Read Ateso 2 Aisiltonokin 34 Bible Online

2 Aisiltonokin 34 - Ateso bible

2 Aisiltonokin 34

¹ Kerai Yosia loka ikar ikanykauni egeuni airum; kirumak ikar akaisauni ka Iodiopet koYerusalem.

²Kiswama nuejok kakonyen nuka EJAKAIT, kolosenenei korotin luka Daudi papaake, komam epaari akan nakoteten karaida nakokediany.

³ Naarai kokaru lokikanyetekauni loka airumuke, eriŋa erai esapat, kogeu amoot Edeke loka Daudi papaake: kokaru lokitomonet kaarei kogeu aiteseg Yuda ka Yerusalem alemar aiboisio nuiceleleete, ka Aserim, ka aputosia nuegerer, ka aputosia nuecalara;

⁴ kobilibilai itemwan luka Ibaalim kakonyeneke; kojepejep aputosia nuka akoloŋ nuiceleleete kokujukec; komunyumuny Aserim, ka aputosia nuegerer, ka aputosia nuecalara, kitarau apua, kipurupuranak atesina nuka ŋul kaluapotu koinakis asuban mamakec.

⁵ Kicwei akojo nuka isasedotin kotemwanakec, kiteseg Yuda ka Yerusalem.

⁶Kiswama kwaŋin koreria luka Manase ka Epuraim ka Simeon, kiton Naputali, ka aaponorukec airimor.

⁷ Kobilibil itemwan, kidecidec Aserim ka aputosia nuegerer araun apua, kojepejep aputosia nuka akoloŋ anatar akwap kere naka Isirael, koboŋo Yerusalem.

⁸ Kokaru lokitomonet kakanykauni loka airumuke, kedau aiteseg akwap, ka etogo, kijuka Sapan okoku loka Asalia, ka Maaseia ekayaiton ere, ka Yoa okoku loka Yoakas ekesiitonokinan, aiteteun etogo loka EJAKAIT Ekedeke.

⁹ Kopotu mama ejai Kilikia esasedoti lopeti, kijaikis apesan nuayaunitai togo loka Edeke, nuatukokinito Ilebin, ikagolok ekek, kakan naka Manase ka Epuraim, ka aatoŋot kere naka Isirael, ka Yuda kere ka Benyamin, ka luiboiete koYerusalem.

¹⁰Kijaikis akan naka ikeswamak luiteete etogo loka EJAKAIT; koinakis ikeswamak lueswamaete togo loka EJAKAIT aiteteunia ka apucunio etogo.

¹¹Koinakis ikekeok, ka ikadukok, agwelia amor nuikec, ka akito nuimorikikinete, aiswamaa abaoi nuka itogoi luapotu ikabakan luka Yuda komudiasi.

¹² Kiswamata ituŋa kamunonut; ikaanyanarakakec Yakat ka Obadia, Ilebin, lukodwe luka Merari; Sekaria ka Mesulam, lukodwe luka Ikokatin aiteten: ice luka Ilebin da, kere luepedorete airam ejok iboro lueruosi.

¹³ Kepolokinito kesi luebwokete abwokon, kitetenata kere lueswamaete ŋolipone loka aijaanakin: ajaas koLebin da ikewadikak, ka ikapolokitok, ka ikagolok.

¹⁴ Nakitolomuniata apesan nuayaunitai togo loka EJAKAIT, kodum Kilika esasedoti eitabo loka ikisila luka EJAKAIT luainakinio kama ka Musa.

¹⁵Koboŋok Kilikia kotema Sapan ekewadikan atiar, “Adum eoŋ eitabo loka ikisila kotogo loka EJAKAIT.” Kosodi Kilikia aijaikin Sapan eitabo.

¹⁶Kodaka Sapan eitabo mama ejai ekabaka, ido kinyakak ekabaka akiro, ebe, “Iswamaete ikonikejaanakinak kere nukititinitai.

¹⁷Akorasi apesan nuadumuna kotogo loka EJAKAIT, ejaikis akan naka ikaanyanarak, akan da naka ikeswamak.”

