Read Ateso 1 Aisiitonokin 29 Bible Online

1 Aisiitonokin 29 - Ateso bible

1 Aisiitonokin 29

¹ Kotema Daudi ekabaka ekodet kere atiar, “Solomon okokuka, loaseu Edeke bon, eriŋa edit enonok, epol aswam da: naarai mam etogo lokapolon erai loka ituŋanan, konye loka EJAKAIT Edeke.

² Etemokinit eoŋ kakagogoŋ kere iboro luka etogo loka Ekadeke, esabu loka lukesabu, epuesa loka lukepuesa, aisinin nuka lukaisinin, asua nuka lukasua, akito da nuka lukakito; amor nuemelomeloto, ka nuipiripiranara, amor nuiminaikinere, ka nuka ijesesinei luegelegela, ka amor nuka akais nuipu nuka ŋolipone kere, ka amor nuesegara nuipu noi.

³ Bobo da, naarai kaminakinit etogo loka Ekadeke, naarai ejaas eoŋ lukakais luipu lueraas lukaŋ luka esabu ka epuesa, ainakini kes togo loka Ekadeke adepar kere luetemokinit luka etogo lokalaunan:

⁴ Kes atalatan alukumin auni nuka esabu, loka esabu loka Opir, ka atalatan alukumin akanykaarei nuka epuesa loililiauna, ailadaaria arwatatin nuka itogoi.

⁵Esabu loka iboro luka esabu, ka epuesa loka luka epuesa, loka ŋolipone kere loka aswam naiswamao kakanin nuka ipirioitin. Iŋai bo do einakini ketau loekot atiakun elopet lolo mama ejai EJAKAIT?”

⁶ Kosodete ikapolok luka ikekia luka lukapapaakec, ka ikapolok luka atekerin nuka Isirael, ka ikapolok luka ilukumin ka luka akwat, ka ikayaitok aswam naka ekabaka, ainakin kitauon luekotosi:

⁷Koinakis kanuka aijaanakin kotogo loka Edeke luka esabu atalatan alukumin akany, ka idarikin [4] ilukumin itomon, epuesa atalatan alukumin atomon, aisinin atalatan alukumin atomon ka nukanykauni, ka asua atalatan alukumin akwatat.

⁸ Ŋul lukejaas amor nuka akais nuipu koinakis kes oboro luka akais nuipu luka etogo loka EJAKAIT, kakan naka Yekiel Egeresonit.

⁹ Kosodete ituŋa aiyalama, naarai apotu koinakis kitauon luekotosi, naarai kitauon luedolito apotu koinakis kitauon luekotosi mama ejai EJAKAIT: kiyalama da Daudi ekabaka kaiyalama naepol.

¹⁰ Kanuka ŋun kituru Daudi EJAKAIT kakonyen nuka ekodet kere: kotema Daudi atiar, “Kituritete jo, wu EJAKAIT, Edeke loka Isirael papaakosi, ikar lumam edaunos.

¹¹ Wu EJAKAIT, apolou, ka apedor, ka aibuses, ka aipikor, ka aiyoŋ eraas nukon: naarai luejaas akuj ka akwap kere eraas lukon; wu EJAKAIT, ajakanut erai nakon, kitopoloorio aitelekar kere.

¹² Ebuni abar ka aibuses kamakon, ido irumit kere; ejai apedor ka agogoŋ akanikon; aitopoloor ka ainakin kere agogoŋ ejai akanikon.

¹³Aso do, wu Ekosideke, kimalai, keturito ekonikiror lokakibuses.

¹⁴“Konye eoŋ iŋai, ikatuŋa da kes inyo, isio apedor ainakin kwaŋin kitauon luekotosi? Naarai epote iboro kere kamakon, kiinakinit isio jo lukon.

¹⁵ Naarai kirai isio ipejok ka ikalotok kakonyenekon, kwape kejaatar lukapapaakosi kere: esubito apaarasiakosi kotoma akwap bala etolim, emamei da amuno.

¹⁶Wu EJAKAIT Ekosideke, iboro lu kere lukitemonoki isio adukokinia jo etogo loka ekonikiror lokalaunan epote kakanikon, ido kere eraas lukon.

¹⁷ Ekadeke, ajeni da eoŋ ebe igimori ijo etau, isiyalamikinit nuetenito. Eoŋ da kajai ketau loitenara ainak eoŋ kakote iboro lu kere: kwana da aany kaiyalama ikonituŋa luejaas ne, kiinakis jo kakote.

¹⁸ Wu EJAKAIT, Edeke loka Aburaam, ka loka Isaak, ka loka Isirael, lukapapaakosi, kitogogoŋ na ikar kere kaitetemonor nuka aomisio nuka itauon luka ikonituŋa, kiteten ikecetauon neijai.

¹⁹ Koinak Solomon okokuka etau loedolit, airic aicorakinetakon, ka aitejenunetakon, ka ikisilakon, aswam akiro ŋun kere, aiduk etogo lokapolon loetemonok eoŋ iboroke.”

²⁰Kotema Daudi ekodet kere atiar, “Kwana kituro EJAKAIT Ekusideke.” Kituru ekodet kere EJAKAIT, Edeke loka lukapapaakec, kituluroto akwesikec, komaata EJAKAIT, ka ekabaka da.

²¹Koinakis asuban mama ejai EJAKAIT, koinakis ainakineta nuicweio mama ejai EJAKAIT, kapaaran naatupakini apaaran ŋin, kes imoŋin lutoba elukumit, imerekekin elukumit, imerekekin ludidik elukumit, ka ainakinetakec numatan, ka asuban nuipu kanuka Isirael kere;

²²Konyama, komata, kakonyen nuka EJAKAIT kapaaran kaŋin kaiyalama naepol. Kirucakis aitaraun Solomon okoku loka Daudi ekabaka, kinyonyoikis ŋes akinyet mama ejai EJAKAIT araun lokapolon, ka Sadok araun esasedoti.

²³Kosodi Solomon aiboikin oicoloŋ loka EJAKAIT korai ekabaka aibois naka Daudi papake, kokerianar; korimak ŋes Isirael kere.

²⁴ Apotu ikapolok kere, ka ituŋa lukirigin, ka odwe kere da luka ekabaka Daudi kononokikis Solomon ekabaka.

²⁵ Kitopoloo noi noi EJAKAIT Solomon kakonyen nuka Isirael kere, koinak aibuses nakajakanut namam etakanunit okabakan kere luageikinete toma Isirael.

²⁶Kirumit Daudi okoku loka Yese Isirael kere.

²⁷ Apak naabu ŋesi kirumak Isirael keraas ikar akaisaoŋon; kirumak ikar ikanykaarei koKeburon, kirumak da ikar akaisauni ka luuni koYerusalem.

²⁸ Kotwana emojoŋit noi, kileleba apaarasi, ka abar, ka aibuses: kirum Solomon okokuke aiboisike.

²⁹Aswamisio nuka Daudi ekabaka, nuageikinete ka nukawasia, koany, iwadikatai kakiro nuka Samuel ekadwaran, kakiro nuka Natan enabi, kakiro da nuka Gad ekadwaran;

³⁰ Kairumuke da kere, ka agogoŋuke, ka akiro nuapotu kodoonokis ŋes, ka Isirael, ka ajakanuto kere nuka akwapin.