Read Ateso 2 Aisiltonokin 33 Bible Online

2 Aisiltonokin 33 - Ateso bible

2 Aisiltonokin 33

¹ Kerai Manase loka ikar itomon ka luarei egeuni airum; kirumak ŋesi ikar akaisakany ka lukany ko Yerusalem.

² Kiswama nueroko kakonyen nuka EJAKAIT, kwape ajaatar italesia luka ikapirin, luerenearit EJAKAIT kakonyen nuka idwe luka Isirael.

³ Naarai koduk bobo aiboisio nuiceleleete nuatiyatiyat Kesekia papake; kosipok itemwan luka Ibaalim, kiswamau Aserot, koma ajore kere naka akuj, kijaanak kes.

⁴ Koduk itemwan togo loka EJAKAIT, loabu EJAKAIT kiner ebe, “Ejaenena ekakiror Yerusalem ikar kere.”

⁵ Koduk itemwan luka ajore kere naka akuj alaroi aarei nukotogo loka EJAKAIT.

⁶ Kitotor ikedwe akim kaditot naka okoku loka Kinom: konie aanyuneta, kitwasam nukalemelem, kiswama nukaicud, kouparos kaŋul kaluajaas ajokina, ka ikepiedak: kiswama nukaronok nuipu kakonyen nuka EJAKAIT aitunyunyurikin ŋes.

⁷ Kibwaik aput naegerer naka ibore yenemai ŋesi, naabu kiswamau, togo loka Edeke, loabu Edeke kolimok Daudi ka Solomon okokuke ebe, “Ebwaikini ekakiror togo lo ikar kere, Yerusalem da, loaseunit katekerin kere nuka Isirael.

⁸ Mam bobo da alemari akeju naka Isirael kakwap naaseikinit lukapapaakus; arai teni iricete aiswamaenen nuecoraki kes kere, ikisila kere ka apucuneta ka aicorakineta kakan naka Musa.”

⁹Kitapaa Manase Yuda ka luiboiete koYerusalem, kiswamata nueroko aitelekar atekerin, nuabu EJAKAIT komudia kakonyen nuka idwe luka Isirael.

¹⁰ Kinera EJAKAIT kaManase, ka ituŋake: konye mam apodosi.

¹¹ Kanuka ŋun koyau EJAKAIT ekapolon loka ajore naka ekabaka loka Asuria, loabu koyaŋa Manase kirikoi, koen ŋes kasua, koyaŋa Babulon.

¹² Nakejaar ŋesi ocan, kiŋaiŋa EJAKAIT Ekedeke, kitasonikin noi kakonyen nuka Edeke loka lukapapaake.

¹³ Kilip ŋes; kopup akeilip, kiira aiŋaiŋake, kinyaku Yerusalem ajakanutuke, Kosodi konyet kojen Manase ebe EJAKAIT ŋes Edeke.

¹⁴ Akaulo kaŋun koduk arwatat nakokiŋa ore loka Daudi, ari nakoto naka Gikon, aditot, kiton neelomarere orute loka iboro lukocor; kirigaun Opel, kitonyou kooja noi; kibwaik ikapolok luetitiŋ oreria kere luebwaitai luka Yuda.

¹⁵Kolema idekesio lumo, ka ibore yenamai ŋesi kotogo loks EJAKAIT, ka itemwan kere luadukokinit moru loka etogo loka EJAKAIT, ka Yerusalem da, kocaka kina naka ere.

¹⁶ Kiteteu etem loka EJAKAIT, koinak asuban nuka ainakineta nuka ainapakin ka nuka aimal kotomake, kicorak Yuda aijaanakin EJAKAIT, Edeke lokaIsirael.

¹⁷ Konye koroko ituŋa einanakinete asuban kaiboisio nuiceleleete, konye mama ejai EJAKAIT Ekecedeke bon.

¹⁸Aswamisio ace nuka Manase, ka akeilip mama ejai Edekeke, ka akiro nuka ikadwarak nualimonokinete ŋes kokiror loka EJAKAIT, Edeke loka Isirael, koany, iwadikatai kaswamisio nuka ikabakan luka Isirael.

¹⁹Akeilip da, ido kwape kiiraria Edeke ŋes, aronisike kere, ka adiakarike, ka aiboisio nuadukokinit ŋesi aiboisio nuiceleleete, kosipok Aserim, ka aputosia nuegerer, eriŋa kitasonikino; koany, iwadikatai kakiro nuka Kosai.

²⁰Kojotoor do Manase kalukapapaake, aponi kidaikinai togoke kelopet: kirum Amon okokuke aiboisike.

²¹Kerai Amon loka ikar akaisaarei ka luarei egeuni airum: kirumak ikar iarei koYerusalem.

²²Kiswama nueroko kakonyen nuka EJAKAIT, kwape eswamaa Manase papake: koinak Amon asuban mama ejaas aputosia kere nuegerer nuabu Manase papake kiswamau, kijaanak kes.

²³ Mam abu kitasonikin kakonyen nuka EJAKAIT, kwape kitasonikinor papake; konye kiyatanak Amon ŋol agwaun akiro.

²⁴ Kinerut ikekejaanakinak asurokin ŋes, koarakis ŋes togokeŋ.

²⁵Konye apotu ituŋa luka akwap koarata ŋul kere luenerunete asurokin ekabaka Amon; kodakakis ituŋa luka akwap Yosia okokuke araun ekabaka aiboisike,