Read Ateso 1 Aisiitonokin 19 Bible Online

1 Aisiitonokin 19 - Ateso bible

1 Aisiitonokin 19

¹ Kosodi kanen, akaulo kaŋun, kotwana Nakas ekabaka loka idwe luka Amon, kirum okokuke aiboisike.

²Kotema Daudi atiar, “Ketodikini Kaŋun okoku loka Nakas asianut, naarai abu papake ketodik eoŋ asianut.” Kijuka Daudi ikiyakia aitalakar ŋes kanuka papake. Kopotu ikejaanakinak luka Daudi akwap naka idwe luka Amon mama ejai Kaŋun, aitalakar ŋes.

³Konye apotu ikapolok luka idwe luka Amon kotemasi ŋes atiar, “Iwomit ijo ebe eyoŋit Daudi papakon, aijukakin jo lukitalakarete? Mam kereka eponito ikejaanakinakake airere, ka amudiar, ka airot akwap?”

⁴Koyaŋa do Kaŋun ikejaanakinak luka Daudi, kobaren kes, kotuboto ikecenapen kokidiŋ, kiton oosikec, kotwara kes.

⁵ Kosodete ice alosit, kolimokis Daudi kwape kikonakinere ituŋa. Kijuka airiamakin kakes; naarai eleicikinito noi ituŋa. Kotema ekabaka atiar, “Kopaikis Yeriko aitodol neecekuniata ipenekakus, kosodete konyet aboŋun.”

⁶ Nakeanyuniata idwe luka Amon ebe arokiata kesi kamaka Daudi, kijuka Kaŋun ka idwe luka Amon atalatan alukumit nuka epuesa aiboleikin agalin ka ikebwanenok koMesopotamia, koAram-maaka, ido koSoba.

⁷ Kwaŋin kiboleikis agalin alukumin akaisauni ka nuarei, ka ekabaka loka Maaka ka ikejaanakinakake; luapotu kidukuroto koiŋaren ka Medeba. Kotukonokinos idwe luka Amon anyoun koreriakec, kopotu ejie.

⁸Kepupu Daudi ŋun, kijuka Yoab, ka ajore kere naka ituŋa lukirigin.

⁹ Kolomut idwe luka Amon, kiderakinos ejie korute loka ere: ikabakan luapotu kopotu kejaas bonik orony.

¹⁰Nakeanyunia Yoab ebe ejai ejie kiŋaren kokau da, koseu ituŋa kere luaseunitai koIsirael, kiderak kes aitiji Isurian.

¹¹Kititiŋ Abisai onaceke ituŋa ice kere, kiderakinos kesi aitiji idwe luka Amon.

¹²Kotema atiar, “Arai keetelekasi Isurian eoŋ, kosodi ijo aisigalikin eoŋ: konye arai kiitelekasi idwe luka Amon jo, kasodi eoŋ aisigalikin jo.

¹³ Kotitiŋior, ketodiasi ekiliokone kanuka ituŋawok, ka ireria luka Edekewok: kiswama EJAKAIT nuitojokit ŋesi.”

¹⁴ Kikunyak do Yoab ka ituŋa lukejaas kaŋes aitiji Isurian; kokerata kakonyeneke.

¹⁵Keanyut idwe luka Amon ebe akerata Isurian, kokerata kesi da kakonyen nuka Abisai onaceke, kolomasi ore, Kosodi Yoab abunore Yerusalem.

¹⁶ Keanyut Isurian ebe epikor kes kakonyen nuka Isirael, kijukasi ikiyakia, kitolomut Isurian lukejaas okekwa juwai kEcor, kiŋarenik kes Sopak ekapolon loka ajore naka Kadareser.

¹⁷Kolimokinai Daudi; kotukonok Isirael kere, kodok Yorodan, kobunok kes, kiderakin ejie aitiji kes. Kosodi kedau Daudi aiderakin ejie aitiji Isurian, kojioto.

¹⁸ Kokerata Isurian kakonyen nuka Isirael; koar Daudi luka Isurian, ituŋa luka agalin alukumin akanykaarei, ka lualosete kakeje ilukumin akaisaoŋon, koar da Sopak ekapolon loka ajore.

¹⁹Keanyut ikejaanakinak luka Kadareser ebe epikor kes kakonyen nuka Isirael, kitutukoto kaDaudi nukainapakin, kijaanakis ŋes: koŋeroto Isurian aisigalikin bobo idwe luka Amon.