Read Ateso 2 Aisiltonokin 18 Bible Online

2 Aisiltonokin 18 - Ateso bible

2 Aisiltonokin 18

¹ Kejaas do Yekosapat kabar ka aibuses naepol; kimurakikinos ka Akab.

² Ketuboros ikar kolot ŋesi neejai Akab Samaria. Koarak Akab ŋes ka ituŋa lukejaas kaŋes amerekekin ka imoŋin luipu, kilip ŋes aupar alosit Ramot-gilead.

³Kotema Akab ekabaka loka Isirael Yekosapat ekabaka loka Yuda atiar, “Kiupar tope ijo keoŋ alosit Ramot-gilead?” Koboŋok ŋes ebe, “Arai eoŋ kwape iraar ijo, ikatuŋa kwape ituŋakon; kiupari kajo ojie.”

⁴ Kotema Yekosapat ekabaka loka Isirael atiar, “Keŋaiŋait, kiŋit kakirot naka EJAKAIT lolo.”

⁵ Kosodi ekabaka loka Isirael atukonokin inabin, ituŋa akwat aoŋon, kotema kes atiar, “Kilosi kereka aitiji Ramot-gilead, arai bo kenye?” Kotemasi kesi atiar, “Kolot, naarai kijaik Edeke ŋes akan naka ekabaka.”

⁶Konye kotema Yekosapat atiar, “Emamei bobo da enabi ece loka EJAKAIT, keŋitata ŋes?”

⁷Kotema ekabaka loka Isirael Yekosapat atiar, “Eriŋa ejai etuŋanan ediopet lokipedori aiŋitunia EJAKAIT: konye asac eoŋ ŋes; naarai mam kadwaranakini eoŋ nukajokak, dimarai ca nupekaronok duc: ŋes ŋol Mikaia okoku loka Imila.” Kotema Yekosapat atiar, “Kinyek ekabaka einer kwaŋin.”

⁸Kosodi ekabaka loka Isirael anyaraun ekapolokiton, kotema ŋes atiar, “Kisunyite koom Mikaia okoku loka Imila.”

⁹Kiboikin ekabaka loka Isirael ka Yekosapat ekabaka loka Yuda ŋinituŋanan oicoloŋoke, konapitos inapenekec, kiboikinos kaibois naelal neelomarere orute loka Samaria; kodwarata inabin kere kakonyenekec.

¹⁰Kotatau Sedekia okoku loka Kenaana amumwara nuka asua, kotema atiar, “Inera EJAKAIT kwanata ebe, Iremio nu Isurian, aitodol neadaunotor kesi.”

¹¹Kodwarata inabin kere kwaŋin ebe, “Kolot Ramot-gilead, kisirereŋio: naarai ijaikini EJAKAIT ŋes akan naka ekabaka.”

¹²Kosodi ekiyakia loabu kolot anyaraun Mikaia kotema ŋes atiar, “Koany, ejokuka akiro nuka inabin kaituk adiopet mama ejai ekabaka: keŋaiŋait, koputokinos do akonikirot kwape kadiopet ka nukec, kiner nuejok.”

¹³ Kotema Mikaia atiar, “Kwape ejaria EJAKAIT, nuelimuni Ekadeke, ŋupeŋun eneri.”

¹⁴ Kedolu ŋesi mama ejai ekabaka, kotema ekabaka ŋes atiar, “Mikaia, kilosi kereka isio Ramot-gilead ejie, arai bo kenyek?” Kotema atiar, “Koloto yesi, kisirereŋio; kijaikinio kes akanikus.”

¹⁵Kotema ekabaka ŋes atiar, “Irwan imwaasi ai kesiyapo jo ebe Sirikiilimok eoŋ adiokirot dimarai nukabeit kokiror loka EJAKAIT?”

¹⁶Kotema atiar, “Abu kaany Isirael kere isiarakina koroŋan, kwape amerekekin nuemameete ekecokon: kotema EJAKAIT atiar, ‘Emameete nu ejakait; koboŋosi kesi ŋinituŋanan oreke inapakina.’ ”

¹⁷Kotema ekabaka loka Isirael Yekosapat atiar, “Mam abu kalimok jo ebe mam kadwaranakini eoŋ nukajokak, dimarai ca nupekaronok?”

