ketemokinite ŋes.

¹³ Naarai mam ipotu kisiautu adakar ŋes, ŋes kecilia EJAKAIT Ewokodeke kamawok, naarai mam kipou kamootos ŋes kwape ajaar aicorakinet.”

¹⁴Kitalaunos do isasedotin ka Ilebin bonik aitodokun asaduku naka EJAKAIT, Edeke loka Isirael.

¹⁵ Kodakasi do idwe luka Ilebin asaduku naka Edeke kokeperinikec kadaketake, kwape kicorakinitor Musa kwape ajaar akirot naka EJAKAIT.

¹⁶ Kolimok Daudi ikapolok luka Ilebin aseun iinacanakec ikayook, kojaas kalueruos, isabulin, ka adeudeun, ka ikacwi, koramata, koborianata kaiyalama.

¹⁷ Koseut Ilebin Keman okoku loka Yoel; ka lokiinacanake, Asap okoku loka Berekaia; ka lokodwe luka Merari iinacanakec, Etan okoku loka Kusaia;

¹⁸ka ikeceinacan luka atukot nakiareit, Sekaria, ka Ben, ka Yaasiel, ka Semiramot, ka Yekiel, ka Uni, ka Eliab, ka Benaia, ka Maaseia, ka Matitia, ka Elipeleku, ka Mikeneia, ka Obed-edom, ka Yeiel, ikagolok luka ekek.

¹⁹Aponi koseunai ikayook, Keman, ka Asap, ka Etan, kikacwi luka aisinin aituru;

²⁰ka Sekaria, ka Asiel, ka Semiramot, ka Yekiel, ka Uni, ka Eliab, ka Maaseia, ka Benaia, kisabulin koporoto loka Alamot;

²¹ka Matitia, ka Elipeleku, ka Mikeneia, ka Obed-edom, ka Yeiel, ka Asasia, aiŋarenikin kadeudeun koporoto loka Iseminit.

²²Kopolokinit Kenania, ekapolon loka Ilebin ekosio: kituutoor ŋesi ekosio, naarai kepiriana.

²³Berekia ka Elukana kes ikagolok luka asaduku.

²⁴ Apotu Sebania ka Yosapat, ka Netanel, ka Amasai, ka Sekaria, ka Benaia, ka Elieser, isasedotin, kokusete arupepen koiŋaren kasaduku naka Edeke; Obed-edom ka Yekia kes ikagolok luka asaduku.

²⁵ Abu Daudi kolot, ka imakio luka Isirael, ka ikapolok luka ilukumin, aitodokun asaduku naka aitutuket naka EJAKAIT alemun kotogo loka Obededom kaiyalama:

²⁶ Kosodi kanen, kiŋarak Edeke Ilebin luadakete asaduku naka aitutuket naka EJAKAIT, apotu koinakis imoŋin lutoba ikanykaarei ka imerekekin ikanykaarei araun asuban.

²⁷Kenapit Daudi ekaso loka ebaputa loejok, ka Ilebin kere luadakito asaduku, ka ikayook, ka Kenania ekapolon loka ekosio kikayook: konapit Daudi epod loka ebaputa.

²⁸ Kwaŋin kitodoku Isirael kere asaduku naka aitutuket naka EJAKAIT keibwoŋ, ka eporoto loka apeen, ka arupepen, ka ikacwi, koramata da isabulin ka adeudeun.

²⁹ Kosodi kanen, nakedolio asaduku naka aitutuket naka EJAKAIT ore loka Daudi, koŋolia Mikal akoku naka Saul kadirisa, koany ekabaka Daudi esomanari ikosie; komwaŋ ŋes kotauke.