Read Ateso 2 Aisiltonokin 35 Bible Online

2 Aisiltonokin 35 - Ateso bible

2 Aisiltonokin 35

¹ Koric Yosia Aleleŋio mama ejai EJAKAIT koYerusalem: koarata lukalelenio kapaaran nakitomonet kaoŋon naka elap losodit.

² Kibwaik isasedotin aswamukec, kisinyikok kes aijaanakin kotogo loka EJAKAIT.

³ Kotema ŋesi Ilebin luisisianakinete Isirael kere, luaraas lukalaunak mama ejai EJAKAIT atiar, “Kibwaikis asaduku nakalaunan togo loabu Solomon okoku loka Daudi ekabaka loka Isirael koduk; mam bobo ejaun abwokon okeperinikus: kijaanakisi do EJAKAIT Ekusideke, ka iketuŋa Isirael.

⁴ Kitemonokisi kwape ejaatar ikekia luka lukapapaakus, kabeanakinikus, kwape ajaatar aiwadikaeta nuka Daudi ekabaka loka Isirael, ido kwape ajaatar aiwadikaeta nuka Solomon okokuke.

⁵ Kobwaata kaibois nakalaunan kwape ajaatar atiaketa nuka ikekia luka lukapapaakus luka ikusiinacan idwe luka ituŋa, kojaun kanolidiopet atiaket naka ekek loka lukapapaa luka Ilebin.

⁶ Koarata lukalelenio, kitalaunos bonik, kitemokis nuka ikusiinacan, aswam kwape ajaar akirot naka EJAKAIT kama ka Musa.”

⁷ Kosodi Yosia ainakin idwe luka ituŋa, ŋul kere luajaas kanen, kosipan, imerekekin ludidik kaikalei, kes kere araun ainakineta nuka aleleŋio, emwaasi ilukumin akaisauni, ka imoŋin Iutoba ilukumin iuni: ŋul keraas koboro luka ekabaka.

⁸ Koinakis ikapolokoke araun ainakinet naka akote mama ejaas ituŋa, ka isasedotin, ka Ilebin. Apotu Kilikia ka Sekaria ka Yekiel, ikayaitok luka etogo loka Edeke koinakis isasedotin ibaren ludidik ilukumin iarei ka akwat akanykape, ka imoŋin akwat auni araun ainakineta nuka aleleŋio.

⁹Konania da, ka Semaia ka Netanel, iinacanake, ka Kasabia ka Yeiel ka Yosabad, ijaka luka Ilebin, koinakis Ilebin ibaren ludidik ilukumin ikany, ka imoŋin akwat akany.

¹⁰ Kwaŋin kitemokin aijaanakin, kobwaata isasedotin kaiboisikec, ka Ilebin kabeanakinikec, kwape ajaar aicorakinet naka ekabaka.

¹¹ Koarata lukalelenio, kobwatanakis isasedotin aokot nuejaunete kakanikec, kojenata Ilebin kes.

¹² Kolemasi ainakineta nuicweio, tetere einakinete kwape ajaatar atiaketa nuka ikekia luka lukapapaa luka idwe luka ituŋa, ainakin EJAKAIT, kwape iwadikatere oitabo loka Musa. Kiswamata kwaŋin komoŋin da.

¹³ Kopeoto lukalelenio kakim kwape ajaar aicorakinet: kipooto ainakineta nukalaunak kotoma amotii, ka akeito, kasepulian da, kodakasi katipet mama ejaas idwe kere luka ituŋa.

¹⁴Kokau kitemokis nukec, ka nuka isasedotin da; naarai kirododorito isasedotin odwe luka Aaron ainakin ainakineta nuicweio ka asiepai kiton kuare: kanuka ŋun kitemokis Ilebin nukec, ka nuka isasedotin odwe luka Aaron.

¹⁵ Kejaas ikayook, odwe luka Asap aiboisikec, kwape ajaar aicorakinet naka Daudi, ka Asap, ka Keman, ka Yedutun ekadwaran loka ekabaka; ajaas ikagolok kanolirute: komam ipudas anyoun kaswamukec, naarai kitemokis ikeceinacan Ilebin nukec.

¹⁶Kwaŋin kitemokin aijaanakin kere naka EJAKAIT kapaaran kaŋin, airic aleleŋio, ainakin da ainakineta nuicweio kotem loka EJAKAIT, kwape ajaar aicorakinet naka ekabaka Yosia.

¹⁷ Koricata idwe luka Isirael luajaas nen aleleŋio kapak kaŋin, ka epucit loka imugatin lumam itubuunitoi apaarasia akanykaarei.

¹⁸ Amamei da aleleŋio naikoni nen naarieitai koIsirael ageun kapaarasia nuka Samuel enabi; kwabo mam ediokabaka loka Isirael abu koric aleleŋio kwape kerieia Yosia, ka isasedotin ka Ilebin, ka Yuda kere ka Isirael luajaas nen, ka lukiboiete koYerusalem.

¹⁹Kokaru lokitomonet kakanykauni loka airum naka Yosia ŋes kericere aleleŋio ŋin.

²⁰ Akaulo kaŋun kere, kedau Yosia aitemokin eyekalu, kolot Neko ekabaka loko Misiri asurokin Karakemis eiduny ka Eupurat; koloma Yosia asurokin ŋes.

²¹ Konye kijuka ŋesi ikiyakia mama ejai ebe, “Kimariai inyo eoŋ ka jo, ijo ekabaka loka Yuda? Mam eoŋ kasurokini jo lolo, dimarai asurokin ekek lokijior eoŋ; kecorak Edeke aisunyakin: kinyek ijo aiilokin Edeke, loejai keoŋ, kinyek amudiar jo.”

²² Konye koŋer Yosia aibelokin akekonyen, konye kitegelikin bon, kosodi ejie kaŋes, mam abu kiira akiro nuka Neko, nuapote kaituk naka Edeke, kobu ejie aditot naka Megido.

²³ Kogumata ikagumak imalia ekabaka Yosia; kobala ekabaka ikekejaanakinak ebe, “Koyaŋaarai eoŋ: naarai kemusuŋi noi.”

²⁴ Kitodokut ikekejaanakinak ŋes kagali, kibwaikis ŋes agali nakiareit naajai kaŋes, koyaut ŋes Yerusalem; kotwana, aponi kidaikinai atesina nuka lukapapaake. Kibworoto Yuda kere ka Yerusalem Yosia.

²⁵ Kokuudian Yeremia Yosia: kinerata ikayook kere ka akayook nuka Yosia kakuudianakec, kiton lolo: kitaraut aicorakinet koIsirael: ido koany, iwadikatai roma akuudian.

²⁶ Aswamisio ace nuka Yosia, ka akeswamisio nuejok, kwape ejaatar nuiwadikatai okisila luka EJAKAIT,

²⁷akeswamisio da, nusodit ka nukawasia, koany, iwadikatai oitabo loka ikabakan luka Isirael ka Yuda.