Read Ateso 2 Aisiltonokin 29 Bible Online

2 Aisiltonokin 29 - Ateso bible

2 Aisiltonokin 29

¹ Kogeu Kesekia airum korai loka ikar akaisaarei ka lukany: kirumak ikar akaisaarei ka lukanykaoŋon koYerusalem: ekiror loka totoke kerai Abiya akoku naka Sekaria.

²Kiswama nuejok kakonyen nuka EJAKAIT, kwape ajaatar kere nueswamai Daudi papaake.

³ Okaru losodit loka airumuke, olap losodit, koŋaa ŋesi ikekia luka etogo loka EJAKAIT, kiteteu kes.

⁴Kitolom isasedotin ka Ilebin, kotukok kes aibois naelal ari nakokide,

⁵ kotema kes atiar, “Kopupunoi eoŋ, yes Ilebin; kitalaunos, kitalautu da etogo loka EJAKAIT Edeke loka lukapapaakus, kodakasi amodokok kina kaibois nakalaunan.

⁶ Naarai apaasi lukapapaawok, eswamata nueroko kakonyen nuka EJAKAIT Ewokodeke, ajalata ŋes, ebelokis da akecekonyen kaibois naka EJAKAIT, ebonokis ipuranakec.

⁷ Agolokis da kek ia kaneelomarere, etudeniosi atalai, mam apotu kisupuruut lukisupurununo karaida ainakin ainakineta nuicweio kaibois nakalaunan mama ejai Edeke loka Isirael.

⁸ Kanuka ŋun abunok anyunyura naka EJAKAIT Yuda ka Yerusalem, ejaiki kes araun etasuro, araun aumokinet, ka aijuar, kwape ianyuniata yesi kakonyenekus.

⁹ Naarai koany, apotu lukapapaawok kibiroros kekileŋ, ijoreoritai idwewok lusap ka lupesur, ka anorowok kanuka ŋun.

¹⁰ Ejai teni otauka aitutuk ka EJAKAIT, Edeke loka Isirael, tetere ibelokini akenyunyura naededeŋ anyoun kamawok.

¹¹ Ikadwe, sirikipalasi kwana: naarai kiseu EJAKAIT yes abwoenen kakonyeneke, aijaanakin ŋes, koraut ikekejaanakinak, kisupuruut lukisupurununo.”

¹²Kosodete Ilebin anyoun, Makat okoku loka Amasai, ka Yoel okoku loka Asaria, kodwe luka Ikokatin: kodwe luka Merari, Kis okoku loka Abidi, ka Asaria okoku loka Sima, ka Eden okoku loka Yoa:

¹³Kodwe luka Elisapan, Simiri ka Yeuel: kodwe luka Asap, Sekaria ka Matania:

¹⁴kodwe luka Keman, Yekuel ka Simei: kodwe luka Yedutun, Semaia ka Usiel.

¹⁵ Kotukonokis iinacanakec, kitalaunos, kolomasi, kwape ajaar aicorakinet naka ekabaka kakiro nuka EJAKAIT, aiteseg etogo loka EJAKAIT.

¹⁶ Kolomasi isasedotin atutubet nakotoma nakotogo loka EJAKAIT, aiteseg ŋes, kitolomut amodokok kere nakedumunete koyekalu loka EJAKAIT alaro naka etogo loka EJAKAIT. Koyaŋaasi Ilebin kodakasi kiŋa kiton aguurut Kidiron.

¹⁷ Kogeut kapaaran nasodit naka elap losodit aitalaun, ido kapaaran nakikanyetekauni naka elap kodolot neelomarere naka EJAKAIT; kitalaut etogo loka EJAKAIT kodaut apaarasia akanykauni: kapaaran nakitomonet kakanykape naka elap losodit, kodaut do.

¹⁸Kosodete alomar mama ejai Kesekia ekabaka togoke, kotemasi atiar, “Kidau aitesegaar etogo kere loka EJAKAIT, ka etem loka ainakineta nuicweio, ka iboroke kere, ka emesa loka imugatin luka aitodikin, ka iboroke kere.