¹⁸ Kotema atiar, “Kanuka ŋun kiirasi yesi akirot naka EJAKAIT: abu kaany EJAKAIT iboie koicoloŋoke, kobwoi da ajore kere naka akuj kakanike nakoteten ka nakokediany.

¹⁹Kotema EJAKAIT atiar, ‘Iŋai iŋalaari Akab ekabaka loka Isirael, tetere elosi aibirokin Ramot-gilead?’ Kotema ediopet kopone lo, ece da kopone ece.

²⁰ Kolom do emoyo, kobwo kakonyen nuka EJAKAIT, kotema atiar, ‘Eŋalaari eoŋ ŋes.’ Kotema EJAKAIT ŋes atiar, ‘Kinyo?’

²¹ Kotema atiar, ‘Alomari, araun emoyo loka aiŋal kaituke nuka inabinoke kere.’ Kotema atiar, ‘Iŋalaari ijo ŋes, ido ipedori: koloma, kiswama kwaŋin.’

²² Aso do koany, ebwaik EJAKAIT emoyo loka aiŋal aituke nuka inabinokon lu; kinerak EJAKAIT jo aronis.”

²³ Kosodi Sedekia okoku loka Kenaana aikunyakin, kibap Mikaia eitinyo, kotema atiar, “Kikwaikini ai emoyo loka EJAKAIT enyouni kamakaŋ einer kajo?”

²⁴Kotema Mikaia atiar, “Koany, ianyuni kapaaran kaŋin, nailomaria agola nakotoma aiŋop.”

²⁵Kotema ekabaka loka Isirael atiar, “Kikamutu Mikaia, kinyakakis ŋes Amon ekayaiton loka ere, mama ejai Yoas da okoku loka ekabaka;

²⁶ kolimokis ebe, ‘Inera ekabaka kwanata ebe, Kibwaikisi ekesa lo aidaris, kitanyamete ŋes inyamat luka aiticanitoi ka akipi nuka aiticanitoi, aitodol neaboŋunio eoŋ kainapakin.’ ”

²⁷Kotema Mikaia atiar, “Arai teni kibonu ijo kainapakin, mam EJAKAIT inerit kamaka.” Kotema atiar, “Kiirasi yesi ituŋa, yes kere.”

²⁸Koloto do ekabaka loka Isirael ka Yekosapat ekabaka loka Yuda Ramotgilead.

²⁹ Kotema ekabaka loka Isirael Yekosapat ekabaka loka Yuda atiar, “Etegelikini eoŋ bon, alosi ojie; konye konap ijo inapenekon.” Kitegelikin ekabaka loka Isirael bon; koloto ojie.

³⁰Abu ekabaka loka Suria kicorakinite ikapolokitok luka agalinike ebe, “Sirikijioto ka ludidik karaida kalukapolok, dimarai kito ekabaka loka Isirael bon.”

³¹ Kosodi kanen, keanyut ikapolokitok luka agalin Yekosapat, kobalas ebe, “Ŋes ekabaka loka Isirael.” Kanuka ŋun korioto aitiji ŋes; konye kodelo Yekosapat, kiŋarak EJAKAIT ŋes; kibelok Edeke kes anyoun kamake.

³²Kosodi kanen, keanyut ikapolokitok luka agalin ebe mere ŋes ekabaka loka Isirael, koboŋut karukitor ŋes.

³³Kiket ediotuŋanan akabwake komam elosikinit, kogum ekabaka loka Isirael neiriamitotor inapeneke lukasua: kanuka ŋun kotema ekereŋean agalike atiar, “Kibelok akanikon, kodaka eoŋ kajore; naarai kemusuŋi noi.”

³⁴Kosisior ejie kapaaran kaŋin; konye kiganakin ekabaka loka Isirael agalike asurokin Isurian aitodol eboŋ: kapak naalomaria akoloŋ kotwana.