Read Ateso 2 Aisiltonokin 28 Bible Online

2 Aisiltonokin 28 - Ateso bible

2 Aisiltonokin 28

¹ Kerai Akas loka ikar akaisaarei egeuni airum; kirumak ikar itomon ka lukanykape koYerusalem: mam abu kiswama nuejokuka kakonyen nuka EJAKAIT, kwape Daudi papaake:

² konye kolosenenei korotin luka ikabakan luka Isirael, kiswamau da aputosia nuecalara kanuka Ibaalim.

³ Ido kisupuruun lukisupurununo aditot naka okoku loka Kinom, kicwe ttedwe kakim, kwape ajaatar italesia luka ikapirin, luabu EJAKAIT kireŋe kakonyen nuka idwe luka Isirael.

⁴Koinak asuban kisupuruun da lukisupurununo kaiboisio nuiceleleete, koukon da, ido kokwap ka ŋolikitoi loepesit.

⁵ Kanuka ŋun kijaik EJAKAIT Ekedeke ŋes akan naka ekabaka loka Suria; kodanyata ŋes, koyaŋaasi ekodet loepol loka luejoreoro, koyaŋaasi kes Damasiko. Kijaikinai da akan naka ekabaka loka Isirael, loabu kodany ŋes kearit loepol.

⁶ Naarai koar Peka okoku loka Remalia koYuda ilukumin akwatat ka ilukumin akaisaarei kapaaran adiopet, kes kere ituŋa luetitiŋ; naarai apotu kojalata EJAKAIT, Edeke loka lukapapaakec.

⁷Abu Sikiri, etuŋanan lokirigi loka Epuraim, koar Maaseia okoku loka ekabaka, ka Asirikam ekayaiton etogo, ka Elukana loiareikinit ekabaka.

⁸ Kijoreosi idwe luka Isirael koinacanakec ilukumin akwat aarei, aŋor, ka idwe lusap ka lupesur, koyaŋaasi da luŋatuna luipu, koyaŋaut luŋatuna Samaria.

⁹ Konye kojai ŋina enabi loka EJAKAIT, ekekiror Oded; kolom ŋesi airiamakin kajore naebunit Samaria, kotema kes atiar, “Koany, naarai anyunyurik EJAKAIT Edeke loka lukapapaakus Yuda, ejaik kes akanikus, iarata kes kanyunyura naedolit akui.

¹⁰ Kwana da ipeleikinito aitonokok idwe luka Yuda ka Yerusalem araut ibulesin ka abulesinikus: mam kereka kotomakus da nuigwaunito kama ejai EJAKAIT Ekusideke?

¹¹ Aso do kopupunoi, kinyakasi luijoreunito, luiioreutu yesi koinacanakus: naarai ejai anyunyura naededeŋ naka EJAKAIT mamakus.”

¹²Kosodete ice kokapolok lukodwe luka Epuraim, Asaria okoku loka Yokanan, ka Berekia okoku loka Mesilemet, ka Yekisikia okoku loka Salum, ka Amasa okoku loka Kadalai, konyoikis ŋul Juapote kojie.

¹³ Kotemasi kes atiar, “Mam yes itolomunete ne luijoreunito: naarai ipeleikis nukitwagaunete oni kama ejai EJAKAIT, aiyatakin aronisiowok ka agwauniwok: naarai epol agwauniwok, ejai da anyunyura naededeŋ aluikin Isirael.”

¹⁴Kinyekis do ituŋa luakapakina lujiis luejoreunito ka luŋatuna kakonyen nuka ikapolok ka ekodet kere.

¹⁵ Konyoutu ituŋa luelimoritai ikecekiroria, koyaŋaasi luejoreunito, kitwasamata luŋatuna aitanapia luimujalalas, koinakis kes inapen ka amuk, kitanyamata kitamata kes, kinyonyoikis kes, kisibwanenoto lukalanyakakec kere asigirian, kinyamakis kes Yeriko, ere loka idukudukun mama ejaas iinacanakec: kosodete konyet aboŋor Samaria.

¹⁶ Kapaarasia kaŋun kijuka ekabaka Akas mama ejaas ikabakan luka Asuria aiŋarakin ŋes.

¹⁷ Naarai apotu bobo Idomein kopotu aidany Yuda, koyaŋaasi lukijoreoro.

¹⁸ Konataritos da Ipilisitian ireria luka apuutona, ka Eŋalakimak naka Yuda, kirumata Bet-semes, ka Aiyalon, ka Gederot, ka Soko ka ireriake, ka Timuna ka ireriake, Gimiso da ka ireriake: kiboikinos nen.

¹⁹ Naarai kitisil EJAKAIT Yuda kanuka Akas ekabaka loka Isirael; naarai kikonak komam aitikokin koYuda, kogwau noi akiro kama ejai EJAKAIT.

²⁰ Kobu Tiligat-pilineser ekabaka loka Asuria mama ejai, kitican ŋes, konye mam abu kitogogoŋ.

²¹Naarai kolema Akas atutubet korogo loka EJAKAIT, kotogo da loka ekabaka ka loka ikapolok, koinak ekabaka loka Asuria; konye mam ŋun kiŋarakinito ŋes.

²² Kapaarasia nuka icanike kiyatak adiakar kama ejai EJAKAIT, ŋes ŋol ekabaka Akas.

²³ Naarai abu koinak asuban mama ejaas idekesio luka Damasiko, luadanyete ŋes; kobala ebe, “Naarai idekesio luka ikabakan luka Suria kinarakinete kes, ŋes ainakinia eoŋ asuban mama ejaas, tetere keŋarakinete eoŋ.” Konye koraunos amudiarike, ka naka Isirael kere.

²⁴ Kotukonok Akas iboro kere luka etogo loka Edeke, kojepejep iboro lukotogo loka Edeke, kogolok ikekia lukotogo loka EJAKAIT; kiswamau itemwan agoria kere nukoYerusalem.

²⁵Kiswamak aiboisio nuiceleleete oreria kere luka Yuda, aisupuruunia lukisupurununo mama ejaas idekesio ice, kitunyunyurik EJAKAIT, Edeke loka lukapapaake.

²⁶ Aswamisioke ace, ka iponesioke kere, nusodit ka nukawasia, koany, iwadikatai oitabo loka ikabakan luka Yuda ka Isirael.

²⁷Kojotoor Akas ka lukapapaake, aponi kidaikinai ore, ŋes Yerusalem; naarai mam aponi koyaŋaarai atesina nuka ikabakan luka Isirael: kirum Kesekia okokuke aiboisike.