Read Ateso 2 Aisiltonokin 25 Bible Online

2 Aisiltonokin 25 - Ateso bible

2 Aisiltonokin 25

¹ Kerai Amasia loka ikar akaisaarei ka lukany egeuni airum; kirumak ikar akaisaarei ka lukanykaoŋon koYerusalem: ekiror loka totoke kerai Yekoadan naka Yerusalem.

² Kiswama nuejok kakonyen nuka Ejakait, konye mere keketau kere.

³ Kosodi kanen, nakitieasere akejakanut kamake, koar ikekejaanakinak luapotu koarata papake.

⁴ Konye mam abu koar ikecedwe, konye kiswama kwape ejaatar nuiwadikatai oitabo loka ikisila luka Musa, kwape kicorakinia EJAKAIT ebe, Mam lukapapa etwakikinete idwekec, karaida idwe atwakikin lukapapakec; konye etwanikini ŋinituŋanan akeronis.

⁵ Bobo da kotukok Amasia Yuda, kitemonok kes kwape ajaatar ikekia luka lukapapakec, ikapolok luka ilukumin ka ikapolok luka akwat, Yuda kere ka Benyamin: kimara kes ageuni kaluka ikar akaisaarei ka adepar, kodum kes imwaasi ituŋa ilukumin akwat auni lueseunitai, luepedorete alosit ojie, luejenete aitwasam akwara ka ebuku.

⁶Kiboleoto ŋesi kituŋa ilukumin akwatat lukirigin luetitiŋ koIsirael atalatan akwatat nuka epuesa.

⁷ Konye kobu etuŋanan loka Edeke mama ejai, kotema atiar, “Wu ekabaka, kinyek ajore naka Isirael aupar kajo; naarai mam EJAKAIT ejai kaIsirael, kes idwe kere luka Epuraim.

⁸ Konye arai ilosi; kiswama katitiŋ, kogogoŋor kojie; kibirori Edeke jo kakonyen nuka lukasurupo; naarai ejai Edeke apedor aiŋarakin, ka aibiror.”

⁹ Kotema Amasia etuŋanan loka Edeke atiar, “Konye kikwaikini do ai nuka atalatan akwatat nuainak ajore naka Isirael?” Koboŋok etuŋanan loka Edeke ebe, “Epedori Edeke ainakin jo nuitelekarito ŋun.”

¹⁰Kosodi Amasia agitar kes, ajore naabuni mamake koEpuraim, aboŋor ore: ŋes kinepunia anyunyurakec noi aluikin Yuda, koboŋosi ore kanyunyura naepol.

¹¹ Kotitiŋior Amasia, kiŋarenik iketuŋa, kolot Aditot naka Abalaŋ, kodany ilukumin itomon kodwe luka Seir.

¹²Kiioreutu idwe luka Yuda ice ilukumin itomon ejarete, koyaut kes kuju moru, kocakasi kes kokuju moru, kobilibiliunos.

¹³Konye ituŋa luka erioŋet loabu Amasia kinyaka, kinyeis aupar kaŋes ojie, kibirokinos ireria luka Yuda, anyoun koSamaria kiton Bet-koron, kodany ilukumin iuni kakesi, koyaŋaasi luŋatuna luipu.

¹⁴ Kosodi kanen, kedau Amasia aboŋun kajar Idomein, koyau idekesio luka idwe luka Seir, kosipok kes araun idekesioke, kokukonokin kes, kisupuruikin kes lueur maa.

¹⁵ Ŋes kinepunia anyunyura naka EJAKAIT aluikin Amasia, kijukak ŋes enabi, loatemari ŋes atiar, “Kanukinyo imoiaa ijo idekesio luka ituŋa, lumam apotu kitajarata ikecetuŋa kakanikon?”

¹⁶ Kosodi kanen, kineras kaŋes, kotema ekabaka ŋes atiar, “Kidakakinit kereka isio jo araun lokaurianet naka ekabaka? Kinyek; kanukinyo tikiinomere?” Kosodi enabi ainyein, kotema atiar, “Ajeni ebe elosikinit Edeke amudiar jo, naarai iswama ŋun, komam iirari akainerun.”

¹⁷ Kosodi Amasia ekabaka loka Yuda ainerun, kijuka da mama ejai Yoas okoku loka Yekoakas okoku loka Yeku, ekabaka loka Isirael ebe, “Bia, kaanyunos kakonye.”

¹⁸Kijuka Yoas ekabaka loka Isirael mama ejai Amasia ekabaka loka Yuda, kobala ebe, “Abu ekenep loajai Lebanon kijukak eres loajai Lebanon, ebe, Kokorak akokukon okokuka komany: kitoro etiaŋ loka ais loajai Lebanon, kicakacak ekenep.

¹⁹ Ibala ijo ebe, ‘Koany, adany Edom’; iturokina etaukon ailabilab: kopaik ore; kanukinyo ilomaria ijo akiro numere nukon ka atwaniar, kibirori ijo, ka Yuda da kajo?”

²⁰ Konye koŋer Amasia akiirar; naarai kerai akirot naka Edeke, tetere ijaikini kes akan naka lukasurupokec, naarai amoata idekesio luka Edom.

²¹Kolot do Yoas ekabaka loka Isirael; koanyunos kakonye, ŋesi ka Amasia ekabaka loka Yuda koBet-Semes, loarai loka Yuda.

²²Kireŋeai Yuda kakonyen nuka Isirael; koker, ŋinituŋanan owemake.

²³ Kikam Yoas ekabaka loka Isirael Amasia ekabaka loka Yuda, okoku loka Yoas, okoku loka Yekoakas, kolset-semes, koyau ŋes Yerusalem, kotiyatiya arwatat naka Yerusalem anyoun korute loka Epuraim kiton orute loka agor, ikubitin akwat aoŋon.

²⁴Koŋata esabu ka epuesa kere, ka iboro kere luadumunio koObededom togo loka Edeke, ka iboro luka akais nuipu lukotogo loka ekabaka, ka lukititiŋa da, koboŋo Samaria.

²⁵ Kobut Amasia okoku loka Yoas ekabaka loka Yuda ikar itomon ka lukany akaulo katwanare naka Yoas okoku loka Yekoakas ekabaka loka Isirael.

²⁶Aswamisio ace nuka Amasia, nusodit ka nukawasia, koany, mam kereka iwadikatai oitabo loka ikabakan luka Yuda ka Isirael?

²⁷Agear kapaarasia nuebelokinor Amasia anyoun katupit EJAKAIT, kinerut asurokin ŋes koYerusalem; koker Lakis; konye kijukasi atupakin ŋes Lakis, koarakinai ŋina.

²⁸ Koyaunai ŋes kobalasin, kidaikis nepepe kalukapapaake ore loka Yuda.