Read Ateso 2 Aisiltonokin 32 Bible Online

2 Aisiltonokin 32 - Ateso bible

2 Aisiltonokin 32

¹ Akaulo kaŋun, ka amunonut ŋin, kobu Senakerib ekabaka loka Asuria, koloma Yuda, kidukur asurokin ireria luebwaitai, koomit airum kes.

²Keanyu Kesekia ebe abu Senakerib, idenyakinit da asurokin Yerusalem,

³kinerut kaikapolokoke ka iketuŋa lukirigin ainwok akipi nuka ieoai luajaas kina naka ere; kiŋarakis ŋes.

⁴Kotukokinos do ituŋa luipu, konwokata ieoai kere, ka aguurut naelelei kokidiŋ kakwap, kobalas ebe, “Kanuto kinyo tikeponiata ikabakan luka Asuria, adumun akipi nuipu?”

⁵ Kotitiŋior, koduk arwatat kere naatiyatiyatai, kitonyou kiton otogoi lueojak, ka arwatat ace kokiŋa, kitogogoŋ Milo ore loka Daudi, kiswamau lujiis ka ibukui luipu.

⁶ Kibwaik ikapolok luka ejie apolokin ituŋa, kotukok kes neajai ŋesi kaibois naelal korute loka ere, kiner kakes nukaitalakaar, ebe,

⁷ “Kicata, kotitiŋioto, sirikikuriakaros karaida aiyaloŋoŋ kanuka ekabaka loka Asuria, karaida ekodet kere loepol loejai kaŋes: naarai epol loejai kaoni aitelekarit loejai kaŋes.

⁸ Ejai akan naka akuan kaŋes: konye ejai EJAKAIT Ewokodeke kaoni aiŋarakin, ka ejie kojiisiowok.” Kogoŋakina ituŋa akiro nuka Kesekia ekabaka loka Yuda.

⁹ Akaulo kaŋun kiyakia Senakerib ekabaka loka Asuria ikekejaanakinak Yerusalem, (ajai ŋesi kiŋaren ka Lakis, ka akepedor kere kaŋes,) mama ejai Kesekia ekabaka loka Yuda, ka lukoYuda kere luajaas Yerusalem ebe,

¹⁰“Inera kwanata Senakerib ekabaka loka Asuria ebe, ‘Iŋai bo loimunosi, tape idarete airigaunio koYerusalem?

¹¹Mam kereka Kesekia kinalarit yes, ainakin yes atwakare kebeli ka akure ebe, “Itajari EJAKAIT Ewokodeke oni kakan naka ekabaka loka Asuria”?

¹²Mam kereka Kesekia ŋol alemarit aiboisioke nuiceleleete, ka itemwanake, kicorak da Yuda ka Yerusalem ebe, “Imaete kotem ediopet, kaŋes da isupuruunete lukisupurununo”?

¹³ Mam yes ijenete nukeswamakin eoŋ ka lukapapaaka ituŋa kere luka akwapin? Kepedorito tope idekesio luka atekerin nuka akwapin ayuun akecekwap kakanika?

¹⁴Iŋai bo kodekesio kere luka atekerin ŋun nuamudiarete lukapapaaka cut, luapedorit ayuun iketuŋa kakanika, tape epedori Ekusideke ayuun yes kakanika?

¹⁵ Aso do kinye Kesekia aiŋal yes, karaida aisidik yes kakirot kana, kwabo sirikiyuutu ŋes: naarai amamei edeke ediopet loka ateker karaida ajakanut loapedorit ayuun iketuŋa kakanika, kakan da naka lukapapaaka: ikoni epedori ai Ekusideke nepepec da ayuun yes kakanika?’ ”

¹⁶Kiyatakis ikekejaanakinak einer erono mama ejai EJAKAIT Edeke, ka Kesekia da ekekejaanakinan.

