Read Ateso 1 Aisiitonokin 17 Bible Online

1 Aisiitonokin 17 - Ateso bible

1 Aisiitonokin 17

¹ Kosodi kanen, kiboikin Daudi togoke, kotema Daudi Natan enabi atiar, “Koany, eboie eoŋ kotogo loka eres, konye iboie asaduku naka aitutuket naka EJAKAIT kotoma aigalisio.”

²Kotema Natan Daudi atiar, “Kiswama kere nuejaas otaukon; naarai ejai EJAKAIT kajo.”

³Kosodi kanen kakuare kaŋin, kobu akirot naka Edeke mama ejai Natan ebe,

⁴“Kolot kolimok Daudi ekakejaanakinan ebe, ‘Inera EJAKAIT kwanata ebe, Mam jo idukokini eoŋ etogo loeboieneno:

⁵ Naarai mam eoŋ eboikino togo ageun kapaaran naetolomunia Isirael kiton lolo: konye alosenenei anyoun kowema kiton owema, anyoun kowema lokalaunan kiton ece da.

⁶Kaiboisio kere nualosenen kaIsirael kere, abu eoŋ kener akirot kedio kokatubok luka Isirael, luecorakinit aitanyam ikatuŋa ebe, “Kanukinyo mam yes kidukokiniata eoŋ etogo loka eres?” ’

⁷Aso do kolimok Daudi ekakejaanakinan kwanata ebe, ‘Inera EJAKAIT loka ajoresio kwanata ebe, Abu kalem jo korony, katupit amerekekin, tetere iraun ekapolon ayait ikatuŋa Isirael:

⁸Ajaenena eoŋ kajo kama ilosenenei kere, amudia lukasurupokon kere kakonyenekon; etuluor jo ekiror, kwape ekiror loka lukapolok luejaas kakwap.

⁹ Aseikini ikatuŋa Isirael aibois, eraikini kes, tetere iboiete aiboisikec, komam bobo itwobosete; komam bobo idwe luka aronis iticanete kes, kwape lem sek.

¹⁰Kwape kapaaran naecorakinia eoŋ ikatubok ayait ikatuŋa Isirael; etonokokiari lukasurupokon kere. Bobo da alimokini jo ebe kidukokini EJAKAIT etogo.

¹¹Kosodi kanen, kedoloto apaarasiakon, ilosi ijo ajaut kalukapapaakon, adakakini eoŋ aurikon naetupakini naelomuni kodwekon; eticasi da ajakanutuke.

¹²Ŋol ŋes kadukokini etogo, eticasi eoŋ ekeicoloŋ loka ajakanut ikar kere.

¹³ Araun eoŋ papake, ŋes da eraun okokuka: mam alemari akaitim kamake, kwape abu kalemaria kama kaŋol kalokinarenikinit jo:

¹⁴ Konye etogogoŋi eoŋ ŋes kotoma togoka, kajakanutuka da ikar kere; iticasio ekeicoloŋ loka ajakanut ikar kere.’ ”

¹⁵Kwape ejaatar akiro ŋun kere, kwape ejaar aitapoet ŋin kere, kolimok Natan Daudi kwaŋin.

¹⁶ Kosodi Daudi ekabaka alomar, kiboikin kakonyen nuka EJAKAIT: kotema atiar, “Eoŋ iŋai, wu EJAKAIT Edeke; ekatogo da inyo, ijo aitodolun eoŋ kiton kwana?

¹⁷Kerai ŋin da akirot naedit kakonyenekon, wu Edeke; konye iner ijo nuka ekek loka ekejaanakinanikon kokar luipu noi luepote, isesen eoŋ kwape araar etuŋanan loitopolooritai, wu EJAKAIT Edeke.

¹⁸ Inyo bobo epedori Daudi alimokin jo nuka aibuses naisubakinitai ekonikejaanakinan? Naarai ijeni ekonikejaanakinan.

¹⁹ Wu EJAKAIT, iswama ijo apolou na kere, kanuka ekejaanakinanikon, kwape ejaar ekonitau da, aitejenun akiro nu kere nukapolok.

²⁰ Wu EJAKAIT, emamei yeneputos kajo, emamei da Edeke ece dimarai ijo, kwape ajaatar kere nukipou keirasi kakosiki.

²¹Ani bo ateker adio kakwap naeputos kikonituna Isirael, luabu Edeke kolot alakun kanuke araun ituŋa, adumakin ekiror kakiro nukos ka nusogim, ireŋei atekerin kakonyen nuka ikonituŋa luibu kolaku koMisiri?

²²Naarai ikonituŋa Isiraei ibu kitarau ikonituŋa ikar kere; ijo da, EJAKAIT, ibu koraun Edekekec.

²³Aso do, wu EJAKAIT, kitogogoŋoi akirot naibu kiner naka ekonikejaanakinan, ka ekekike ikar kere, kiswama kwape kineria.

²⁴ Kicat ekonikiror, kitopolooroi ikar kere ebe, EJAKAIT loka ajoresio ŋes Edeke loka Isirael, Edeke mama ejai Isirael: iticasio ekek loka ekonikejaanakinan Daudi kakonyenekon.

²⁵Naarai ijo, wu Ekadeke, ipukokinit ekonikejaanakinan ebe idukokini ijo ŋes ekek; kanuka ŋun etitinior ekonikejaanakinan kotauke ailip kakonyenekon.

²⁶ Aso do wu EJAKAIT, irai ijo Edeke, isumunik ekonikejaanakinan akirot ŋin naejok:

²⁷ Kitojok ijo aisirereŋ ekek loka ekonikejaanakinan, kiyatanakinenei kakonyenekon ikar kere: naarai ijo, wu EJAKAIT, ibu kisirereŋ, ido isirereŋitoi ikar kere.”