Read Ateso 1 Aisiitonokin 21 Bible Online

1 Aisiitonokin 21 - Ateso bible

1 Aisiitonokin 21

¹ Konyoik Satan aluikin Isirael, kisidik Daudi aimar Isirael.

² Kotema Daudi Yoab ka ikapolok luka ituŋa ebe, “Koloto, kimarata Isirael anyoun koBeer-seba kiton Dan; kinyakutu akiro, kajen eoŋ etiaikec.”

³Kotema Yoab atiar, “Kiyatak EJAKAIT iketuŋa kwape ejaar etiaikec irwan akwatat: konye, ekajakait ekabaka, mere kes kere ikejaanakinak luka ekabaka? Kanukinyo ekotor ekajakait akirot na? Kanukinyo kitagwaunia ŋesi Isirael?”

⁴ Konye kiteleka akirot naka ekabaka Yoab. Tape Yoab enyouni, kitor anatar Isirael kere, kobu Yerusalem.

⁵Kobil Yoab etiai loka ituŋa luemari ŋesi mama ejai Daudi. Ŋul kere luka Isirael emwaasi ilukumin elukumit ka ilukumin akwatat luautununete ikileŋa: emwaasi ituŋa luka Yuda ilukumin akwat aoŋon ka ilukumin akaisakanykaarei luautununete ikileŋa.

⁶ Konye mam abu kimar Lebi ka Benyamin kotomakec: naarai apagalikinit akirot naka ekabaka Yoab.

⁷Kokadak Edeke akirot ŋin: tape edanyi Isirael.

⁸ Kotema Daudi Edeke atiar, “Adiaka eoŋ noi, naarai eswama eoŋ akirot ŋin: konye kwana, keŋaiŋait, kolema numam adolit nuka ekonikejaanakinan; naarai eswama eoŋ nukabaŋaanut naepol.”

⁹ Kotema EJAKAIT Gad, ŋes ekadwaran loka Daudi atiar,

¹⁰“Kolot kolimok Daudi ebe, ‘Inera EJAKAIT kwanata ebe, Kejaik jo akiro auni; koseu ijo adiopet kakesi, tetere keswamakini jo.’ ”

¹¹Kobu do Gad mama ejai Daudi, kotema ŋes atiar, “Inera EJAKAIT kwanata ebe, Koseu naikoto;

¹² Arai bo ikar iuni luka ebeli; arai ilapio iuni amudiario kakonyen nuka lukasurupokon, kodolok jo ekileŋ loka lukasurupokon; arai bo apaarasia auni ekileŋ loka EJAKAIT, atular kakwap, emudiari emalaika loka EJAKAIT anatar ariino kere nuka Isirael. Aso do koomoom nuaboŋokini eoŋ ŋol lokejukuni.”

¹³ Kotema Daudi Gad atiar, “Katiokikis noi: mere kebirokin akan naka EJAKAIT: naarai, epol noi akeitim: kenyek aibirokin akan naka ituŋanan.”

¹⁴Kijuk EJAKAIT atular toma Isirael: kotwakata ituŋa ilukumin akaisakanykaarei luka Isirael.

¹⁵ Kijuka Edeke emalaika Yerusalem amudiar ŋes: konye napebala ŋesi emudiari, kosesen EJAKAIT, kiitu ŋesi aronis, kotema emalaika loamudiari ebe, “Adolo do: kinyaka akonikan.” Abwoi emalaika loka EJAKAIT eiduny kepejal loka Orunan Eyebusit.

¹⁶ Kiteluo Daudi akonyeneke, koanyu emalaika loka EJAKAIT ebwoi kidiŋ kakuj ka akwap, kitiŋite ekileŋ loautuno kakanike, koriorite adoditor Yerusalem, Kosodi Daudi ka imakio aibiror ebuburia, konapitos ipukoi.

¹⁷Kotema Daudi Edeke atiar, “Mere eoŋ loabu kecorak aimar ituŋa? Ŋes eoŋ loabu kadiaka eswama nukaronok; konye amerekekin nu, eswamata anyoika? Keŋaiŋait, wu EJAKAIT Ekadeke, kaluik eoŋ akonikan, ka ekek loka papaka; konye kinyek aluikin ikonituŋa, atular kes.”

¹⁸Kosodi emalaika loka EJAKAIT aicorakin Gad alimokin Daudi ebe, kolot Daudi, adukokin EJAKAIT etem opejal loka Orunan Eyebusit.

¹⁹Kolot Daudi kakirot naka Gad, naalimokinit ŋesi kokiror loka EJAKAIT.

²⁰Kibelokin Orunan, koany emalaika; koŋopata odweke iwoŋon lukejaas kaŋes. Ecomi Orunan akima.

²¹Kebuni Daudi mama ejai Orunan, kosesen Orunan koany Daudi, kolom kopejal, kokukum mama ejai Daudi kitulurite akekou.

²² Kosodi Daudi atemar Orunan atiar, “Koinakinai eoŋ aibois naka epejal kalo, kadukok EJAKAIT etem: koinakinai eoŋ katacakini jo etiaike kere: tetere enaŋi atular kotuŋa.”

²³Kotema Orunan Daudi atiar, “Koyaŋa ŋes, kiswama ekajakait ekabaka nuitojokit kakonyeke: koany, ainakini jo imoŋin araun ainakineta nuicweio, ka iboro lukicomet kanuka akito, ka alos araun ainakinet naka akiria; ainakini kere.”

²⁴Kotema ekabaka Daudi Orunan atiar, “Mam; konye abeit kigwelakin kotiaike kere: naarai mam ayaŋaari nukon ainakin EJAKAIT, karaida ainakin ainakinet naicweio kiboro kaluiinakina taai.”

²⁵ Koinak Daudi Orunan isekelin akwat akanykape luka esabu lueninio itia aibois.

²⁶ Kodukok Daudi EJAKAIT etem nepenen, koinak ainakineta nuicweio ka ainakineta nuka ainapakin, kiwone EJAKAIT; Koboŋok ŋes kakim naebuni kokuju kotem loka ainakineta nuicweio.

²⁷Kicorak EJAKAIT emalaika; kinyakak bobo ekileŋ akuraruke.

²⁸Kapak kaŋin, keanyu Daudi ebe abu EJAKAIT Koboŋok ŋes kopejal leka Orunan Eyebusit, kosodi konyet ainakin asuban kanen.

²⁹ Naarai kapak kaŋin kejai ewema lokalaunan loka EJAKAIT, loabu Musa kosub kamodiŋ, ka etem loka ainakineta nuicweio aibois naicelelei koGibeon.

³⁰ Konye koŋer Daudi alosit nen aiŋitun EJAKAIT: naarai akuriana ekileŋ loka emalaika loka EJAKAIT.