Read Ateso 2 Aisiltonokin 11 Bible Online

2 Aisiltonokin 11 - Ateso bible

2 Aisiltonokin 11

¹ Kedol Rekoboam Yerusalem, kotukonok ŋesi lukokek loka Yuda ka Benyamin, ituŋa lueseunitai ilukumin akwatat ka ilukumin akais akanykauni, lukeraas ikajiok, aitiji Isirael, ainyakun ajakanut bobo neejai Rekoboam.

² Konye kobu akirot naka EJAKAIT mama ejai Semaia etuŋanan loka Edeke ebe,

³“Kolimok Rekoboam okoku loka Solomon, ekabaka loka Yuda, ka Isirael kere luejaas koYuda ka Benyamin, ebe,

⁴‘Inera EJAKAIT kwanata ebe, Mam ilosete, ido mam ijiikinos kikusiinacan; koboŋo ŋoltuŋanan togoke; naarai erai akirot na nakaŋ.’ ” Kosodete kopuput akiro nuka EJAKAIT, koboŋosi kasurokin Yeroboam.

⁵Kiboikin Rekoboam Yerusalem, koduk ireria luka aigalikin koYuda.

⁶ Koduk do Ber-lekem, ka Etam, ka Tekoa,

⁷ka Bet-sur, ka Soko, ka Adulam,

⁸ka Gat, ka Maresa, ka Sip,

⁹ka Adoraim, ka Lakis, ka Aseka,

¹⁰ka Sora, ka Aiyalon, ka Keburon, luejaas ko Yuda ka Benyamin, ireria luebwaitai.

¹¹Kitogogoŋ ireria lukagogoŋ, kibwaik ikapolok roma, ka imono, ka akinyet ka ebino.

¹²Kibwaik ibukui ka akwaras toma ŋolire kere, kitogogoŋ kes noi noi. Koraas Yuda ka Benyamin luke.

¹³Kolosenenete isasedotin ka Ilebin mamake lukejaas koIsirael kere anyoun koikorukec kere.

¹⁴ Naarai kojalakis Ilebin ironyiakec ka airumetekec, kopotu Yuda ka Yerusalem: naarai apotu Yeroboam ka odweke kireŋeasi kes, kinyeis aijaanakin kwape isasedotin kakonyen nuka EJAKAIT.

¹⁵ Koseu ŋesi isasedotin luka aiboisio nuiceleleete, ka luka ikorwa, ka luka itak luabu ŋesi kiswamau.

¹⁶ Ido kotoma atekerin kere nuka Isirael, luebwaikinito itauonokec amoot EJAKAIT, Edeke loka Isirael, apotu kotupasi Ilebin, kopotu Yerusalem ainakin asuban mama ejai EJAKAIT, Edeke loka lukapapaakec.

¹⁷ Kwaŋin kitogogoŋito ajakanut naka Yuda, kitogogoŋito Rekoboam okoku loka Solomon, ikar iuni: naarai kolosito korot loka Daudi ka Solomon ikar iuni.

¹⁸Komany Rekoboam aberu, Makalat akoku naka Yerimot okoku loka Daudi, ka naka Abikail akoku naka Eliab okoku loka Yese:

¹⁹ kourik ŋes odwe; Yeus, ka Semaria, ka Sakam.

²⁰Kokau kaŋin komany Maaka akoku naka Abisalom; kourik ŋes Abiya, ka Atai, ka Sisa, ka Selomit.

²¹Komina Rekoboam Maaka akoku naka Abisalom adepar akeŋor kere ka akebusian: (naarai komany aŋor atomon ka nukanykauni, ka abusian akaisakanykape, kouri idwe lusap akaisaarei ka lukanykauni ka lupesur akaisakanykape.)

²² Koseu Rekoboam Abiya okoku loka Maaka araun lokapolon, ŋes lokapolon koinacanake: naarai akoto aitaraun ŋes ekabaka.

²³ Kiswama kacoa, kisiarak odweke kere anatar akwapin kere nuka Yuda ka Benyamin, toma ŋolire loebwaitai: koinak kes inyamat luipu. Komoik kes aŋor nuipu.