Read Ateso 2 Aisiltonokin 12 Bible Online

2 Aisiltonokin 12 - Ateso bible

2 Aisiltonokin 12

¹ Kosodi kanen, nakitieasere ajakanut naka Rekoboam, kogogoŋor, kojal ikisila luka EJAKAIT, ka Isirael kere nepepe kaŋes.

² Kosodi kanen, kokaru lokikanyet loka ekabaka Rekoboam, kobu Sisak ekabaka loko Misiri asurokin Yerusalem, naarai apaasi kama ejai EJAKAIT.

³ Kejaas kagalin akwat atomon ka nuarei, ka ikebwanenok ilukumin akaisakanykape: ituŋa da luaupunos kaŋes anyoun koMisiri mam epedorio aimar; Ilubim, ka Isukiim, ka Itiopian.

⁴Kirum ireria luebwaitai luka Yuda, kobu Yerusalem.

⁵ Kobu do Semaia enabi mama ejai Rekoboam, ka ikapolok luka Yuda, luatukonokina Yerusalem kanuka Sisak, kotema kes atiar, “Inera EJAKAIT kwanata ebe, Ipotu kojalata eoŋ, kanuka ŋun kenyeik yes da akan naka Sisak.”

⁶ Kosodete ikapolok luka Isirael ka ekabaka aitasonikin; kotemasi atiar, “Edolit EJAKAIT.”

⁷ Keanyu EJAKAIT ebe etasonikinos, kobu akirot naka EJAKAIT mama ejai Semaia atiar, “Etasonikinos kesi; mam amudiari kes; konye ainakini kes adioitajario, mam akanyunyura ebukokinio Yerusalem kakan naka Sisak.

⁸ Konye do eraunos kesi ikekejaanakinak; tetere ejenunete aijaanakinika, ka aijaanakin naka ajakanuto nuka akwapin.”

⁹ Kobu do Sisak ekabaka loko Misiri asurokin Yerusalem, koyaŋa iboro luka akais nuipu luka etogo loka EJAKAIT, ka iboro luka akais nuipu luka etogo loka ekabaka; koyaŋa kere: koyaŋa da ibukui luka esabu lueswamat Solomon.

¹⁰ Kiswamau ekabaka Rekoboam ibukui luka aisinin aiboisikec, kijaik akanin nuka ikapolok luka ikedarak, luedarete ekek loka etogo loka ekabaka.

¹¹Kosodi naalomanaria ekabaka togo loka EJAKAIT, kopotu ikedarak kodakanarete kes, kinyakanarete agola naka ikedarak.

¹² Nakitasonikinor, kibelokin anyunyura naka EJAKAIT kamake, kinyek amudiar ŋes cut: bobo da kotakanut nuejok kotoma Yuda.

¹³ Kitogogoŋikin do ekabaka Rekoboam ko Yerusalem, kirum: naarai kerai Rekoboam loka ikar akaisaoŋon ka lodiopet egeuni airum, kirumak ikar itomon ka lukanykaarei koYerusalem, ere loabu EJAKAIT koseu katekerin kere nuka Isirael, aibwaikin nen ekekiror: ekiror loka totoke kerai Naama Amonit.

¹⁴ Kiswama nueroko, naarai mam ebwaikinit eketau amoot EJAKAIT.

¹⁵ Aswamisio nuka Rekoboam, nusodit ka nukawasia mam kereka iwadikatai kakiro nuka Semaia enabi, ka Ido ekadwaran, kwape ejaar aurio? Kejaenenas ijiisio kidiŋ Rekoboam ka Yeroboam.

¹⁶Kojotoor Rekoboam kalukapapaake, aponi kidaikinai ore loka Daudi: kirum Abiya okokuke aiboisike.