¹⁸ Kosodi Sapan ekewadikan alimokin ekabaka ebe, “Kejaiki Kilikia esasedoti eitabo.” Kosiom Sapan kakonyen nuka ekabaka.

¹⁹ Kosodi kanen, kiira ekabaka akiro nuka ikisila, kocil ikenapen.

²⁰ Kicorak ekabaka Kilikia, ka Akikam okoku loka Sapan, ka Abudon okoku loka Mika, ka Sapan ekewadikan, ka Asaia ekejaanakinan loka ekabaka ebe,

²¹ “Koloto yesi, kiŋita EJAKAIT kanukaŋ, kanuka ŋul da luideuna koIsirael ka Yuda, akiro nuka eitabo loadumun: naarai epol anyunyura naka EJAKAIT nakibukokina oni, naarai mam lukapapaawok apotu koricito akirot naka EJAKAIT, aiswamaenen kwape ajaatar kere nuiwadikatai oitabo lo.”

²² Kolot Kilikia, ka ŋul da luecorakini ekabaka, mama ejai Kulida anabi, aberu naka Salum okoku loka Tokat, okoku loka Kasara, ekeŋadan inapen; (eboienenei ŋin koYerusalem katutubet nakiareit;) kinerut kaŋes ŋun.

²³Kotema ŋesi kes atiar, “Inera kwanata EJAKAIT, Edeke loka Isirael, ebe, ‘Kolimokis etuŋanan lokijukunit yes neajai ebe.

²⁴ Inera kwanata EJAKAIT ebe, Koany, ayauni aronis aibois na, ka neejaas luiboiete kotoma, aikenito kere nuiwadikatai oitabo loasiomi kakonyen nuka ekabaka loka Yuda:

²⁵naarai kajala, esupuruikis lukisupurununo odekesio ice, aitunyunyurikin eoŋ kaswamisio kere nuka akaninikec; ŋes ebukokinor akanyunyura aibois na, komam eduŋeori.

²⁶Konye ekabaka loka Yuda, lokijukuni aiŋitakin EJAKAIT, kolimokis ŋes kwanata ebe, Inera kwanata EJAKAIT Edeke loka Isirael ebe: Nuka akiro nukipupuni,

²⁷ kanu anonokiaror ekonitau, kitasonikin kakonyen nuka Edeke, naipupunio akekiro aluikin aibois na, aluikin da luiboiete kotoma, kitasonikin kakonyeneka, kocil ikoninapen, komony akiyo kakonyeneka; inera EJAKAIT ebe, Keira eoŋ da,

²⁸koany, atukokini jo mama ejaas lukapapaakon, kitukokinio jo ailitikon inapakina, kwabo mam eanyunete akonikonye aronis kere naayauni aibois na, ka luiboiete kotoma.’ ” Kinyakakinai ekabaka akiro.

²⁹ Kosodi ekabaka aijukar kotukok imakio kere luka Yuda ka Yerusalem.

³⁰Kodoka ekabaka togo loka EJAKAIT, ka ituŋa kere luka Yuda, ka lukiboiete koYerusalem, ka isasedotin, ka Ilebin, ka ituŋa kere, lukapolok ka ludidik kere: kosiomak akiikec akiro kere nuka eitabo loka aitutuket loadumun kotogo loka EJAKAIT.

³¹ Kobwo ekabaka kaiboisike, kitutuk aitutuket kakonyen nuka EJAKAIT, atupit EJAKAIT, airic aicorakinetake, ka aitejenunetake, ka ikisilake, keketau kere, kakeiiar da kere, aitodol akiro kere nuka aitutuket nuewadikatai oitabo lo.

³²Kitogogoŋ da ituŋa kere Iuadumuna koYerusalem ka Benyamin, aitodol. Kiswamata lukiboiete koYerusalem kwape ajaar aitutuket naka Edeke, Edeke loka lukapapaakec.

³³ Kolema Yosia italesia kere kakwapin kere nuaraas nuka idwe luka Isirael, kisidik luadumuna kere koIsirael aijaanakin, ŋes aijaanakin EJAKAIT Ekecedeke. Apaarasiake kere mam apotu konyoutu katupit EJAKAIT, Edeke loka lukapapaakec.