¹⁷ Kiwadika da ibaluan, aimwaŋ EJAKAIT, Edeke loka Isirael, kiner erono mamake ebe, “Kwape idekesio luka atekerin nuka akwapin, lumam apotu koyuutu ikecetuŋa kakanika, kwape kwaŋin da mam Edeke loka Kesekia eyuuni iketuŋa kakanika.”

¹⁸ Kiworoto keporoto loepol kaŋajep naka Iyudayan mama ejaas ituŋa luka Yerusalem luajaas arwatat, aitukurian kes, ka aisiyaloŋoŋ da; tetere irumete ere.

¹⁹ Kineras nuka Edeke loka Yerusalem, kwape nuka idekesio luka ituŋa luka akwapin, luaraas aswam naka akanin nuka ituŋa.

²⁰Apotu Kesekia ekabaka, ka Isaia enabi okoku loka Amos, kilipa kanuka ŋun, komonyata mama ejai akui.

²¹Kijuka EJAKAIT emalaika, komudia ituŋa kere lukirigin luetitiŋ, ka ikeŋarenok, ka ikapolok, koidukurun luka ekabaka loka Asuria, Koboŋo akwapuke kodakara akou. Keloma ŋesi abila naka edekeke, apotu ŋul lualomunete kopikisike koarakis ŋes nen kekileŋ.

²² Kwaŋin kitajar EJAKAIT Kesekia ka luiboiete koYerusalem kakan naka Senakerib ekabaka loka Asuria, kakan da naka ice kere, kiŋarenik kes kaŋoliwai.

²³ Apotu luipu koinut EJAKAIT ainakineta koYerusalem, ka iboro luka akais nuipu mama ejai Kesekia ekabaka loka Yuda: kitopolooroi do kakonyen nuka atekerin kere agear kanen.

²⁴ Kapaarasia kaŋun kodekakin Kesekia nepetai atwanare: kilip EJAKAIT; kinera kaŋes, koinak ŋes aanyunet.

²⁵ Konye mam abu Kesekia kikonak kwape ajaar ajokis naeswamakinio ŋes; naarai kodakun eketau; kanuka ŋun kobunok ŋes anyunyura, ka Yuda ka Yerusalem da.

²⁶ Konye kitasonikin Kesekia kanuka aiwoŋonut nakotauke, ŋes ka luiboiete koYerusalem, ŋes mam anyunyura naka EJAKAIT ebunokinia kes kapaarasia nuka Kesekia.

²⁷Ajai Kesekia abar naepol ka aibuses: koduk aiŋadisia nuka epuesa, ka nuka esabu, ka nuka amor nuka akais nuipu, ka nuka lueur maa, ka nuka ibukui, ka nuka iponesio kere luka iboro luejok;

²⁸itogoi lukainad da luka eiyas loka akima ka ebino ka akinyet; aujoi da nuka iponesio kere luka itiaŋ, ka anukia nuka amerekekin.

²⁹ Bobo da kodum ireria, ka isipanin luipu noi luka aituk ka luka amerekekin: naarai abu Edeke koinak ŋes iboro luipu noi.

³⁰ Abu Kesekia ŋopeŋol kigalik atan naimukurur naka akipi nuka Gikon, kitelelea kes eitena ari nakoto naka ere loka Daudi, Kokerianar Kesekia kaswamisioke kere.

³¹ Konye kakirot naka ikiyakia luka ikapolok luka Babulon, lukijukunete aiŋitun nakaumokin naeswamatai kakwap, kojal Edeke ŋes aigimor, tetere ejenuni nuajaas otauke kere.

³² Aswamisio ace nuka Kesekia, ka akeswamisio nukajokak, koany, iwadikatai aitapoet naka Isaia enabi okoku loka Amos, oitabo loka ikabakan luka Yuda ka Isirael.

³³ Kojotoor Kesekia kalukapapaake, aponi kidaikinai adoket naka atesina nuka odwe luka Daudi: kitubusikis ŋes Yuda kere ka luiboiete ko Yerusalem katwanareke, Kirum Manase okokuke aiboisike.