Read Ateso 2 Aisiltonokin 24 Bible Online

2 Aisiltonokin 24 - Ateso bible

2 Aisiltonokin 24

¹ Kerai Yoas loka ikar ikanykaarei egeuni airum; kirumak ikar akaisaoŋon ko Yerusalem: ekiror loka totoke kerai Sibia naka Beer-seba.

² Kiswama Yoas nuejokuka kakonyen nuka EJAKAIT apaarasia kere nuka Yekoiada esasedoti.

³Komanyak Yekoiada ŋes aŋor aarei; kouri idwe lusap ka lupesur.

⁴Kosodi kanen akaulo kaŋun, kokoto Yoas aiteteun etogo loka EJAKAIT.

⁵ Kotukonok ŋesi isasedotin ka Ilebin, kotema kes atiar, “Kolomasi oreria luka Yuda, kotukonokis apesan kama ka Isirael kere aiteteunia etogo loka Ekusideke ŋolikaru, koanyutu ebe isuburikinete yesi akirot.” Konye mam Ilebin apotu kisuburikis.

⁶ Konyarau ekabaka Yekoiada ekapolon, kotema ŋes atiar, “Kanukinyo mam ca jo itepesenia Ilebin ayaŋaun koYuda ka Yerusalem esolo loka Musa ekejaanakinan loka EJAKAIT, ka loka ekodet loka Isirael kanuka ewema loka aitejenunet?”

⁷ Naarai apotu odwe luka Atalia, aberu ya nakaronon, kobelaros togo loka Edeke; iboro da lutiakuna kere luka etogo loka EJAKAIT ainakis Ibaalim.

⁸ Kicorak do ekabaka, kiswamata asaduku, kibwaikis kina orute loka etogo loka EJAKAIT.

⁹ Kolimoroi anatar Yuda ka Yerusalem, ainun EJAKAIT esolo loabu Musa ekejaanakinan loka Edeke kicorak Isirael kamodiŋ.

¹⁰Kiyalamas ikapolok kere, ka ituŋa kere, koyautu kocakakis asaduku, aitodol neadaunotor.

¹¹ Kosodi keyaun asaduku mama ejaas ikapolok luka ekabaka kakan naka Ilebin, keanyutu ebe ejaas apesan nuipu, kobu ekewadikan loka ekabaka ka ekaroan loka esasedoti lopeti, kobuko asaduku, koyaŋaasi, kinyakakis aiboisike. Kiswamata kwaŋin ŋinipaaran kotukonokis apesan nuipu noi.

¹²Koinak ekabaka ka Yekoiada luiswamaete aswam naka aijaanakin togo loka EJAKAIT; kisiwoteoto ikadukok ka ikekeok aiteteun etogo loka EJAKAIT, ikatatak da asua ka aisinin aiteteunia etogo loka EJAKAIT.

¹³ Kiswamata ikeswamak, kitodoloto aswam ejok, kosipokis etogo loka Edeke kaibusesuke, kitogogoŋoto ŋes.

¹⁴ Kedautu kesi, koyaut apesan nuedeunos mama ejai ekabaka ka Yekoiada. Kiswamauniata iboro lukotogo loka EJAKAIT, iboro aijaanakinia, ka ainakinia, ka akaalei, ka iboro luka esabu ka luka epuesa, Koinanakis ainakineta nuicweio togo loka EJAKAIT tiritir apaarasia kere nuka Yekoiada.

¹⁵ Konye komoiono Yekoiada, kipu apaarasiake noi, kotwana; korai loka ikar akwatat ka akaisauni naketwania.

¹⁶ Aponi kidaikinai ore loka Daudi neejaas ikabakan, naarai abu kiswama nuejok koIsirael, mama ejai Edeke da ka ekekek.

¹⁷ Akaulo katwanare naka Yekoiada kopotu ikapolok luka Yuda, kisudedoto mama ejai ekabaka, Kosodi ekabaka akiirar kes.

¹⁸ Kojalata etogo loka EJAKAIT, Edeke loka lukapapaakec, kijaanakis Aserim ka aputosia: kobunok anyunyura Yuda ka Yerusalem kanuka adiakaretekec kana.

¹⁹ Konye kijukanakini nesl kes inabin ainyakun bobo mama ejai EJAKAIT; kitejenikis kes; konye koŋeroto akiirar kes.

²⁰ Kodoik emoyo loka Edeke Sekaria okoku loka Yekoiada esasedoti: kobwo kokuju kituŋa, kotema kes atiar, “Inera Edeke kwanata ebe, Kanukinyo itapaariata yesi aicorakineta nuka EJAKAIT, kinyeis akeriakar? Naarai ijalata EJAKAIT, ŋes da kijali yes.”

²¹ Kinerutu aluikin ŋes, kibiribiroto ŋes kamor kaicorakinet naka ekabaka alaro naka etogo loka EJAKAIT.

²²Kwaŋin mam abu Yoas ekabaka kiitu asianut nakiswamakinit Yekoiada papa loka Sekaria, konye koar okokuke, Etwani kotema atiar, “Kosesen EJAKAIT, kitepesen.”

²³ Kosodi kanen, awasia naka ekaru, kobu ajore naka Isurian asurokin ŋes: kopotu Yuda ka Yerusalem, komudiasi ikapolok kere luka ituŋa kotuŋa, kijukasi lunatunakec kere mama ejai ekabaka loka Damasiko.

²⁴ Naarai abu ajore naka Isurian kerioŋet loedit loka ituŋa; kijaik EJAKAIT ajore naepol noi akanikec, naarai apotu kojalata EJAKAIT, Edeke loka lukapapaakec. Kwaŋin kitodolik Yoas etube.

²⁵ Kenyoutu kesi kamakeŋ, (naarai kinyeis ŋes edeka noi,) kinerutu ikekejaanakinak asurokin ŋes kanuka aokot nuka odwe luka Yekoiada esasedoti, koarakis ŋes oitadake, kotwana: aponi kidaikinai ore loka Daudi, konye mam aponi kidaikinai atesina nuka ikabakan.

²⁶Lu kes luenerunete asurokin ŋes; Sabad okoku loka Simeat Amonit, ka Yekosabad okoku loka Simirit Amoabit.

²⁷Nuka odweke, ka apolou naka aritai nukisibwokio, ka airucakin aiduk etogo loka Edeke, koany, iwadikatai kakiro nuka eitabo loka ikabakan. Kirum Amasia okokuke aiboisike.