Read Ateso 2 Aisiltonokin 14 Bible Online

2 Aisiltonokin 14 - Ateso bible

2 Aisiltonokin 14

¹ Kojotoor do Abiya kalukapapaake, aponi kidaikinai ore loka Daudi, kirum Asa okokuke aiboisike: kapaarasiake kiyamakin akwap ikar itomon.

²Kiswama Asa nuejok ka nuedolito kakonyen nuka EJAKAIT Ekedeke:

³ naarai kolema ŋesi itemwan lumo, ka aiboisio nuiceleleete, kobilibil ipirin, kojepejep Aserim:

⁴kicorak Yuda amoot EJAKAIT, Edeke loka lukapapaakec, ka aricenen ikisila ka aicorakineta.

⁵Kolema da koreria kere luka Yuda aiboisio nuiceleleete ka aputosia nuka akoloŋ: kiyamakina ajakanut kakonyeneke.

⁶Koduk ireria luebwaitai koYuda: naarai eyamakina akwap, amamei ejie kokar kaŋul; naarai abu EJAKAIT kisiyeŋu ŋes.

⁷Naarai kotema ŋesi Yuda atiar, “Kadukoto ireria lu, kerigaut karwatatin, ka itogoi lueojak, ikirigin ka atiketa; eriŋa akwap ejai kakonyenewok, naarai kimoot oni EJAKAIT Ewokodeke; kimoot ŋes, abu ŋesi da kisiyeŋu oni kaŋoliwai.” Kosodete kodukoto, kokeriakaros.

⁸Kejaas Asa kajore nakedakit ibukui ka akwaras, ilukumin akwat auni koYuda; koBenyamin da, lukedakitos ibukui ka aiket akabwai, ilukumin akwat aarei ka ilukumin akaisakanykauni: ŋul kere keraas ituŋa lukirigin luetitiŋ.

⁹ Kolom Sera Etiopiat asurokin kes ejaas kajore naka ilukumin elukumit, ka agalin akwat auni; kobu ŋesi Maresa.

¹⁰Koloma do Asa airiamakin, kiderakinos ejie kaditot naka Sepata koMaresa.

¹¹ Komonyak Asa EJAKAIT Ekedeke, kotema atiar, “EJAKAIT, emamei lokiŋarakini kilema ijo, kidiŋ ka lokagogoŋ ka loemamei agogoŋ; kiŋarakinai sio, wu EJAKAIT Ekosideke; naarai kigoŋakina jo, kokirorikon ŋes kilomunia asurokin ekodet lo loepol. Wu EJAKAIT, irai ijo Ekosideke; kinyek etuŋanan aipikor jo.”

¹² Kodany do EJAKAIT Itiopian kakonyen nuka Asa, kakonyen nuka Yuda da; kokerata Itiopian.

¹³ Korukitor Asa ka ituŋa lukejaas kaŋes kiton Gerar: kibiroros luipu noi luka Itiopian komam epedorete aitaiara bonik; naarai amudiaros kakonyen nuka EJAKAIT, kakonyen nuka ajoreke da; koyaŋaasi luŋatuna luipu noi.

¹⁴ Kodanyata lukoreria kere luirimorito Gerar; naarai kobunoki kes etasuro loka EJAKAIT: koŋata ireria kere; naarai kejaas luŋatuna luipu tomakec.

¹⁵Kipota da iweman luka ibaren, koŋatut amerekekin nuipu noi ka akaalai, koboŋosi Yerusalem.