Read Ateso 2 Aisiltonokin 26 Bible Online

2 Aisiltonokin 26 - Ateso bible

2 Aisiltonokin 26

¹ Koyaata ituŋa kere luka Yuda Usia, lokerai loka ikar itomon ka lukanykape, kitaraut ŋes ekabaka aibois naka papake Amasia.

²Koduk ŋesi Elot, kinyakak Yuda, kedau ekabaka ajotoor kalukapapaake.

³Kerai Usia loka ikar itomon ka lukanykape egeuni airum: kirumak ikar akaisakany ka luarei ko Yerusalem: ekiror loka totoke kerai Yekilia naka Yerusalem.

⁴Kiswama nuejok kakonyen nuka EJAKAIT, kwape kejaatar kere nueswamai papake Amasia.

⁵ Kibwaik etau amoot Edeke kapaarasia nuka Sekaria, lokituutoori aiyoŋ Edeke: kapaarasia nuamootor EJAKAIT kitekerian Edeke ŋes.

⁶ Koloma ŋesi, kitiji Ipilisitian, kotiyatiya arwatat naka Gat, ka arwatat naka Yabane, ka arwatat naka Asudod; koduk ireria kakwap naka Asudod, kaneejaas Ipilisitian da.

⁷ Kiŋarak Edeke ŋes asurokin Ipilisitian, ka Iarabun lukiboiete koGur-baal, ka Imeunim.

⁸ Koinakis Imonain ainakineta mama ejai Usia; kisiarakina ekekiror kiton neelomarere Misiri; naarai kogogoŋoor noi.

⁹ Ido koduk Usia itogoi lueojak Yerusalem, korute loka agor, korute da loka aditot, ka neekudokinia arwatat da, kitogogoŋ kes.

¹⁰ Koduk itogoi lueojak kamodiŋ, kobok ataparin nuipu, naarai ajaas ŋes kibaren nuipu ajesa kapuutona da; ajaas ikakoriok ka ikacapak emusabibu koroŋan komanikoria lupusuk da; naarai komina ŋesi noi akoru.

¹¹Ido ajai Usia ajore naka ikajiok lualomanarete ojie korioŋeta, kwape ajaar etiai loka aimarakec loemari Yeiel ekewadikan ka Maaseia ekapolokiton, kakan naka Kanania, ediopet kokapolok luka ekabaka.

¹²Etiai kere loka ikapolok luka ikekia luka lukapapaakec, ituŋa lukirigin luetitiŋ emwaasi ilukumin iarei ka akwat akanykape.

¹³Kakanikec ajai ajore naetuutooro ilukumin akwat auni ka lukanykaarei ka akwat akany, luajiononos kagogoŋ naepol, aiŋarakin ekabaka asurokin lukasurup.

¹⁴Kitemok Usia ibukui, ka akwaras, ka ikopiran, ka ikootin lukasua, ka akabwai, ka alica nuporoea kanukec, ŋes ajore kere.

¹⁵Kiswamau koYerusalem acuman, nuapwakunete ituŋa luepiriaka, ajaut kotogoi lueojak karwatatin nuitogogoŋio, agumia imalia ka amor nuepolok. Kisiarakin ekekiror kama eiwana; naarai kinarakinitai noi noi, aitodol nakegogoŋoror.

¹⁶ Konye nakegogoŋoror kodakun eketau, tape eswamai nueroko, kibuca kama ejai EJAKAIT Ekedeke; naarai koloma oyekalu loka EJAKAIT aisupuruun lukisupurununo kotem lokisupuruunet.

¹⁷ Koloma Asaria esasedoti atupakin ŋes, ka isasedotin luka EJAKAIT akaisakanykauni nepepe kaŋes, luaraas ituŋa luetitiŋ:

¹⁸ kirebokinete Usia ekabaka, kotemasi ŋes atiar, “Mam eraas nukon, Usia, aisupuruun lukisupurununo mama ejai EJAKAIT, konye eraas nuka isasedotin odwe luka Aaron, luatiakunio aisupuruun lukisupurununo: koloma kaibois nakalaunan: naarai ibuca; kwabo mam ibusiar kama ejai EJAKAIT Edeke.”

¹⁹ Kosodi Usia anyunyurikin; kitiŋite aisupurunet akanike aisupuruun lukisupurununo; napenyunyurikini isasedotin, kolomuni atapon koreeteke kakonyen nuka isasedotin kotogo loka EJAKAIT, eiduny ketem lokisupuruunet.

²⁰ Koŋolia ŋes Asaria esasedoti lopeti, ka isasedotin kere, ido koany, ejai atapon oreeteke, kisunyas aremor ŋes kina; eebo, kisunya ŋesi da elopet alomar, naarai enomit EJAKAIT ŋes.

²¹ Korai Usia ekabaka lokatapon kiton apaaran naka atwanareke, kiboienenei kotogo loegelara, naarai kerai lokatapon; naarai agelario kotogo loka EJAKAIT; koyaite do Yotam okokuke etogo loka ekabaka, etubonokini ituŋa luka akwap.

²² Aswamisio ace nuka Usia, nusodit ka nukawasia, abu Isaia enabi, okoku loka Amos, kiwadika.

²³ Kojotoor do Usia kalukapapaake; aponi kidaikinai kaJukapapaake omanikor lokidaanakina lokerai loka ikabakan; naarai abalasi ebe, “Erai lokatapon.” Kirum Yotam okokuke aiboisike.