¹⁹ Ido iboro kere luabu ekabaka Akas kocaka kairumuke naadiakaria ŋesi, kipou ketemokis kes ka aitalaun; ido koany ejaas kiŋaren ketem loka EJAKAIT.”

²⁰Kosodi Kesekia ekabaka anyoun tupuruc, kotukok ikapolok luka ere, kolot togo loka EJAKAIT.

²¹ Koyaut imoŋin lutoba ikanykaarei, ka imerekekin ikanykaarei, ka imerekekin ludidik ikanykaarei, ka ikorwa ikanykaarei araun ainakinet naka aronis kanuka ajakanut, ido kanuka aibois nakalaunan ka Yuda da. Kicorak ŋesi isasedotin odwe luka Aaron ainakin kes otem loka EJAKAIT.

²² Koarata imoŋin lutoba, kijaut isasedotin aokot, kobwatanakis kotem: koarata da imerekekin ludidik, kobwatanakis aokot kotem.

²³ Kisukunyikis ikorwa araun ainakinet naka aronis kakonyen nuka ekabaka ka ekodet; kidokokis kes akaninikec;

²⁴ koarata isasedotin kes, kiswamaut ainakinet naka aronis kaokotokec kotem: aitulucio Isirael kere; naarai kicorak ekabaka ainakin ainakinet naicweio ka ainakinet naka aronis kanuka Isirael kere.

²⁵ Kibwaik Ilebin togo loka EJAKAIT ejaas kaisinin nueruosi ka isabulin, ka adeudeun, kwape ajaar aicorakinet naka Daudi, ka Gad ekadwaran loka ekabaka, ka Natan enabi: naarai kerai aicorakinet naka EJAKAIT konabinoke.

²⁶ Kobwaata Ilebin ejaas kiboro lueruosi luka Daudi, ka isasedotin da karupepen.

²⁷ Kicorak Kesekia ainakin ainakinet naicweio kotem. Napegeun ainakin naicweio, kogeuni da ekosio loka EJAKAIT, ka arupepen, nepepe kiboro lueruosi luka Daudi ekabaka loka Isirael.

²⁸Komaata lukokodet kere, koyooto ikayook, kokutata ikakutak arupepen; kikote nen aitodol neadaunor ainakinet naicweio.

²⁹ Kedautu ainakin, kokukum ekabaka ka ŋul kere luajaas kaŋes, komaata.

³⁰ Ido apotu Kesekia ekabaka ka ikapolok kicorakis Ilebin ayoore aiturit EJAKAIT kakiro nuka Daudi, ka nuka Asap ekadwaran, Koyooto aiturit kaiyalama, kituluroto akwesikec, komaata.

³¹ Kosodi Kesekia aboŋokin ebe, “Kwana italaunos do bonik kama ejai EJAKAIT, kikunyutu koyautu asuban ka ainakineta nuka aimal togo loka EJAKAIT,” Koyau ekodet asuban ka ainakineta nuka aimal; ŋul da luakotosi ikecetauon koyaut ainakineta nuicweio.

³²Etiai loka ainakineta nuicweio, nuayauni ekodet, emwaasi imoŋin lutoba akaisakanykaarei, imerekekin akwatat, ka imerekekin ludidik akwat aarei: ŋul kere keraas ainakineta nuicweio mama ejai EJAKAIT.

³³Iboro luketiakunitai emwaasi imoŋin akwat akanykape ka amerekekin alukumin auni.

³⁴ Konye ekidioko isasedotin, mam apedorete aijen ainakineta nuicweio kere: kanuka ŋun kiŋarakis iinacanakec Ilebin kes aitodol neadaunor aswam, aitodol da neetalaunotor isasedotin bonik: naarai etenara Ilebin itauon aitalauna bonik aitelekarit isasedotin.

³⁵ Epu noi da ainakineta nuicweio, ka asiepai nuka ainakineta nuka ainapakin, ka ainakineta numatan nuka ŋiniinakinet naicweio Kitemokinoi kwaŋin aijaanakin naka etogo loka EJAKAIT.

³⁶ Kiyalamikin Kesekia, ka ituŋa kere, kanuka ŋun nuetemokinit Edeke ituŋa: naarai kiswamaun akirot atipet.