Read Ateso 1 Aisiitonokin 26 Bible Online

1 Aisiitonokin 26 - Ateso bible

1 Aisiitonokin 26

¹ Abeanakin naka ikagolok: luka Ikorakin; Meselemia okoku loka Kore, lokodwe luka Asap.

²Ajaas Meselemia idwe lusap; Sekaria ekiyai, Yediael lokiareit, Sebadia lokiwuniet, Yatiniel, lokiwoŋonet;

³Elam lokikanyet, Yekokanan lokikanyetekape, Eliekoenai lokikanyetekaarei.

⁴Ajaas Obed-edom idwe lusap; Semaia ekiyai, Yekosaba lokiareit, Yoa lokiwuniet, Sakar lokiwoŋonet, ka Netanel lokikanyet;

⁵ Amiel lokikanyetekape, Isakar lokikanyetekaarei, Peuletai lokikanyetekauni: naarai kisirereŋ Edeke ŋes.

⁶Aponi kourikinai Semaia da okokuke idwe lusap, lukeyaito ekek loka papakec: naarai keraas ituŋa lukirigin luetitiŋ.

⁷Odwe luka Semaia; Otini, ka Repael, ka Obed, ka Elisabad, lukeraas iinacanake ituŋa luetitiŋ, Eliku, ka Semakia.

⁸Ŋul kere odwe luka Obed-edom; kes ka odwekec ka iinacanakec, ituŋa lukapedor ka agogoŋ aijaanakin; akaisakanykape ka luarei luka Obed-edom.

⁹Ajaas Meselemia idwe lusap ka iinacan, ituŋa luetitiŋ, itomon ka lukanykauni.

¹⁰ Kosa da, lokodwe luka Merari, ajaas ŋes idwe lusap; Simiri lokapolon (naarai abu papake kitarau ŋes lokapolon kwabo mam kerai ekiyai);

¹¹Kilikia lokiareit, Tebalia lokiwuniet, Sekaria lokiwoŋonet: odwe ka iinacan kere luka Kosa emwaasi itomon ka luuni.

¹²Kotoma kaŋul kobeanakinos ikagolok, ituŋa lukapolok, lukejaas nukisinadio, kwape kiinacanakec, aijaanakin kotogo loka EJAKAIT.

¹³ Apotu kilamilamata, ludidik kwape kalukapolok, kwape ajaatar ikekia luka lukapapaakec, kanuka ŋolirute.

¹⁴Kobeik Selemia eroet lokokide. Kosodete ailamilamikin Sekaria okokuke, ekapetan akiro lokecobe; kobeik ekeroet ari naka agolitomei.

¹⁵Kobeik Obed-edom ari naka eŋalakimak: ka odweke etogo loka aiŋad.

¹⁶ Kobeik Supim ka Kosa ari nakoto, erute loka Saleket, nekejai eititiria loedokari, kiteonoro ikedarak kaluce.

¹⁷Kejaas Ilebin ikanykape ari nakokide, iwoŋon ŋinipaaran ari naka agolitomei, iwoŋon ŋinipaaran ari naka eŋalakimak, ka iareiarei kanuka etogo loka aiŋad.

¹⁸Kanuka Parabar ari nakoto, iwoŋon neejai eititiria, ka iarei oParabar.

¹⁹Ŋun kes abeanakineta nuka ikagolok; lukodwe luka Ikorakin, ka lukodwe luka Merari.

²⁰ Luka Ilebin, kopolokinite Akiya aiŋadisia nuka etogo loka Edeke, ka aiŋadisia nuka iboro luketiakunitai.

²¹ Odwe luka Ladan; odwe luka Igeresonin lukeraas luka Ladan, ikapolok luka ikekia luka lukapapaakec lukeraas luka Ladan Egeresonit; Yekieli.

²²Odwe luka Yekieli; Setam, ka Yoel onaceke, kopolokinito aiŋadisia nuka etogo loka EJAKAIT.

²³ Luka Imuramain, luka Isarin, ka luka Ikeburonin, ka luka Iusielin;

²⁴ Kerai Sebuel okoku loka Geresom, okoku loka Musa ekayaiton aiŋadisia.

²⁵ Ka iinacanake; loka Elieser kobu Rekabia okokuke ka Yesaia okokuke, ka Yoram okokuke, ka Sikiri okokuke, ka Selemot okokuke.

²⁶Kopolokinite Selemot ŋol ka ikeinacan aiŋadisia kere nuka iboro luatiakunitai, luapotu Daudi, ka ikapolok luka ikekia luka lukapapaakec, ikapolok luka ilukumin, ka lukakwatat, ka ikapolok luka ajore kotiakasi.

²⁷ Luka luŋatuna luadumunete kojiisio apotu kotiakasi aiteteun etogo loka EJAKAIT.

²⁸ Kere da luabu Samuel ekadwaran, ka Saul okoku loka Kis, ka Abiner okoku loka Ner, ka Yoab okoku loka Seruia, kotiak; ŋinibore kere yeniketiakunitai, kerai ŋin yenikakan naka Selemot ka iinacanake.

²⁹ Luka Isarin, apotu Kenania ka odweke kiswamata aswam nakokiŋa koIsirael, araut ikapolokitok ka ikatubok.

³⁰Luka Ikeburonin, Kasabia ka iinacanake, ituŋa luetitiŋ, elukumit ka akwat akanykaarei, kopolokinito Isirael okekwa juwai Yorodan ari nakoto; kanuka aswam kere naka EJAKAIT, ido aijaanakin ekabaka.

³¹ Luka Ikeburonin kerai Yeriya lokapolon, loka Ikeburonin, kwape ajaar aurikec kwape ajaatar ikekia luka lukapapaakec. Kokaru loka akaisaoŋon loka airum naka Daudi aponi komoai, ido kodumunai kakesi ituŋa lukirigin luetitiŋ koYaser loka Gilead.

³² Iinacanake, ituŋa luetitiŋ, emwaasi ilukumin iarei ka akwat akanykaarei, ikapolok luka ikekia luka lukapapaakec, luabu Daudi kitarau ikapolokitok luka Ireubenin, ka Igadin, ka atutubet naka ateker naka Imanasein, kaŋinikirot mama ejai Edeke, kakiro da nuka ekabaka.