Read Ateso 1 Aisiitonokin 16 Bible Online

1 Aisiitonokin 16 - Ateso bible

1 Aisiitonokin 16

¹ Kitolomut asaduku naka Edeke, kibwaikis ŋes kidiŋ owema loebubukinit Daudi kanuke: koinakis ainakineta nuicweio ka ainakineta nuka ainapakin kakonyen nuka Edeke.

²Kedau Daudi ainakin ainakinet naicweio ka ainakineta nuka ainapakin, kilipak ituŋa arereŋ kokiror loka EJAKAIT.

³Kokorak da ŋinituŋanan yenika Isirael, ikiliok ka aŋor, ŋinidiopet emugati, aturosit naka akiriŋ, ka aluŋuret naka imusabibun lukeokito.

⁴Koseu ice luka Ilebin aijaanakin koiŋaren kasaduku naka EJAKAIT, ainakin asuban ka aimal ka aiturit EJAKAIT, Edeke loka Isirael:

⁵Asap lokapolon, kotupite ŋes Sekaria, Yeiel, ka Semiramot, ka Yekiel, ka Matitia, ka Eliab, ka Benaia, ka Obed-edom, ka Yeiel, kejaas kisabulin ka adeudeun; ka Asap kejaas kikacwi, aituru kes;

⁶ka Benaia ka Yakasiel isasedotin kejaas karupepen tiritir, koiŋaren kasaduku naka aitutuket naka Edeke.

⁷ Kosodi kapaaran kaŋin kisiau Daudi aitemokin aimal EJAKAIT, kama ka Asap ka iinacanake.

⁸ Kimalata EJAKAIT, kiworoto ekekiror; Kitejenutu aswamisioke otuŋa.

⁹ Koyeikisi ŋes, koyeikisi aiturit ŋes; Kitatamata aswamisioke kere nukaumokin.

¹⁰ Kitubusikina kokirorike lokalaunan: Kolakaros itauon luka ŋul kaluemoete EJAKAIT.

¹¹ Komoata EJAKAIT ka akegogoŋ; Komoata akonyeneke ikar kere.

¹² Kiitutu akeswamisio nukaumokin nueswama; Nukaumokinike, ka itubesia luka aitukuke.

¹³Wu yes aur naka Isirael ekejaanakinanike, Yes idwe luka Yakob, luseunake.

¹⁴Ŋes EJAKAIT Ewokodeke: Iketubesia eja akwap kere.

¹⁵Kiitutu aitutuketeke ikar kere, Akirot naabu kicorak aturio alukumit;

¹⁶ Aitutuket naetutuki ŋesi kAburaam, Ka aiyapositike mama ejai Isaak;

¹⁷Kitogogoŋ da ŋipeŋin mama ejai Yakob araun ekisil, Mama ejai Isirael araun aitutuket namam edaun.

¹⁸Ebe, “Kainakini jo akwap naka Kanaan, Ewai loka airumetekon.”

¹⁹ Nakiraatar yesi ituŋa luikidioko; Eebo, luikidioko noi, kiboiororoto kotomake;

²⁰Kirimete kateker kiton ateker, Anyoun kajakanut adiopet kiton otuŋa ice.

²¹ Mam abu kocamak idiotuŋanan aikonakin kes erono; Eebo, abu kitoron ikabakan kanukec;

²² Kobala ebe, “Sirikitirosi lukinyonyoikitonoka akinyet, Sirikiswamakis ikanabin aronis.”

²³ Koyeikisi EJAKAIT, yes akwapin kere; Kitodiasi akeitajar ŋinipaaran.

²⁴ Kolimosi aibusesuke katekerin, Aswamisioke nukaumokin kotuŋa kere.

²⁵ Naarai epol EJAKAIT, loibusakinit noi aiturio: Loibusakinit ayoŋio adepar idekesio kere.

²⁶ Naarai idekesio kere luka ituŋa eraas aputosia: Konye EJAKAIT ŋes asubi akuj.

²⁷ Aibuses ka apolou ejaas akonyeneke: Agogoŋ ka aiyalama ejaas aiboisike.

²⁸Koinakis EJAKAIT, yes atekerin nuka ituŋa, Koinakis EJAKAIT aibuses ka agogoŋ.

²⁹Koinakis EJAKAIT aibuses naibusakinit ekekiror: Koyautu ainakinet, kopotu kakonyeneke. Komaata EJAKAIT konapito luelaete.

³⁰Komaran kakonyeneke, akwap kere: Icasit akwap da, komam epedori aijaŋijaŋa.

³¹ Kiyalamikin akuj, kolel akwap; Kolimosi katekerin ebe, “Irumit EJAKAIT,”

³² Kirurum aŋolol, ka ailelebake; Kolel ekitui, ka luejaas toma kere;

³³Kosodete do ikito luka amagoro ayoore kanuka aiyalama Kakonyen nuka EJAKAIT, Naarai ebunit atubokin akwap.

³⁴ Kimalata do EJAKAIT: naarai ejok ŋesi: Naarai ejaenena akeitim ikar kere.

³⁵ Kobalasi ebe, “Kitajarai sio, Wu Edeke loka aitajarakosi, Kotukonokinai sio koyuunai katekerin, Aimalaenen ekonikiror lokalaunan, Kebwoŋananas kotoma aiturit jo.

³⁶ Kituritete EJAKAIT, Edeke loka Isirael, Ameun ikar luŋo kiton ikar kere!” Kobalas ituŋa kere ebe, “Amen,” kituroto EJAKAIT.

³⁷Abu kitasal Asap ka iinacanake kanen, koiŋaren kasaduku naka aitutuket naka EJAKAIT, aijaanakin tiritir koiŋaren kasaduku, kwape kibusakinitor aswam naka ŋinipaaran:

³⁸ka Obed-edom ka iinacanakec, akaisakanykape ka ikanykauni; Obed-edom da okoku loka Yedutun ka Kosa araun ikagolok;

³⁹ ka Sadok esasedoti, ka ikeinacan isasedotin, koiŋaren kewema lokalaunan loka EJAKAIT toma aibois naicelelei naajai Gibeon.

⁴⁰ Ainanakin ainakineta nuicweio mama ejai EJAKAIT kotem loka ainakineta nuicweio tiritir tupuruc ka eboŋ, kwape ajaatar kere nuiwadikatai kokisila luka EJAKAIT, luabu ŋesi kicorak Isirael;

⁴¹ Keman da ka Yedutun kakes, ka ice luaseunitai, luabilitai ikiroriakec, aimalaenen EJAKAIT, naarai ejaenena akeitim ikar kere;

⁴²Keman da ka Yedutun ka kes kejaas karupepen ka ikacwi kanuka ŋul kaluituruete, ka iboro luka ikososinei luka Edeke: odwe luka Yedutun da ajaut okek.

⁴³ Konyout ituŋa kere, kolot ŋinituŋanan oreke: koboŋo Daudi ailipakin etogoke arereŋ.